Isaya 53
53
1Himani a kholilweko lezi hi nga byeliwa zona ke?
A woko ga Jehova gi wonekelisilwe ka mani ke? Joh. 12:38; Rom. 10:16
2Hakuva i lo kula mahlweni kakwe ku fanana ni hluke,
Aku khwatsi i mutsu lowu wu kulako misaveni yi womileko.
I wa nga hi ha dzumba, ge hambu kusaseka ku kokako mahlo;
Ni, laha hi nga mu wona i wa nga hi na wumbhuri go hi tsakisa.
3I lo nyenyiwa, a aliwa hi vanhu;
Munhu wa mihlomulo, a toloveleneko ni kubayiseka;
I lo nyenyiwa kota loye vanhu va mu fihlelako tinghohe tabye,
A hi mu hlayangi nchumu. Mar. 9:12; Joh. 7:48
4Kunene i lo rwala a kubayiseka ka hina,
A ti rwexa a mihlomulo ya hina,
Kasi hina hi waku: Wa biwa, wa xupulwa hi Nungungulu
Ni ku xanisiwa. Mat. 8:17
5Kanilezi yena i tlhabyilwe hi kota ya zihambunyeto za hina,
A tshobyiwa hi kota ya zigoho za hina;
A xitsayiso lexi xi hi nyikako kurula xi lo wela hehla kakwe,
Zonake hi hanyiswa hi timbirimbi takwe. Rom. 4:25; 1 Kor. 15:3; 1 Ped. 2:24
6Hina hontlhe hi wa hambukile khwatsi hi tiyivu,
Munwe ni munwani a famba hi ndlela yakwe;
Kanilezi Jehova i mu rwexile a kubiha ka hina hontlhe,
7I lo hlokiswa, hambu lezi a nga ti tsongahata,
Na a nga vululi nomu wakwe;
Khwatsi hi yivana leyi yi gulelwako kutlhabyiweni,
Ni yivu leyi yi miyelako mahlweni ka mukayi,
Hizalezo a nga vululangi nomu wakwe. Mat. 23:63; Joh. 1:29; Miti. 8:32
8I susilwe hi kuxanisiwa ni kulamuliwa,
Kanilezi a xikari ka vanhu va ka kabye himani a zi alakanyileko
Lezaku i lo susiwa misaveni ya vahanyako,
A biwa hi kota ya zionho za tiko ga mina?
9Va lo mu lahla zinwe ni vaonhi,
A kufeni kakwe i wa hi zinwe ni vanhu va fumileko,
Kanilezi a nga gohangi nchumu,
Ge hambu ku khohlisa hi nomu wakwe, Joh. 8:46; 2 Kor. 5:21; 1 Ped. 2:22
10Zi lo mu xalalisa Jehova a ku muba hi kubayiseka.
Loku a wutomi gakwe gi mahile a mhamba ya zionho,
I ta wona a pswalo wakwe, a lehisa masiku yakwe,
Ni kuranza ka Jehova ku ta vuvuma canjeni gakwe. Rom. 6:9
11I ta wona mihanzu ya kuxaniseka ka muhefemulo wakwe, a eneliswa;
Hi kutiva kakwe a nanza ga mina gi lulamileko gi ta maha vanyingi va lulama,
Hakuva i ta rwala zigoho zabye.
12Hikwalaho nzi ta mu nyika xiavelo xakwe ni vahombe,
I ta avana muphango ni laʼva ntamu,
Hakuva i nyikele kuhanya kakwe kufeni,
A hlayiwa zinwe ni vahambunyeti,
Hambu lezo a nga rwala a zionho za vanyingi,
A kombelela vahambunyeti. Lu. 22:37; 23:33; Joh. 17:2, 6
Currently Selected:
Isaya 53: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
