Valamuli 3
3
1Makunu lawa hi matiko lawa Jehova a nga ma siyile kasi ku ringa ha wona va ka Israeli, lava va nga wonangiko tontlhe tiyimpi ta Kanani,
2kasi a zizukulwana za ka Israeli zi ta tiva ku gonza tiyimpi, nguvunguvu lava va nga kala va nga ti tivi hi mahlweni.
3Ku lo sala ntlhanu wa tihosi ta maFilistia, ni vaKanani vontlhe, ni vaSidoni, ni vaHivi lava va akileko xitsungeni xa Lebanoni, kusukela xitsungeni xa Baal-hermoni kala kuya le Hamate.
4Ma wa hi ya ku ringa ha wona va ka Israeli, kasi ku tiva lezaku va ta ingisa milayo ya Jehova, leyi a nga leletela vararu vabye hi nomu wa Mosi.
5Hikwalaho a vaIsraeli va lo aka xikari ka vaKanani, ni vaHiti, ni vaAmori, ni vaPerezi, ni vaHivi, ni vajebusi.
6Va lo tekana ni vanhanyana vabye, vonawu va nyikela vanhanyana vabye ka vana vabye, va khozela vanungungulu vabye. Ekso. 23:32; Deut. 7:3
Otnieli.
7A va ka Israeli va lo maha kubiha mahlweni ka Jehova, va rivala Jehova Nungungulu wabye, va khozela maBaali na Axtarte.
8Makunu a zanga ya Jehova yi vindlukela va ka Israeli, a va nyikela canjeni ga Kuxani-Rixataime, a hosi ya le Mesopotamia. A vanana va ka Israeli va lo fumelwa 8 wa malembe hi Kuxani-Rixataime.
9Kanilezi laha a vanana va ka Israeli va nga rila ka Jehova, yena i lo va vuxela muhlanguti loyi a nga va hlanguta, a nga Otnieli nʼwana Kenazi, a nzisana ya Kalebi.
10A Moya wa Jehova wu lota hehla kakwe, a maha mulamuli wa Israeli. I lo hlomisa yimpi, Jehova a nyikela Kuxani-Rixataime a hosi ya Mesopotamia canjeni gakwe. A canja gakwe gi lo khozisa Kuxani-Rixataime.
11A tiko gi lo humula 40 wa malembe. Otnieli nʼwana Kenazi i lofa.
Ehudi.
12A vanana va ka Israeli va lo engeta va maha kubiha mahlweni ka Jehova. Jehova i lo nyika ntamu ka hosi Egloni a hosi ya Moabi kasi ku vukela va ka Israeli, hilezi va wa mahile kubiha mahlweni ka Jehova.
13Egloni i lo tsombanyisa a vanana va ka Amoni ni va ka Amaleki; va lo ya khozisa va ka Israeli, va teka a muti wa micinzu.
14A vanana va ka Israeli va lo fumelwa 18 wa malembe hi Egloni a hosi ya vaMoabi.
15Kanilezi laha a vanana va ka Israeli va nga rila ka Jehova, yena i lo va vuxela muhlanguti, a nga Ehudi nʼwana Gera, a muBenjamini, a wanuna wa libhabha. A vanana va ka Israeli va lo rumela nzuvo ha yena ka Egloni a hosi ya vaMoabi.
16Ehudi i lo ti mahela mukwana wa wutlha matlhelo mambiri, wu nga hi khono munwe kuleha, a wu bohelela laha nyongeni ya tlhelo ga xinene, hi lahasi ka nguwo yakwe.
17I lo ya nyikela a nzuvo ka Egloni a hosi ya vaMoabi. Egloni i wa hi munhu wo kuluka nguvu.
18Laha Ehudi a nga wa mbhetile ku hendleleta a nzuvo, i lo tlhelisa a vanhu lava va nga wa rwele a nzuvo ya kona.
19Kanilezi yena i lo tlhela hi le wutshanwini ga zifananiso le Gilgale, a yaku: Hosi, nzi na ni mahungu ya fihlakalo a ku ku byela, wena hosi. A hosi yiku: Wa nga miyela! Vontlhe lava va nga wa hi kusuhani kakwe, va lo huma lahandle.
20Ehudi i lo enghena lomu a nga wa tshamile yece, lomu ndlwini yo pepemela aku kakwe: Nzi ku nehela mahungu ya Nungungulu. Egloni i lo suka xitshanwini xakwe a yima.
21Ehudi i lo nawuluta a canja gakwe ga xibhabha a teka mukwana laha nyongeni yakwe ya tlhelo ga xinene a mu tlhava rumbu,
22a xihinza xi nyupela zinwe ni mukwana wa kona, a mafura ma fenengeta a xiketse, hakuva i wa nga hlomulangi a mukwana rumbyini gakwe, kanilezi wu lo phondla se nzhako.
23Zonake Ehudi i lo huma laha nyangweni, a valela hosi le xitezi, a khotsa tivati.
24Laha a nga wa fambile, a malanza yakwe ma lota ma ta kuma a tivati na ti khotsilwe, vaku: Kutani wa ho hambuka lomu kwarutwini yakwe ya le hehla. 1 Sam. 24:1
25Va lo rinzela kala va hlamala, hakuva i wa nga vululi tivati ta yindlu. Hikwalaho va lo teka pfhungulo va vulula tivati. Languta, a hosi yabye yi wa no lakahla lahasi, na yi file.
26Ehudi i lo nyemuka na va ha rinzele, a tsemakanya wutshamu ga zifananiso, a tsutsumela le Seira.
27Laha a nga wa chikele, i loba a mpunzu le xitsungeni xa ka Efraime, a vanana va ka Israeli va lo relela naye hi le xitsungeni, na a rangile mahlweni kabye.
28Aku kabye: Nzi lanzeleni, hakuva Jehova i nyikele a valala va nwina va ka Moabi mandleni ya nwina. Va lo relela va mu lanzela vaya mapelweni ya Jordani ngomama ni vaMoabi, va nga vumeli munhu ku tlhatuka.
29Ka xwalexo xikhati va lo hihirita vaMoabi va daya xipimo xa 10,000 wabye, a vavanuna va wulaka, a tinhenha ta kulwa; a ku ponangi ni munwe.
30Zinghaho va ka Moabi va lo khoziswa hi va ka Israeli a siku lego. A tiko gi lo humula 80 wa malembe.
Xamgare.
31Anzhako ka Ehudi ku lo lanzela Xamgare nʼwana Anati, loyi a nga hihirita 600 wa vaFilistia hi mbhanya wa tikavi. Yenawu i lo hlanguta Israeli.
Currently Selected:
Valamuli 3: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
