Hosea 4
4
Nungungulu a holovisana ni va ka Israeli.
1Zwanani a mhaka ya Jehova, nwina vanana va ka Israeli, hakuva Jehova wa kecara a vaaki va tiko, hakuva lomu tikweni a ku na zinene, a ku na wuxinji, ge hambu ku tiva Nungungulu.
2Ku kona ntsena ku hlambanya mawunwa, ni kukhohlisa, ni kudaya, ni wukamba, ni wubhayi; va tira hi tihanyi, ku halatwa nkhata.
3Hikwalaho a tiko ga rila, ni vontlhe va akileko ka gona va hlokiswa zinwe ni zihari za khwati ni tinyanyani ta tilo; ni zona zidluwani za bimbi za lova. Jer. 12:4; Zef. 1:3
4Ngha ku ngavi ni munwe a kanetako, ge hambu loyi a kawukako; hakuva a vanhu va wena vo khwatsi hi lava va kanetisanako ni mupristi.
5U ta khunguvanyeka ni hlikanhi, ni muprofeti i ta wawu na wena ni wusiku; nzi ta lovisa ni nyine wa wena.
6A vanhu va mina va lova hi kota yo vumala wutivi. Hilezi u alako wutivi minawu nzi ta ku ala, kasi u nga have mupristi wa mina. Lezi u riveleko a nayo wa Nungungulu, minawu nzi ta rivala a vanana va wena.
7Laha va nga anza vawa nzi onhela; nzi ta hunzula wudumo gabye giva tingana.
8Vaga a zionho za tiko ga mina, va navela a zigoho za gona.
9Hikwalaho a mupristi i ta humelela hi ndlela yinwe ni vanhu; nzi ta va tsayisa hi kota ya mahanyela yabye, nzi va chachazela a zimaho zabye.
10Vataga, kanilezi va nga ta xura; va ta bhaya kanilezi va nga ta enzeleka, hakuva va tsikile ku ingisa Jehova. Levi 26:26; Hag. 1:8
11A wubhayi, ni vinya, ni byala zi daya a kupima.
12A vanhu va mina va kombela wusungukati ka timhinga tabye, a nhonga yabye yi va tlhatlhambutela; hakuva a moya wa wubhayi wu va pengisile, va bhayile va tsika Nungungulu wabye.
13Va phahlela hehla ka zitsunga, va hisa libani lomu migangeni, ni lahasi ka mikuhlu ni mapoplari ni mikanyi, hakuva a minzhuti ya zona yi nene. Hikwalaho a vanhanyana va nwina va bhaya, ni vakatamwane va nwina va maha wuoswi.
14Nzi nga ta tsayisa a vanhanyana va nwina loku va bhaya, ge hambu a vakatamwane va nwina loku va maha wuoswi, hakuva ni vavanuna va kona va famba hi tlhelo ni zibhayi, va phahlela zinwe ni vavasati vo biha. Lezo a tiko gi nga hiko na kupima giya kuloveni.
15Loku wena Israeli u maha wubhayi, Juda ngha a nga ti kokeli nanzu. Mu ngati le Gilgale, mu ngayi le Betavene, ge hambu ku hlambanya, muku: Ha Jehova a hanyako! Deut. 6:13; 1 Tih. 12:29; Am. 5:5
16Hakuva Israeli i na ni kanu khwatsi i thokazi ka xitlalu; makunu Jehova i ta va risa khwatsi i tiyivana wutshanwini gi anamileko.
17Efraime i ti nyiketele zifananisweni; mu tsikeni.
18Loku va hetile kunwa va ti nyiketela wubhayini; a vafumeli vabye va ranza zilo za tingana.
19A xipupuri xi ta va songela lomu tipapeni ta xona; va tava ni tingana hi kota ya miphahlelo yabye.
Currently Selected:
Hosea 4: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
