Isaya 3
3
A kuhahlulwa ni ndlala.
1Hakuva, languta, a Hosi Jehova wa tiyimpi i ta tekela Jerusalema na Juda a xihiketelo xontlhe ni chetengelo wontihe, a kuga kontlhe ni zakunwa, Levi 26:26; Deut. 26:17; Ezek. 4:16
2a tinhenha ni masochwa, a valamuli ni vaprofeti, a vangoma ni masingalakati,
3a tinduna ni tihosi, a masungukati ni vameseri, ni vavumbi va tlharihileko.
4Nzi ta va nyika majaha a kuva tihosana tabye, ni zihlangana zi ta va fumela.
5A vanhu va ta tsimbeketana, munwe ni munwani a tsimbeketwa hi muakelane wakwe; a nisanyana i ta vukela loyi a khosaheleko, ni munhu wa nyalidede i ta vukela munhu a dzunzekileko.
6Laha munhu a ta nga khoma nakulobye a ndlwini ya raru wakwe, aku: Wena u na ni xifenengelo, ngha uve mufumeli wa hina, a rumbi legi gi ta hlayiswa hi wena,
7a ka lego siku i ta hlamula, aku: Mina nzi nga tava muchumi, hakuva a ndlwini ya mina a ku na zakuga hambu ni kuambala; mu nga nzi mahi mufumeli wa vanhu.
8Hakuva Jerusalema gi hahlukile, na Juda i wile, hakuva a tirimi tabye ni zimaho zabye zi vukele Jehova, va tsanwisile a mahlo ya wukulu gakwe.
9A tinghohe tabye ta va kona; va fanana ni vanhu va Sodoma, va maha zionho zabye kubaseni, a va zi fihli. Khombo ka mihefemulo yabye, hakuva va ti mahele kubiha vona wutsumbu. Gen. 13:13; Jer. 2:17
10Wulani lezaku lava va lulamileko va katekile, hakuva va taga a mbhanzo wa zimaho zabye.
11Khombo ka wakubiha! i tava ni khombo hakuva i ta nyikiwa a nchachazelo wa mitiro yakwe.
12A vanhu va mina va tsimbeketiwa hi nwanana, va fumelwa hi vavasati. O tiko ganga, a varangeli va wena va ku hambukisa, va gohile a ndlela leyi u fambako ha yona.
13Jehova i vukile kasi ku wulawula, i yimile kasi ku lamula matiko.
14Jehova i ta lamula a masingalakati ya tiko gakwe, ni tihosana ta gona, aku: Mu gile xivina, lezi zi phangilweko ka zisiwana zi lomu tindlwini ta nwina. Isa. 5:7; Mat. 21:33
15Hikuyini mu hlokisako tiko ga mina, ni ku pswhandlasa zisiwana ke? ku wula Hosi Nungungulu wa tiyimpi. A kulamulwa ka vanhwana va Zioni.
16Tlhatakumbiri, Jehova i ngalo: Khwatsi hilezi a vanhwana va le Zioni va ti kukumukisako, va kombisa matshanza hi tinhamo tabye, a mahlo yabye ma tele hi kukhohlisa, va famba hi ku ti nyanga, na va fambisa hi masinza ya milenge;
17hikwalaho a Hosi yi taba hi xigwere a tihloko ta vanhwana va le Zioni, Jehova i ta funungula wumbyiri gabye. Xip. 47:3; Ezek. 16:37; 23:29
18A sikwini lego a Hosi yi ta susa a manayila va ti bombisako ha wona mahlakaleni yabye, ni zilemba zabye, ni masinza;
19a zingwavila, ni mihono, ni tilesu,
20ni matlele, ni tiketani ta mahlakala, ni miceka, ni tinghaxa ta mipepo, ni zitsungulo,
21a tiphera, ni tidayimani ta tinhovu,
22a tinguwo ta mibuzo, ni mabhaji; ni majasi, ni zikhwama,
23a mawoni, ni mahembe ya wukene, ni maduku, ni tiveli.
24A wutshanwini ga mipepo yo nuhela ku tava kona kubola, a wutshanwini ga bhandi ku tava kona a gota; a wutshanwini ga misisi yi xamulweko khwatsi ku tava kona a tipandla; a wutshanwini ga nguwo ya mubuzo ku ta ambaliwa tisakwa; a wutshanwini ga wumbhuri ku tava kona a mapswhapswhati ya ku hiswa hi xiketse.
25A vavanuna va wena va ta dawa hi supado, ni tinhenha ta wena ti ta mbhelela yimpini.
26A tinyangwa ta Zioni ti tava hlomulweni ni kurileni; yena i tava loyi a phangilweko a tshama lahasi.
Tshwa Bible © Bible Society in Mozambique, 1972, 2007.