Ezekieli 16

A sati loyi a nga hemba.

1A gezu ga Jehova gi lota ka mina kambe, giku:

2Nʼwana wa munhu, tivisa Jerusalema a manyalataniso yakwe, uku:

3Hosi Jehova i ngalo ka Jerusalema: Hi lixaka la wena ni kupswalwa ka wena, u wa tiko ga Kanani. A raru wa wena i wa hi muAmori ni nyine wa wena i wa lii muHiti.

4A siku lego u nga belekwa ha gona a likava la wena a li tsenwangi, a ku na nga hlaziwa hi mati u basiswa, a ku na nga hondliwa hi munyu, ge hambu ku phutselwa ngubyeni,

5Ku wa nga hi na munhu a nga ku hawukela, a ku mahela ni xinwe xa lezi zilo, a ku zwela wusiwana; kanilezi u lo hoxwa khwatini a siku legi u nga pswaliwa, hakuva u wa nyenyiwa.

6Nzi lo hunza laha u nga hi kona, nzi ku wona na u phorongelene ni nkhata wa wena, nziku ka wena: Hanya nkhateni wa wena! Ina, nzi engeta nziku: Hanya nkhateni wa wena!

7Nzi ku anzisile ku fanana ni byanyi ga khwati; kunene u lo kula u maha wa hombe, u maha lipswitla; a mavele ya wena ma wa tlekula ni misisi ya wena yi lo kula, kanilezi u wa hi ximbyiri u nga ambalangi nchumu.

8Laha nzi nga hunza laha u nga hi koha, nzi lo wona lezaku a xikhati xa Wena xa liranzo xi wa chikele; nzi lo tshambuluta a nkumba wa mina hehla ka wena, nzi fenengeta a wumbyiri ga wena. Ina, nzi lo ku hlambanyela; nzi maha xivumelwano zinwe na wena, zonake u lo maha wa mina, ku wula Hosi Jehova. Gen. 22:16; Rute 3:9; Hos. 2:2

9Nzi lo ku hlambisa hi mati, nzi susa a nkhata mirini wa wena, nzi ku tota hi mafura.

10Nzi lo ku ambexa a nguwo ya mavalavala, nzi ku ambexa a zilato za bhebhe ga calo, nzi ku boha a nguwo ya wukene, nzi ku fenengeta hi seda.

11Nzi lo ku bombisa hi magovo, nzi ku boha zingwavila mawokweni ya wena ni makadiyado nhanweni ya wena.

12Nzi lo veka a phera nhovini ya wena, ni tiphera lomu tindleveni ta wena, ni xidlodlo xo saseka hlokweni ya wena.

13Zinghaho wena u wa bombisilwe hi nzalama ni siliva; a tinguwo ta wena ti wa hi ta wukene go saseka, ni seda ni ta mavalavala; u waga mapa ma nanaselweko ni whlombe ni mafura. U wa hunzeletile ku saseka, u kala u maha muzinza.

14A wudumo ga wumbhuri ga wena gi wa la su gafe xikari ka matiko, hakuva gi wa mbhelele hi kota ya wubombi ga mina legi nzi ku ambexeleko gona, ku wula Hosi Jehova.

15Kanilezi u tsumbile a wumbhuri ga wena, u maha wuoswi hi kota ya wudumo ga wena, u ti nyikela wubhayini ni vontlhe vahunzi lava va nga zi ranza.

16U tekile a tinguwo ta wena u ti mahela ha tona a matshamu ma tlakukileko ma bombisilweko hi mivala ya tixakaxaka, u maha wuoswi hehla ka wona. A zilo zo tano a zi na nga maheka, ge zi nga tava zi mahekile.

17Ni kambe u tekile a wubombi legi nzi nga ku nyika ga nzalama ni siliva u ti mahela ha gona a zifananiso za vavanuna, u bhaya nazo.

18U tekile a tinguwo ta wena ta mavalavala u zi fenengeta ha tona, u nyikela ka zona hi mafura ya mina ni libani la mina.

19A kuga loku nzi ku nyikileko: a mapa ma nanaselweko, ni mafura, ni wulombe, lezi nzi ku gisisileko zona, u zi vekile mahlweni ka zona, ziva masema yo nuhela. Kunene zi wa hi tano, ku wula Hosi Jehova.

20Tlhatakumbiri, u tekile a vafana ni vanhanyana lava u nga nzi belekela, u phahlela ba vona lezaku va giwa ha zona. Kasi a wubhayi ga wena gi wa nga ringani, 2 Tih. 16:3; Jer. 7:31

21ko kala u daya ni vana va mina, u va nyikela va hiswa hi nzilo ka zifananiso ke?

22A ka wontihe manyalataniso ya wena ni wuoswi ga wena a ku alakanyangi a masiku ya wuswa ga wena, laha u nga hi ximbyiri u puluwunza nkhateni wa wena.

23Anzhako ka kubiha ka wena kontlhe (Khombo, khombo ka wena! ku wula Hosi Jehova),

24u ti akele a ziyindlwana, ni ku ti mahela matshamu ma tlakukileko maphangweni wontihe.

25A mahanzakanyeni wontihe u akile matshamu ma tlakukileko, a wumbhuri ga wena u gi nyenyezisa, na u ti nyikela ka vontlhe vahunzi, u enzelekisile a wuoswi ga wena.

26U mahile wuoswi ni vaGipite kambe, a vaakelane va wena va nga ni nyama ya hombe; u vindlusile a zanga ya mina hi kutala ka wuoswi ga wena. Ekso. 32:1; Ezek. 20:7

27Hikwalaho nzi nawulutile a canja ga mina hehla ka wena, nzi hungule a kuga ka wena, nzi ku nyikela kuranzeni ka valala va wena, va nga vanhwana va maFilistia, lava va nga hi ni tingana hi kota ya hanyela ga wena go nyenyeza. Vala. 13:1; 1 Sam. 4:1

28U mahile wubhayi kambe ni maAssiria, hakuva u wa nga se kolwa; ina, u bhayile navo, kanilezi a ku kolwangi. 2 Kro. 28:16

29U enzelekisile a wubhayi ga wena lomu tikweni ga Kanani kala le Kaldea, hambu lezo a ku kolwangi.

30Ku kulisile kuyini a kunavela ka mbilu ya wena, ku wula Hosi Jehova, lezi u mahako zontlhe lezi, wu nga ntiro wa xibhayi xo tshisa;

31hakuva u ti akele a ziyindlwana lomu mahanzakanyeni wontihe, u ti mahela matshamu ma tlakukileko lomu maphangweni wontihe; a ku fananangi ni xibhayi, hakuva wena wa nyenya hakhelo.

32U sati wa xibhayi, loyi a rurelako a vapfumba wutshanwini ga nuna wakwe.

33Zontlhe zibhayi zi nyikiwa zinyikiwo, kanilezi wena u nyika zinyikiwo zigangu za wena; u va xavelele lezaku vata ka wena hi ka matlhelo wontihe ku ta oswana na wena.

34U hambene ni vanwani vavasati hi wuoswi ga wena, hakuva a nga kona a ku telako a ta ku gangisa; kanilezi hi wena u va hakhisako, a wutshanwini ga ku amukela a hakhelo. Hikwalaho u hambene nguvu navo.

35Hikwalaho wena xibhayi, zwana a gezu ga Jehova!

36Hosi Jehova i ngalo: Lezi u ti xakeleko tinganeni ta wena, u funungula a wumbyiri ga wena hi ku maha wuoswi ni zigangu za wena; na hi kota ya zifananiso zontlhe za manyalataniso ya wena, ni nkhata wa vanana va wena lowu u wu nyikeleko zona,

37hikwalaho, nzi ta tsombanyisa a zigangu zontlhe za wena, lezi u nga tsakisana nazo, ni lava u nga va ranza, zinwe ni lava u nga kala ku va ranza; nzi ta va tsombanyisa matlhelo wontihe, nzi va funungulela a wumbyiri ga wena, kasi va fela ku wona gontlhe wumbyiri ga wena.

38Nzi ta ku lamula ku fanana ni lezi va lamulisiwako zona a vavasati lava va tshovako wukati ni lava va halatako a nkhata; nzi ta halata a nkhata wa wena hi zanga ni xiluse. Gen. 9:6; Mitse. 35:31; Joba 8:5

39Nzi ta ku nyikela mandleni yabye, va ta khungumula a ziyindlwana za wena ni matshamu ya wena ma tlakukileko; va ku runzuwulela a tinguwo ta wena, va ku tekela a wubombi ga wena, va ku siya u hi ximbyiri.

40Va ta maha tsombano wa ku ku vukela, va ku gandla hi maribye, va ku pondlisa hi tisupado tabye.

41Va ta hisa tiyindlu ta wena hi nzilo, va ku lamula mahlweni ka vavasati vanyingi. Nzi ta ku maha u tsika a wubhayi ga wena, u nga ta ha nyika hakhelo. 2 Tih. 25:9; 2 Kro. 26:19

42Nzi ta bohlisa a khulo ga mina hehla ka wena, nzi nga ta ha lusa ha wena, nzi ta rutisa nzi nga ha zangari kambe.

43Kota lezi u nga kala ku alakanya a masiku ya wuswa ga wena, kanilezi u nzi zangarisa hi zilo lezi zontlhe, hikwalaho nzi ta tlhelisela a zimaho za wena hehla ka hloko ya wena, ku wula Hosi Jehova. Zonake u nga ta ha maha wubemba legi zinwe ni manyalataniso wontihe ya wena.

44Vontlhe va tshawutelako mavingu kuwulawuleni kabye va ta wula vingu legi ha wena, vaku: A nhwana i fanana ni nyine wakwe.

45Wena u nʼwana wa mamani wa wena, loyi a nga tsika nuna ni vana vakwe; u makabye wa vamakwenu lava va nga tsika vanuna ni vana vabye. A nyine wa wena i wa hi muHiti, a raru wa wena i wa hi muAmori.

46A nhonzwa ya wena ya xisati hi Samaria, loyi a akileko tlhelweni ga wena ga xibhabha zinwe ni vanhanyana vakwe. Ni nzisana ya wena ya xisati loyi a akileko tlhelweni ga wena ga xinene ni vanhanyana vakwe hi Sodoma.

47A ku fambangi tindleleni tabye ntsena, a ku mahangi manyalataniso yabye woce, zi wa nga ku ringanangi; u va hunzile kubiheni mahanyeleni ya wena wontihe.

48Nza hlambanya hi kuhanya ka mina, ku wula Hosi Jehova, a makabye wa wena Sodoma ni vanhanyana vakwe cima ava mahangi lezi u nga maha wena ni vanhanyana va wena.

49A xionho xa makwenu Sodoma, ku wa hi lexi: matshanza, kulonzola zakuga, yena ni vanhanyana vakwe va wa ti rivata; i wa nga zweli a nyakeke ni muvumali. Gen. 13:13

50Va wa ti kulisa, va maha manyalataniso mahlweni ka mina; hikwalaho loku nzi zi wonile nzi lo va susa. Gen. 18:20

51Samaria cima a nga na nga maha a khihlanya ga zionho za wena; kanilezi wena u enzelekisile a manyalataniso ya wena ku hunza vona, u basisile a vamakwenu hi manyalataniso wontihe lawa u ma mahileko. Jer. 3:11; Mat. 12:41; Lu. 11:31

52Wena loyi u nga sola vamakwenu, rwala a tingana ta wena hi kota ya zionho za wena lezi zi nyenyezileko ku hunza zabye, va lulamile ku hunza wena. Ina, kanganyiseka u rwala tingana ta wena, hakuva u basisile a vamakwenu.

53Nzi ta tlhelisa a vakhonwi vabye: a vakhonwi va Sodoma ni vanhwana vakwe, ni vakhonwi va Samaria ni vanhwana vakwe, nzi ta wuyisa ni vakhonwi va wena xikari kabye,

54kasi wa rwala a tingana ta wena wutsumbu, u wiswa tingana hi zontlhe lezi u zi mahileko; lezi zi ta va tangalisa.

55A makwenu Sodoma ni vanhwana vakwe va ta tlhelela xiyinweni xabye xa kale; Samaria ni vanhwana vakwe va ta tlhelela xiyinweni xabye xa kale; wenawu ni vanhwana va wena mu ta tlhelela xiyinweni xa nwina xa kale.

56Hakuva hi siku ga matshanza ya wena a ku kumbukangi Sodoma hi nomu wa wena,

57hi mahlweni a kubiha ka wena na ku nga se tibyiwa, laha u nga hlekiwa hi vanhwana va le Siria, ni vontlhe lava va ku ranzeleko, a vanhwana va maFilistia lava va nga ku tseketsela matlhelo wontihe. 2 Tih. 15:37; 2 Kro. 28:18

58Makunu u rwala a wubemba ga wena ni manyalataniso ya wena, ku wula Jehova.

59Hakuva Hosi Jehova i ngalo: Nzi ta ku tlhelisela kota mitiro ya wena, hakuva u kanyisile a xifungo u tshova a xivumelwano.

60Ahembalokoke, nzi ta alakanya a xivumelwano xa mina lexi nzi nga maha na wena a masikwini ya wuswa ga wena; nzi ta maha na wena a xivumelwano xa pinzukelwa.

61Zonake u ta alakanya a mahanyela ya wena, uva ni tingana, laha u ta nga amukela a vamakwenu va ti-nhonzwa ni va tinzisana; hakuva nzi ta va nyikela ka wena a kuva vanhwana va wena, kanilezi na ku nga hi kota ya xivumelwano xa wena.

62Nzi ta tiyisa a xivumelwano xa mina na wena, zonake u ta zi tiva lezaku hi mina Jehova,

63kasi u fela ku khumbula, uva ni tingana, u nga ha vululi a nomu wa wena hi kota ya tingana ta wena, laha nzi ta ngava nzi ku tsetselele zontlhe lezi u zi mahileko, ku wula Hosi Jehova.

Currently Selected:

Ezekieli 16: TSC72

Highlight

Copy

Compare