Ezekieli 25
25
A xiprofeto ha Amoni, Moabi, Edome ni maFilistia.
1A gezu ga Jehova gi lota ka mina, giku:
2Nʼwana wa munhu, hunzulukela a vana va Amoni, u va profetela,
3uku ka vona; Zwanani a gezu ga Hosi Jehova! Hosi Jehova i ngalo: Lezi u teku ha-ha ka yindlu ya mina yo basa laha yi nga wa nyenyezisilwe; ni ka tiko ga Israeli laha gi nga wa mahilwe marumbi; ni ka yindlu ya ka Juda laha va nga yiswa wukhumbini,
4hikwalaho nzi ta ku nyikela akuva u fumelwa hi vana va Mutsuwuka-gambo, va ta gwimba matenda yabye xikari ka wena, va aka ka wena; va taga mihanzu ya wena, vanwa a masi ya wena.
5Rabba nzi ta mu maha a ranga ga makameli, ni tiko ga vana va Amoni giva a wugovelo ga mitlhambi: Nwina mu ta zi tiva lezaku hi mina Jehova.
6Hakuva Hosi Jehova i ngalo: Kota lezi u nga phakatela a mandla ya wena, u ganyetela hi mikonzo ya wena, a moya wa wena wu bhuma wu hlekula a tiko gaka Israeli;
7hikwalaho nzi ta nawuluta a canja ga mina hehla ka wena, nzi ku nyikela akuva muphango ka matiko; nzi ta ku fuvisa xikari ka vanhu, nzi ku lovisa matikweni; nzi ta ku hetisa, hi kona u ta nga zi tiva lezaku hi mina Jehova.
8Hosi Jehova i ngalo: Kota lezi Moabi na Seire va nge ngalo: Langutani, makunu a yindlu ya ka Juda yi fanana ni matiko wontihe; Isa. 15:1; Am. 2:1
9hikwalaho nzi ta vulula a reve ga Moabi kusukela mitini yakwe leyi yi nga mimbhinganweni yakwe, yi nga wudumo ga tiko, Beth-jeximote, na Baal-meoni, na Kiriataime,
10nzi gi vululela a vana va le Mutsuwuka-gambo kasi ku ya vukela a vana va Amoni; nzi ta gi nyikela kabye, kasi a vana va Amoni va nga ha alakanyiwi xikari ka matiko.
11Nzi ta lamula Moabi, va ta zi tiva lezaku hi mina Jehova.
12Hosi Jehova i ngalo: Kota lezi Edome a ti photeleko ka yindlu ya ka Juda, a ti vuxela zanga hi ku ti photela ha yece hehla kabye, Jer. 49:7; Am. 1:11; Obad. v. 1
13hikwalaho Hosi Jehova i ngalo: Nzi ta nawuluta a canja ga mina hehla ka Edome, nzi hihirita a vanhu ni zifuyo za gona. Nzi ta gi hahlula kusukela Temani, va ta dawa hi supado kala Dedani.
14Nzi ta ti photela ka Edome hi canja ga vanhu va mina va ka Israeli; va ta maha tikweni ga Edome kukotisa a zanga ya mina ni khulo ga mina. Va ta tiva a kuphota ka mina, ku wula Hosi Jehova.
15Hosi Jehova i ngalo: Kota lezi a maFilistia ma ti photeleko, va ti photela hi kutikisa hi kota ya wulala leʼgi nga timbilwini tabye, va xuva ku gi lovisa hi livengo leli li nga gumelwiko; 2 Kro. 28:18; Am. 1:6; Zak. 9:5
16hikwalaho Hosi Jehova i ngalo: Nzi ta nawuluta a canja ga mina hehla ka maFilistia, nzi hihirita a maKerete, nzi lovisa a misalela ya le fungwini wa bimbi.
17Nzi ta ti photela hi kutikisa, nzi va tsayisa hi zanga; va ta zi tiva lezaku hi mina Jehova laha nzi ta nga ti photela hehla kabye.
Currently Selected:
Ezekieli 25: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
