Hagai 2
2
A kutiyisetwa ka vaaki.
1Hi hweti ya wuntlhanu ni timbiri, hi siku ga 21 ga hweti, ku lota a mhaka ya Jehova hi nomu wa Hagai a muprofeti, yiku:
2wulawula ka Zerubabeli a nʼwana Xealtieli, a mwamangulu wa le Juda, ni ka Joxua a nʼwana Jehozadaki, a mupristi wa hombe, ni ka misalela ya vanhu, uku;
3Himani a seleko xikari ka nwina, loyi a nga wona a yindlu leyi a wukosini ga yona go ranga ke? Makunu mu yi wonisa kuyini lezi? Kuwoneni ka nwina, leyi a yo khwatsi a hi nchumu ke?
4Hambulezo tiyisa, Zerubabeli, ku wula Jehova; tiyisa na wena Joxua nʼwana Jehozadaki, mupristi wa hombe; tiyisani nwina nwentlhe vanhu va tiko, ku wula Jehova, mu tira, hakuva nzi na nwina, ku wula Jehova wa tiyimpi,
5khwatsi hi xivumelwano xa mina lexi nzi nga maha na nwina laha mu nga huma hi le Gipite, ni Moya wa mina, wu tshamile xikari ka nwina: mu nga chavi!
6Hakuva Jehova wa tiyimpi i ngalo: Ka hi xikhatanyana xitsongwani, nza ha ta tsekatsekisa kanwe a tiko ni misava, ni bimbi ni misava yi womileko. Isa. 14:16; Maheb. 12:26
7Nzi ta tsekatsekisa a matiko wontlhe, ni titshomba tontlhe ta matiko ti ta nehiwa lomu; mina nzi ta tata a yindlu leyi hi wukosi, ku wula Jehova wa tiyimpi.
8A siliva nja mina, ni nzalama nja mina, ku wula Jehova wa tiyimpi.
9A wukosi go gumesa ga yindlu leyi gi tava ga hombe ku hunza leʼgo ranga, ku wula Jehova wa tiyimpi; a ka wutshamu legi nzi ta nyika kurula, ku wula Jehova wa tiyimpi.
A zitsumhiso za makatekwa.
10Hi Siku ga 24 ga hweti ya wuntlhanu ni mune, hi lembe ga wumbiri ga kufuma ka Dariusi, ku lota a mhaka ya Jehova hi nomu wa muprofeti Hagai, yiku:
11Jehova wa tiyimpi i ngalo: Makunu wutisa vapristi xungetano ni nayo, uku:
12Loku a munhu a welela a nyama yo basa hi nguwo yakwe, a wuya a henya a xibaba hi yona nguwo, kutani matsawu, kutani vinya, kutani mafura, ni lihi lixaka la zakuga, zi ta basa ke? A vapristi va lo hlamula, vaku: Ahihi!
13Zonake Hagai aku: Loku a munhu a ti nyenyezisileko hi ku khumba a xirumbi a henya ni xihi xa zilo lezi, xa nyenyeziswa ke? A vapristi vaku: Xa nyenyeziswa. Mitse. 19:11, 16, 22
14Zonake Hagai aku: Zi nghaho ni vanhu lava, zi nghaho ni lixaka leli mahlweni ka mina, ku wula Jehova. Zi nghaho ni mitiro yontlhe ya mandla yabye; ni zontlhe lezi va zi nyikelako lahaya, a zi hlazekangi.
15Makunu nza mu kombela, lezaku mu ehleketa lezaku ku wa mahisa kuyini kusukela nyamutlha kuya nzhako, hi mahlweni na ku nga se vekiwa a ribye ginwe hehla ka ginwani a tempeleni ya Jehova;
16a masikwini lawo loku a munhu ata ka nhulu yi nga, ni 20 wa tipimo ta mavele, i wa kuma 10 ntsena; loku ata muphongolweni wa vinya a ku takha 50 wa tipimo, i wa kuma a 20 ntsena.
17Nzi lo muba hi xikobani, ni kukura, ni maralala, mitirweni yontlhe ya mandla ya nwina; kanilezi a mu tlhelelangi ka mina, ku wula Jehova.
18Nza mu kombela lezaku mu ehleketa kusukela nyamutlha kuya nzhako, kusukela siku ga 24 ga hweti ya wuntlhanu ni mune kala a siku legi a xiseketelo xa yindlu ya Jehova xi nga yimisiwa ha gona, ehleketani lezaku ku wa mahisa kuyini.
19Ya ha hi kona a mbewu lomu gombeni ke? ge hambu a xivina, ni mikuwu, ni sinya ya pomegranada, ni sinya ya maoliva, a zi na nga pswala nchumu. Kanilezi kusukela nyamutlha nzi ta mu katekisa.
20A mhaka ya Jehova yi lota ga wumbiri ka Hagai hi siku ga 24 ga hweti, yiku:
21Byela Zerubabeli a mwamangulu wa le Juda, uku: Nzi ta tsekatsekisa a tilo ni misava.
22Nzi ta khungumula a zitshamu za wuhosi za mifumo, nzi ta fuvisa a ntamu wa mifumo ya vamatiko; nzi ta hangalasa a tikareta ni vakhileli va tona; a mahaxi ni vakhileli va wona va ta dawa munwe ni munwani hi supado ya nakulobye.
23A siku lego, ku wula Jehova wa tiyimpi, nzi ta ku teka wena Zerubabeli, nanza ga mina, nʼwana Xealtieli, ku wula Jehova, nzi ta ku maha kota xifungo; hakuva nzi ku hlawule, ku wula Jehova wa tiyimpi.
Currently Selected:
Hagai 2: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
