Isaya 57
57
1Loyi a lulamileko wafa,
Kanilezi a ku na munhu zi mu henyako mbilu;
A vakhongeli va susiwa,
Kanilezi a nga kona a zi khatalelako.
Loyi a lulamileko a susiwa mahlweni ka leʼzo biha
2A enghena kuruleni;
Lava va fambileko hi kululamileko va ta humula mibhedini yabye.
3Kanilezi nwina vana va zitumbe za xisati, tshinelani laha,
Nwina pswalo wa zirembi ni zibhayi! Mat. 12:39; 16:4
4Mu hleka mani?
Mu ahlamela mani milomu? Mu humesela mani tirimi?
Xana a mu vana va kuonha, a pswalo wa mawunwa ke?
5Nwina lava mu vurako lahasi ka mikanyi,
A hasi ka sinya yinwe ni yinwani yi hlukako;
Nwina lava mu dayako vanana lomu mikoveni,
Ni lomo timhakweni ta maribye. Levi 18:21; 1 Tih. 14:23
6A xiavelo xa wena hi maribye yo retemuka ya nkova,
Hi yona a tshomba ya wena leyo.
Hi wona lawo u ma phahlelako hi vinya,
Ni xinyikiwo xa mapa.
Nzi ta xalaliswa hi lezo zilo ke?
7U andlele a sango ga wena xitsungeni xi tlakukileko,
Hi laho kambe u kanzihileko a ku ya phahlela hi timhamba.
8U vekile a xialakanyiso xa wena lenzhako ka tivati ni timhanze,
Hakuva na u hi kule na mina u ti funungule ka munwani,
U kanzihile mubhedini wa wena, u wu anamisa,
U lo zwanana navo, u ranza mubhedi wabye ni ka xihi xikhati.
9U yile le hosini ni mafura,
U anzisa mafura ya wena yo nuhela;
U rumile kule a mitsukano ya wena,
U yi rumela ni le Xeoli.
10U wa karele hi ku famba nguvu,
Kanilezi a ku na nga wula, uku:
A zi vuni nchumu!
U kumile ntamu wuswa, a ku rerekangi.
11U wa dzukiswa hi mani, u chava mani ko kala u nga tsumbeki,
Lezi u nga kala u nzi alakanya hambu ku nzi khatalela ke?
Kasi a ku nzi chavi, hilezi nzi miyeleko xikhati xo leha ke?
12Nzi ta tlhatlhambutela a kululama ka wena,
Ni mitiro ya wena yi nga ta ku vuna nchumu.
13Loku u rila ngha a xidlemo xa zifananiso za wena xi ku ponisa!
Kanilezi a mheho yi ta zi kukuleta zontlhe,
A moya wu ta zi yisa kule.
Kanilezi loyi a nzi tsumbako i taga tshomba ya tiko,
A xitsunga xa mina xa kubasa xi ta mu lumba.
Lava va koramileko va tangaliswa.
14Aku: Bhoxani ndlela, ecanyetani misava,
Basisani ndlela,
Mu susa zikhunguvanyiso lomu ndleleni ya vanhu va mina.
15Hakuva Loyi a Tlakukileko a nga le hehla-hehla,
Loyi a tshamako kala kupinzuka,
Loyi a vitwako A Basileko, i ngalo:
Nzi tshama wutshanwini gi tlakukileko, ga kubasa,
Nzi tshama kambe zinwe ni loyi a ti solisako,
A nga ni moya wa ku ti koramisa;
Kasi ku vuxa a mimoya ya lava va ti koramisako,
Nzi vuxa timbilu ta lava va ti Solisako. Tis. 34:18; Lu. 1:48
16Hakuva nzi nga ta ranisa kala kupinzuka,
Ge hambu ku zangara xontlhe xikhati;
Yi nga dzuka yi mbhelelwa hi ntamu a mimoya leyi nzi yi vangileko.
17Nzi mu zangarele nzi muba
Hi kota ya xionho xakwe xa likungo;
Nzi lo ti fihla zangeni ya mina,
Na yena a su hutsetse a famba hi ndlela ya kuranza ka mbilu yakwe.
18Nzi wonile tindlela takwe,
Kanilezi makunu nzi ta mu hanyisa;
Nzi ta mu rangela nzi mu chavelela ni lava a rilako navo.
19Nzi ta veka kukhesa milonwini ya vanhu:
Kurula ka loyi a nga le kule,
Ni kurula ka loyi a nga kusuhani!
Ku wula Jehova: Nzi ta mu hanyisa. Efe. 2:17; Maheb. 13:15
20Kanilezi a vakubiha va fanana ni bimbi legi gi vindlukileko,
Legi gi nga zi kotiko ku rula,
Legi a mabyandlati ya gona ma vuxako phiriwa ni fenze.
21A vakubiha a va na kurula,
Ku wula Jehova.
Currently Selected:
Isaya 57: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
