Valamuli 6
6
Gideoni.
1A vanana va ka Israeli va lo engeta kambe va maha kubiha mahlweni ka Jehova. Yena i lo va nyikela mandleni ya vaMidiani ntlhanu wa malembe ni mambiri,
2A vaMidiani va lo xanisa nguvu va ka Israeli. A vanana va ka Israeli va lo tsutsumela mikovotlweni yi nga le zitsungeni ni lomu timhakweni, ni lomu makhokholeni, hi ku chava vaMidiani.
3Ku waku loku va byalile, a vaMidiani ni vaAmaleki ni va le Mutsuwuka-gambo, va kanziha va ta va hlasela.
4Va wa chikela va gova kusuhani navo, va lovisa wontihe mavele ya masimu kala le Gaza, va nga siyi ne ni xakuga ka Israeli, ge hambu yivu, kutani homu, kutani mbongola.
5Hakuva vona va wota ni mitlhambi yabye ni matenda yabye. Va wata khwatsi i humbi yi nga hiko na kuhlayiwa, va lota ni makameli yabye va ta xakela tiko.
6Hilezo Israeli i lo mahiwa xisiwana xa hombe hi vaMidiani. A vanana va ka Israeli va lo rila ka Jehova.
7Laha a vanana va ka Israeli Jehova va nga wa rilile hi kota ya vaMidiani,
8Jehova i lo rumela muprofeti ka vanana va ka Israeli, a yaku kabye: Jehova Nungungulu wa ka Israeli i ngalo: Nzi mu humesile le Gipite, nzi mu humesa le ndlwini ya wukhumbi.
9Nzi mu tlhatlhisa canjeni ga vaGipite, ni canjeni ga vontlhe vaxanisi va nwina, nzi va hlongola mahlweni ka nwina, nzi wuya nzi mu nyika a tiko gabye.
10Nzi wa te ngalo ka nwina: Hi mina Jehova Nungungulu wa nwina; mu nga dzuki mu chava vanungungulu va vaAmori, lava mu akileko lomu tikweni gabye. Kanilezi a mu ingisangi a gezu ga mina. 2 Tih. 17:35, 38
11Zonake a ngelosi ya Jehova yi lota yi ta tshama lahasi ka nkuhlu lowu wu nga le Ofra, ka Joaxi a muAbiezeri. A nʼwana wakwe Gideoni i wa kari a phopha mavele lomu xigowolweni, kasi ku fihlela vaMidiani.
12A ngelosi ya Jehova yi lo woneka ka yena, yiku: Jehova i na wena, wena wanuna wa nhenha.
13Gideoni aku ka yona: O, hosi yanga, loku Jehova a wa hi zinwe na hina, hi kuyini zontlhe lezi zi hi humeleleko? Zi kwihi zontlhe zihlamaliso zakwe lezi a vararu va hina va nga hi hlawutela zona, vaku: A hi yena Jehova a hi humesileko Gipite ke? Kanilezi makunu Jehova i hi hoxile, a hi nyikela mandleni ya vaMidiani.
14Kanilezi Jehova i lo hunzuluka a mu cuwuka, aku: Famba hi ntamu lowu wa wena, u ya hlanguta vaIsraeli mandleni ya vaMidiani. Kasi a nzi ku rumangi ke? Maheb. 11:32
15Gideoni aku kakwe: Hosi yanga, nzi ta va hlangutisa kuyini vaIsraeli ke? Cuwuka ngango wa hina, hi wona wa lahasi ka lixaka la ka Manasa; mina nzi xisiva-marumbu xa kona ndlwini ya dadani.
16Jehova aku kakwe: Hizinene nzi tava na wena. U ta hlasela vaMidiani khwatsi i munhu munwe. Ekso. 3:12
17Gideoni aku kakwe: Loku mina hakunene nzi kumile thomo mahlweni ka wena, hi nga nzi wonisa xikombiso xi kombisako lezaku hi wena u wulawulako na mina.
18U nga suki laha kala nzi wuya nzi ku nehela xinyikiwo xa mina, nzi ta xi veka mahlweni ka wena. Aku kakwe: Nzi ta rinzela kala u wuya.
19Gideoni i famba a ya longisa a ximhutana, a maha zibaba zi nga comelwangiko hi efa yinwe ya mapa: a nyama i lo yi chela lomu xirunzwini, a chela muro lomu ka mbita. I lota nazo kakwe lahasi ka nkuhlu a ta mu nyika.
20A ngelosi ya Nungungulu yiku kakwe: Teka a nyama ni zibaba lezi zi nga comelwangiko u zi veka laha ka ribye legi, u chela muro hehla ka zona. Yena i lo maha lezo.
21Zonake a ngelosi ya Jehova yi lo zi xungameta hi magumo ka nhonga leyi yi nga wa welele canjeni ga yona, yi khumba a nyama ni zibaba zi nga comelwangiko. Laho ku lo vura nzilo na wu huma hi lomu ribyeni, wu hisa a nyama ni zibaba zi nga comelwangiko; zonake a ngelosi ya Jehova yi lo nyamalala. Levi 9:24; 1 Tih. 18:38
22Gideoni i lo wona lezaku i ngelosi ya Jehova, aku: Hosi, Nungungulu yanga, nzi le khombyeni hakuva nzi wonile a ngelosi ya Jehova nghohe ni nghohe.
23Jehova aku kakwe: A kurula a kuve na wena! U nga chavi, cima u nga tafa!
24Zonake Gideoni i lo aka alati ga Jehova laho, a gi chula vito ga Jehova-xalome (Jehova wa kurula). Ni lezi ga hi kona le Ofra wa vaAbiezeri.
25Gwalego wusiku Jehova i te ngalo kakwe: Teka a honwana ya raru wa wena, ni yinwani honwana ya 7 wa malembe wukale, u khungumula a alati ga Baali legi a raru wa wena a nga nago, u tsemelela ni xifananiso xa Axtarte lexi xi nga lomo. Deut. 7:5
26U aka a alati ga Jehova Nungungulu wa wena hehla ka ribye lego, u gi aka khwatsi. U ta teka a honwana ya wumbiri u maha muphahlo wo hiswa hi tihunyi ta xifananiso lexi u nga xi tsemelela.
27Zonake Gideoni i lo teka a 10 ga vavanuna va malanza yakwe, a maha khwatsi hi lezi Jehova a mu byelileko. Hi kota ya ku chava va laha ngangweni wa raru wakwe ni vanhu va muti, a nga zi mahangi ni hlikanhi; i lo zi maha ni wusiku.
28Laha a vanhu va muti va nga vuka ni mixo, va lo wona a alati ga Baali na gi khungumulwe, a xifananiso xa kona na xi tsemelelwe, a honwana ya wumbiri na yi mahilwe muphahlelo laha alatini legi gi nga wa akilwe.
29Va lo wutisana, vaku: Himani a mahileko lezi? Laha va nga wa wutisisile hi kuxiyisisa, va te ngalo: Hi Gideoni nʼwana Joaxi a nga maha lezi.
30Zonake a vanhu va muti vaku ka Joaxi: Humesa a nʼwana wa wena kasi wafa, hakuva i khungumule a alati ga Baali, a tsemelela a xifananiso xa Axtarte.
31Joaxi i lo hlamula vontlhe lava va nga wa mu vukela, aku: Hi nwina mu yimelako Baali ke? Mu lava ku mu ponisa ke? Loyi a mu yimelako a dawe na ga ha hi mixo. Loku a hi mingungulu, a ti lwele ha yece, hakuva a alati gakwe gi khungumulweko.
32Hikwalaho a siku lego Gideoni i lo chuliwa vito ga Jerubaali, vaku: Ngha Baali a ti lwela hi lezi va khungumuleko a alati gakwe.
33Zonake vontlhe vaMidiani ni vaAmeleki ni vanana va le Mutsuwuka-gambo va lo tsombana khatiginwe va tlhatuka Jordani, va ta gova le minzhelelweni ya Jezreeli.
34A Moya wa Jehova wu lota ka Gideoni. I loba a mpunzu, a vanhu va Abiezeri va tsombana khatiginwe kakwe. 2 Kro. 24:20; Lu. 24:49
35I lo rumela a mitsumi ka vontlhe va ka Manasa, vonawu va lo tsombana khatiginwe naye. I lo rumela yinwani mitsumi ka va ka Axeri, ni ka va ka Zabuloni, ni ka va ka Naftali; vonawu va lo kanziha ku ya tlhangana zinwe naye.
36Gideoni aku ka Nungungulu: Loku hakunene u ta ponisa Israeli hi canja ga mina, kota kuwula ka wena,
37nzi ta veka a dzowo ga yivu gi nga ni woya laha lilonzeni la wuhulelo. Loku a nzhokati yiwa laha ka dzowo koce, kanilezi a lilonze lontlhe li sala li womile, nzi ta zi tiva lezaku u ta ponisa Israeli hi canja ga mina, khwatsi hi lezi u wulileko.
38Zi lova tano, hakuva laha na vukile mixweni i lo ya kama dzowo ku huma mati ya nzhokati, ma tata guwana.
39Gideoni aku ka Nungungulu: Ngha zanga ya wena yi nga nzi vindlukeli, nza ha ta wulawula khatiginwe basi; nzi lava xinwani xikombiso hi gona dzowo legi. Ngha gona goce gi woma, kanilezi a nzhokati yiwa hehla ka lilonze lontlhe. Gen. 18:30
40Nungungulu i lo maha lezo wusiku gwalego. A dzowo gona goce gi wa womile, kanilezi a nzhokati na yi wile hehla ka lontlhe lilonze.
Currently Selected:
Valamuli 6: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
