Ezekieli 13
13
A vaprofeti va mawunwa.
1A gezu ga Jehova gi lota ka mina, giku:
2Nʼwana wa munhu, profeta hi vaprofeti va ka Israeli lava va profetako, u wula ka vona lavo va profetako hi kuranza ka timbilu tabye, uku: Zwanani a gezu ga Jehova!
3Hosi Jehova i ngalo: Khombo ka vaprofeti va zipumbu, va lanzelako a moya wabye wutsumbu, va nga woni nchumu!
4Israeli, a vaprofeti va wena va fanana ni tihlati lomu xikari ka marumbi.
5A mu yangi laha a ligingisi li nga bhoxiwa kona, a mu bhiyelangi a yindlu ya ka Israeli hi lihlavu kasi ya tiya kulweni hi siku ga Jehova.
6A miwoniso yabye nja hava, va vumba mawunwa, lavo va nge ngalo: Ku wula Jehova. Jehova a nga va rumangi, kanilezi va tsumba lezaku a gezu gabye gi ta tatiseka.
7A hi miwoniso ya hava mu yi wonileko ke? A mu vumbangi mawunwa ke, laha mu nge ngalo: Ku wula Jehova, kasi mina a nzi wulangi nchumu?
8Hikwalaho Hosi Jehova i ngalo: Kota lezi mu wulawulako za hava, mu hemba mawunwa hi miwoniso ya nwina, mina nzi ta mu vukela, ku wula Hosi Jehova.
9A canja ga: mina gi ta vukela a vaprofeti lava va wonako miwoniso ya hava, ni lava va vumbako mawunwa. Va nga ta hlayiwa hubyeni ya vanhu va mina, va nga ta tsaliwa bhukwini ga yindlu ya ka Israeli, ge hambu ku enghena tikweni ga ka Israeli; zonake mu ta zi tiva lezaku hi mina Hosi Jehova.
10Kota lezi va nga hambukisa a vanhu va mina, vaku: A kurula! na ku nge hi kona kurula; ni loku vanhu va aka khurisi vona vaprofeti va gi tshula hi mhemba; Jer. 6:14; Mika 3:5
11hikwalaho u ta byela lava va gi tshulako hi mhemba lezaku gi tawa. Ku tana a vula ya hombe, na nwina maralala ya hombe mu tawa; ni xingulu xi ta gi khungumula.
12Loku a khurisi gi wile, xana va nga ta wula ka nwina, vaku: A kutshula ka nwina ku vunile yini ke?
13Hikwalaho Hosi Jehova i ngalo: Nzi ta vuxa a xingulu zangeni ya mina, hi kota ya khulo ga mina ku tana a vula ya hombe, ni maralala ya hombe zangeni ya mina, kasi ku gi hetisa.
14Lezo nzi ta khungumula a khurisi legi mu nga gi tshula hi mhemba, nzi gi wisa lahasi, kasi ku woneka ni xiseketelo xa gona; loku giwa nwina mu ta dawa xikari ka gona. Zonake mu ta zi tiva lezaku hi mina Jehova.
15Nzi ta chulula a zanga ya mina hehla ka khurisi ni hehla ka lava va nga gi tshula. Nzi taku ka nwina: A khurisi a ga ha hi kona, ge hambu lava va nga gi tshula;
16va nga vona vaprofeti va ka Israeli, lava va profetako hi Jerusalema, va wona miwoniso ya kurula, kasi lezo a ku na kurula, ku wula Hosi Jehova.
17Wena nʼwana wa munhu, cuwuka a vanhwana va tiko ga wena, lava va profetako hi kuranza ka timbilu tabye, profeta ha vona, uku:
18Hosi Jehova i ngalo: Khombo ka vavasati lava va rungelako a zitshikelo lomu ka magunyungu ya mawoko, va mahako tilesu to ringana tihloko ta tixakaxaka, kasi ku hlota mihefemulo! Xana mu ta hlota mihefemulo ya vanhu va mina, mu wuya mu ponisa ya nwina wutsumbu ke?
19Mu nzi nyenyezisile xikari ka vanhu va mina hi kota ya macanja ya mavele, ni zipanzana za xibaba, na mu daya a mihefemulo leyi yi nga faneliko kufa, mu ponisa a mihefemulo leyi yi nga faneliko ku hanya, na mu kari mu hemba ka vanhu va mina lava va ingisako mawunwa.
20Hikwalaho Hosi Jehova i ngalo: Langutani, nza vukela a zitshikelo za nwina lezi mu hlotako ha zona a mihefemulo kota tinyanyani, nzi ta zi wutla zi suka mawokweni ya nwina; nzi tlhatlhisa a mihefemulo leyi mu yi hlotako kota tinyanyani.
21Ni tilesu ta nwina nzi ta ti hanzula, nzi tlhatlhisa vanhu va mina canjeni ga nwina, va nga ha tava canjeni ga nwina kukotisa pfimba; mu ta zi tiva lezaku hi mina Jehova.
22Kota lezi mu xanisileko a mbilu ya loyi wo lulama hi mawunwa ya nwina, loyi mina nzi nga mu xanisangiko, na mu tiyisa a mandla ya loyi wo biha, kasi a nga hunzuluki ndleleni yakwe ya kubiha, a hanyiswa,
23hikwalaho mu nga ta ha wona miwoniso ya hava, hambu ni ku vumba. Nzi ta tlhatlhisa a vanhu va mina canjeni ga nwina; mu ta zi tiva lezaku hi mina Jehova.
Currently Selected:
Ezekieli 13: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
