Ezekieli 40
40
A tempeli yiswa.
1Hi lembe ga 25 ga wukhumbi ga hina, a kusanguleni ka gona, hi siku ga 10 ga hweti, ku nga hi 14 wa malembe anzhako kakuva a muti wu fuvisilwe, a ka siku lego a canja ga Jehova gi wa hi hehla ka mina, a nzi yisa tikweni ga Israeli. 2 Tih. 25:4; Ezek. 33:21
2Hi miwoniso ya Nungungulu i lo nzi yisa tikweni ga Israeli, a ya nzi yimisa hehla ka xitsunga xo leha, laho ku nga hi xo khwatsi i muti hi tlhelo ga Dzonga.
3I lo nzi yisa lomo, languta, ku wa hi ni munhu loyi a nga woneka kota suku. I wa yimile laha nyangweni na hi ni ngoti ya wukene canjeni gakwe, ni lihlanga lo pima ha lona. Zak. 2:1; Kuv. 21:15
4A munhu loye ite ka mina: Nʼwana wa munhu, Cuwukisisa hi mahlo ya wena, u ti zwela hi tindleve ta wena, u xiyisisa zontlhe lezi nzi ta nga ku kombisa zona; hakuva u tisilwe laha a ku kasi nza ku kombisa zona; u ta tlhatlhambutela ka yindlu ya ka Israeli zontlhe lezi u zi wonako.
5Nzi lo Wona a khurisi gi ranzelekeleko a yindlu. A canjeni ga munhu loye ku wa hi ni lipimo la ntlhanu ni munwe a mikono, a nkono munwe ni munwani wu wa ringana a nkono munwe ni canja. I lo pima a kudziva ka khurisi, ku wa hi lihlanga linwe, ni kutlakuka ka gona ku wa hi lihlanga linwe. 2 Kro. 3:3; Ezek. 43:13
6Zonake i loya nyangweni yi cuwukako Mutsuwuka-gambo, a kanziha hi zikanzihelo za yona; i lo pima a xipimbitsi xa nyangwa, ku wa hi lihlanga linwe a kuanama, ni xinwani xipimbitsi xi wa ku ni lihlanga linwe a kuanama.
7A tsawu ginwe ni ginwani gi wa hi lihlanga linwe kuleha, ni lihlanga linwe kuanama. A tsawu ginwe gi wa tsawukene ni ginwani hi ntlhanu wa mikono. A xipimbitsi xa nyangwa laha ligumbagumbeni leli li cuwukeneko ni yindlu xi wa hi lihlanga linwe.
8I lo pima a ligumbagumba la nyangwa yi cuwukeneko ni yindlu, li wa hi lihlanga linwe.
9Zonake i lo pima a ligumbagumba la nyangwa, li wa hi ntlhanu ni minharu mikono; a timhanze ta lona ti wa hi mikono mimbiri; a ligumbagumba la nyangwa li wa cuwukene ni yindlu.
10A matsawu ya nyangwa ya tlhelo ga Mutsuwuka-gambo ma wa hi manharu seno ni manharu seniya; hi wunharu ga wona ma wa hi lipimo linwe. A timhanze ta tlhelo ga seno ti wa hi ni lipimo linwe ni ta seniya.
11I lo pima a kuanama ka nyangwa, ku wa hi 10 ga mikono; a kuleha ka nyangwa ku wa hi 13 wa mikono.
12Ku wa hi ni xipetso mahlweni ka matsawu, a nkono munwe tlhelo ga seno ni nkono munwe tlhelo ga seniya. A matsawu ya kona ma wa ringana ntlhanu ni munwe mikono a tlhelo ga seno ni ga seniya.
13I lo pima a nyangwa kusukela a langweni la tsawu ginwe kuya ka langwa la ginwani tsawu, a kuma 25 wa mikono a kuanama; a livati li wa komamene ni livati.
14I lo pimela a timhanze kambe, a kuma 60 wa mikono, kusuhani ni nyangwa ku wa hi ni hubye yi nga renzelekela a nyangwa.
15Kusukela le mahlweni ka nyangwa kuya nyangweni ya ligumbagumba la nyangwa ya lomu xikari ku wa hi 50 wa mikono.
16A matsawu ma wa hi ni tinjhanela ti valilweko hi tisimbi, ni lomu timhanzeni ta wona, ma wa ranzele lomu xikari ka nyangwa ni ka ligumbagumba; a tinjhanela ti wa hi matlhelo wontihe hi lomu nzeni; hehla ka mhanze yinwe ni yinwani ku wa hi ni mifananiso ya micinzu.
17Zonake i lo nzi yisa hubyeni a handle ka yindlu, laha ku nga wa hi ni matsawu, ni laha hasi ku wa bambatelwe hi maribye matlhelo wontihe ya hubye, ku wa hi ni 30 wa matsawu na ma xaxametelwe lilonzeni la kona.
18A lilonze li wa hi tlhelweni ga tinyangwa, na li ringana ni tinyangwa hi kuleha, a lilonze leli li wa relele.
19Zonake i lo pima kusukela la mahlweni ka nyangwa ya le nzhelelweni kuya nyangweni ya hubye ya lomu xikari, ku wa hi 100 wa mikono, tlhelo ga Mutsuwuka-gambo gi ringana ni tlhelo ga Nwalungu.
20A nyangwa ya hubye ya lahandle yi cuwukako Nwalungu, i lo pima kuleha ni kuanama ka yona.
21A nyangwa yi wa hi ni matsawu ya varinzeli, manharu tlhelo ga seno ni manharu tlhelo ga seniya. A timhanze ta kona ni ligumbagumba la kona zi wa ringana ni nyangwa yo sangula; a kuleha ka kona ku wa hi 50 wa mikono, a kuanama ku hi 25 wa mikono.
22A lipimo la tinjhanela, ni ligumbagumba, ni micinzu, zi wa fanana ni za nyangwa ya tlhelo ga Mutsuwuka-gambo; va wa enghena ka yona va kanzhiha ntlhanu wa zikanzihelo ni zimbiri, a ligumbagumba li wa cuwukene nazo.
23Ku wa hi ni nyangwa ya hubye ya lomu xikari yi nga cuwukana ni leyi yinwani, ni tinwani le Nwalungu ni le Mutsuwuka-gambo. I lo pima kusukela nyangweni yinwe kuya ka yinwani, ku wa hi 100 wa mikono.
24Zonake i lo nzi yisa Dzongeni, ni laho ku wa hi ni nyangwa. I lo pima timhanze ta kona ni ligumbagumba la kona, zi wa hi ni tipimo to fanana.
25A nyangwa leyo ni ligumbagumba la kona zi wa hi ni tinjhanela matlhelo wontihe to fanana ni ta tinyangwa tinwani. Yi wa hi ni 50 wa mikono a kuleha, ni kuanama ku wa hi 25 wa mikono.
26A ku enghena kona va wa kanziha a ntlhanu ni zimbiri a zikanzihelo, lezi a ligumbagumba li cuwukeneko nazo; ku wa hi ni mifananiso ya micinzu, munwe hi tlhelo ga seno ni munwani hi tlhelo ga seniya, hi lehehla ka timhanze ta kona.
27Ku wa hi ni nyangwa ya hubye ya lomu xikari hi tlhelo ga Dzonga. I lo pima kusukela nyangweni yinwe kuya ka yinwani hi tlhelo ga Dzonga, ku wa hi 100 wa mikono.
28Zonake i lo nzi enghenisa lomu hubyeni ya xikari hi nyangwa ya tlhelo ga Dzonga. I lo pima a nyangwa ya tlhelo lego a kuma tipimo twaleto;
29a matsawu ya kona, ni timhanze, ni ligumbagumba, zi wa hi za tipimo twaleto. A nyangwa ni ligumbagumba la kona zi wa hi ni tinjhanela matlhelo wontihe. A kuleha ku wa hi 50 wa mikono ni kuanama ku wa hi 25 wa mikono.
30A ligumbagumba li wa renzelekela matlhelo wontihe; a kuleha ka lona ku wa hi 25 wa mikono ni kuanama ka lona ku wa hi ntlhanu wa mikono.
31A ligumbagumba la kona li wa gamekene ni hubye ya lahandle, ni mifananiso ya micinzu yi wa hi hehla ka timhanze ta kona. A ku enghena kona u wa kanziha ntlhanu ni zinharu a zikanzihelo.
32I lo nzi yisa ka hubye ya lomu xikari hi tlhelo ga Mutsuwuka-gambo; i lo pima a nyangwa ya kona a kuma tipimo twaleto.
33A matsawu ya kona, ni timhanze, ni ligumbagumba zi wa hi tipimo twaleto. A nyangwa ni ligumbagumba la kona zi wa hi ni tinjhanela matlhelo wontihe; a kuleha ka yona ku wa hi 50 wa mikono ni kuanama ku wa hi 25 wa mikono.
34A ligumbagumba li wa gamekene ni hubye ya lahandle; a mifananiso ya micinzu yi wa hi lehehla la timhanze ta kona, tlhelo ga seno ni ga seniya. A ku enghena kona u wa kanziha ntlhanu wa zikanzihelo ni zinharu.
35I lo nzi yisa ka nyangwa ya tlhelo ga Nwalungu, i lo yi pima a kuma tipimo twaleto.
36A matsawu ya yona, ni timhanze, ni ligumbagumba la yona, ku wa hi ni tinjhanela matlhelo wontihe; a kuleha ka yona ku wa hi 50 wa mikono ni kuanama ku wa hi 25 wa mikono.
37A timhanze ta yona ti wa gamekene ni hubye ya lahandle, a mifananiso ya micinzu yi wa hi hehla ka tona, hi tlhelo ga seno ni ga seniya. A ku enghena kona u wa kanziha ntlhanu wa zikanzihelo ni zinharu.
38Ku wa hi ni tsawu legi a nyangwa ya gona yi nga hi kusuhani ni timhanze ta tinyangwa; laho va nga hlazeki kona a miphahlo ya kuhiswa.
39Lomu ligumbagumbeni la nyangwa ku wa hi ni timeza timbiri, yinwe hi tlhelo ga seno, a yinwani hi tlhelo ga seniya, laha va nga dayela kona a zihari za miphahlo ya kuhiswa, ni minyikelo ya kuonha, ni minyikelo ya zihambunyeto.
40Hi tlhelo ga lahandle, ni ku cuwuka tlhelo ga Nwalungu loku u kanziha kuya nyangweni, ku wa hi ni timeza timbiri, ni ka tlhelo ginwani ga nyangwa ku wa hi ni timesa timbiri.
41Ku wa hi ni mune wa tona tlhelweni ga seno, ni mune wa tona tlhelweni ga seniya; hi lezaku ku wa hi ni ntlhanu wa timeza ni tinharu leti va nga tlhavela ka tona a zihari za minyikelo.
42Ku wa hi ni mune wa timeza ta miphahlo ya kuhiswa, ti nga mahilwe hi maribye yo vatliwa, na ti hi ni nkono munwe ni khihlanya a kuleha, ni kuanama ka tona na ku hi nkono munwe ni khihlanya, a kutlakuka ka tona ku wa hi nkono munwe. Ku wa vekiwa ka tona a zibya lezi va nga tlhavela ha zona a zihari za minyikelo ya kuhiswa ni miphahlo yinwani.
43Ku wa hi ni tiove ti nga hi ni kuanama ka xicanja, ti nga hayekilwe ti renzelekela lomu xikari. A nyama ya miphahlo yi wa vekiwa hehla ka timeza.
44Hi lehandle ka nyangwa ya hubye ya lomu xikari ku wa hi ni matsawu ya vayimbi; a ginwe gi wa hi tlhelweni ga nyangwa ya le Nwalungu, na gi cuwuka tlhelo ga Dzonga, a ginwani gi wa hi tlhelweni ga nyangwa ya tlhelo ga Mutsuwuka-gambo, na gi cuwukile Nwalungu.
45Yena aku ka mina: A tsawu legi gi cuwukako tlhelo ga Dzonga nja vapristi va wumbelweko kuva vahlayisi va yindlu.
46A tsawu legi gi cuwukako tlhelo ga Nwalungu nja vapristi lava va wumbelweko ku hlayisa a alati; lava hi vana va Zadoke, va nga vona a xikari ka vana va ka Levi va tshinelako ka Jehova kasi ku ta mu tirela. 1 Sam. 2:35; 1 Tih. 2:35
47Yena i lo pima a hubye, a kuma a 100 wa mikono a kuleha, ni 100 wa mikono a kuanama; a alati gi wa hi mahlweni ka yindlu.
48Zonake i lo nzi yisa ligumbagumbeni la yindlu, a pima mhanze yinwe ni yinwani ya ligumbagumba, ku wa hi ni ntlhanu wa mikono tlhelweni ga seno ni ntlhanu wa mikono tlhelweni ga seniya. A kuanama ka nyangwa ku wa hi mikono minharu hi tlhelo ga seno ni mikono minharu hi tlhelo ga seniya.
49A kuleha ka ligumbagumba ku wa hi 20 wa mikono, a kuanama ka lona ku wa hi 11 wa mikono. A kuenghena ka lona va wa kanziha hi zikanzihelo. Ku wa hi ni timhinga kusuhani ni timhanze, yinwe hi tlhelo ga seno, a yinwani hi tlhelo ga seniya.
Currently Selected:
Ezekieli 40: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
