Valamuli 8
8
1Kanilezi a vanhu va ka Efraime va te ngalo ka Gideoni: U mahisile kuyini lezi u nga kala u hi ramba hi yalwa ni vaMidiani? Va lo tlotlisana nguvu naye.
2Yena i te ngalo kabye: Xini nzi mahileko xo ringana na nwina ke? Kasi a ku kutsula mauva ka va ka Efraime a hi chukwana ku hunza kutsovela ka vinya ga Abiezera ke?
3Nungungulu i nyikele mandleni ya nwina tihosi timbiri ta vaMidiani: Oreba na Zeebe. Makunu i ntiro muni nzi mahileko wa ku ringana ke? Laha a nga wa wulawulile a timhaka leti kabye; va lo bohla zanga yabye.
4Zonake Gideoni i lota le Jordani ni vavanuna lava a nga wa hi navo va 300, va ta tlhatuka na va karele, na va ha hlongolisa vaMidiani.
5Aku ka vavanuna va ka Sukote: Va heni zibaba a vanhu lava nzi fambako navo, hakuva va karele; nzi ta hlongola Zeba na Zalmuna, a tihosi ta vaMidiani.
6A tihosi ta le Sukote tiku kakwe: Kaxa a mandla ya Zeba na Zalmuna ma lomu canjeni ga wena, lezi u nge ngha hiha a yimpi ya wena a zibaba ke?
7Gideoni aku: Loku zi hi lezo, a siku Jehova a ta nga nyikela Zeba ha Zalmuna mandleni ya mina, nzi ta pfhemulela a mimiri ya nwina hi mizwa ya lomu xiwuleni ni zigetlwani.
8I lo suka laho aya le Penueli a ya wula kambe zalezo. A vanhu va le Penueli va lo mu hlamulisa lezi va mu hlamulisileko zona va le Sukote.
9I lo wulawula ni vanhu va le Penueli, aku: Loku nzo tlhela nzi wuya hi kurula, nzi ta ta khungumula a khokhola legi.
10Makunu Zeba na Zalmuna va wa chikele le Karkora ni mabutho yabye, 15,000 wa vavanuna lava va nga wa sele ka wontihe mabutho ya le Mutsuwuka-gambo, hakuva ku wa delwe 120,000 wa vavanuna va hlomileko.
11Gideoni i lo kanziha hi ndlela ya lava va tshamako matendeni, hi tlhelo ga Mutsuwuka-gambo, ka Noba na Jagobeha, a ya hlasela mabutho lawa ma nga wa rivatekile.
12Zonake Zeba na Zalmuna va lo tsutsuma. Kanilezi Gideoni i lo va hlongolisa a ya khoma tihosi leto ta timbiri ta vaMidiani, Zeba na Zalmuna, a hangalasa mabutho wontihe.
13Laha Gideoni nʼwana Joaxi a nga wa wuya hi le kulweni le mugangeni wa Heresi,
14i lo khoma a jaha ga le Sukote a gi wutisa. Gona gi lo xaxameta a mavito ya tihosana laha ka papilo, ni masingalakati ya le Sukote gi mu nyika; va wa hi 77 wa vavanuna.
15I lo chikela ka vanhu va le Sukote aku kabye: Zeba na Zalmuna a hi vona lava mu wa nga nzi kanyisa hi kota ya vona, muku: Kaxa a mandla ya Zeba na Zalmuna ma lomu canjeni ga wena, lezi u nge ngha hiha zibaba a vanhu va wena lava va kareleko ke?
16Zonake i lo khoma masingalakati ya muti, a teka mizwa ya le xiwuleni ni zigetlwani a va tsayisa ha zona a va le Sukote.
17I lo khungumula ni khokhola ga le Penueli, a daya a vanhu va muti.
18Anzhako ka lezo i te ngalo ka Zeba na Zalmuna: Mbanhu va kuyini lava mu nga wa va hlasela le Tabora ke? Vona vaku: Va wa kota wena; munwe ni munwani i wa fanana ni nʼwana wa hosi.
19Yena aku: Va wa hi vanakulori, a vana va mamani wa mina. Nzi hlambanya ha Jehova, loku nwina mu wa va tsikile va hanya, ngha nzi nga mu dayi.
20Zonake i te ngalo ka matewula yakwe Jetera: Suka u va daya! Kanilezi a mufana a nga hlomulangi a supado yakwe hi kota ya wutoya, hilezi i wa ha hi tsongwani.
21Zonake Zeba na Zalmuna vaku kakwe: Suka wena u hi daya, hakuva a ntamu wa munhu wu ringana ni munhu wa kona. Gideoni i lo suka a daya Zeba na Zalmuna, a teka ni zingolongotlwani lezi zi nga hi tinhanwini ta makameli yabye.
22Zonake a vavanuna va ka Israeli va te ngalo ka Gideoni: Hi fumele wena, ni nʼwana wa wena ni zukulu wa wena, hakuva u hi hlangutile mandleni ya vaMidiani.
23Gideoni aku kabye: Cima nzi nga ta mu fumela, ge hambu ni nʼwana wa mina. Jehova hi yena a ta nga mu fumela.
24Gideoni kambe aku kabye: Mina nzo kombela munwe ni munwani wa nwina, lezaku a nziha xingwavila xa nzalama, lezi mu zi phangileko. Hakuva a vaMidiani va wa hi ni zingwavila za nzalama, kota lezi va nga hi vaIxmaeli.
25Vona va te ngalo kakwe: Hi ta ku nyika na hi xalele. Va lo andlala a nguwo, vontlhe va hoxetela laho a zingwavila lezi va nga wa phangile.
26A kutika ka zingwavila lezi a nga wa zi kombele ku wa hi 1,700 wa maxekeli ya nzalama; ku nga hlayiwi ni zingolongotlwani hambu a zingwavila za tindleve, hambu ni tinguwo to pswhuka leti ti nga wa ambelwe hi tihosi ta vaMidiani, hambu a tiketani leti ti nga wa hi tinhanwini ta makameli yabye.
27Gideoni i lo maha a efode ha zona, a yi veka le Ofra, laha mutini wabye. Kanilezi a vaIsraeli va lo maha wuoswi ha yona, yi maha kambe a ziyo ka Gideoni ni ka yindlu yakwe yontlhe. Ekso. 28:4, 6
28Zinghaho a vaMidiani va lo khoza ka vanana va ka Israeli, va nga ha engeti kambe va tlakusa tihloko tabye. A tiko gi lo humula 40 wa malembe xikhatini xa Gideoni.
29Zonake Jerubaali nʼwana Joaxi i loya tshama lomu ndlwini yakwe.
30Gideoni i wa hi ni 70 wa vafana vo belekwa hi yena, hakuva i wa tekile vasati vo tala.
31A mundlukulu wakwe loyi a nga wa hi le Xekemi, yenawu i wa mu pswalele mufana a mu chula vito ga Abimeleki.
32Gideoni nʼwana Joaxi i lofa na a khosahele nguvu, a lahliwa le xilahleni xa raru wakwe Joaxi, le Ofra wa ka Abiezera.
33Laha Gideoni a nga file a vanana va ka Israeli va lo engeta kambe va ti nyiketela ku maha wuoswi ni maBaali. Va lo ti mahela Baali-berite a nungungulu wabye.
34A vanana va ka Israeli a va ha alakanyangi Jehova Nungungulu wabye, loyi a va tlhatlhisileko mandleni ya valala vabye vontlhe lava va va ranzeleko matlhelo wontihe.
35Ni kambe a va wonisangi wunene ka yindlu ya ka Jerubaali, loyi a nga Gideoni, hi ku bonga zontlhe a zilo lezi zo saseka a nga mahela va ka Israeli.
Currently Selected:
Valamuli 8: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
