Eksodusi 39
39
A kumahiwa ka tinguwo ta wupristi.
1Va lo luka tinguwo hi tihinza ta wukuxe, ni to zirila, ni to pswhuka, kasi ku khozela ha tona lomu ndlwini ya kubasa; va mahile tinguwo leto to basa ta Aroni, khwatsi hilezi Jehova a leleteleko Mosi.
2Va lo maha efode hi nzalama, ni za wukuxe, ni zo zirila, zi zo pswhuka, ni wukene go saseka gi khatilweko.
3Va lo tlomba nzalama, kasi ku maha ha yona a wusengago lukela ni za wukuxe, ni zo zirila, ni zo pswhuka, ni wukene, zi mahiwa hi wutlhari.
4Va lo maha a tingubyana timbiri ta efode, leti ti vekelwako laha makatleni; leti yi tlhanganyiswako ha tona le magumo ka yona.
5A bhandi ga yona legi gi bohiwako hehla ka yona, gi wa hi ga lixaka la yona, gi wa lukelwe nayo hi nzalama, ni za wukuxe, ni zo zirila, ni zo pswhuka, ni wukene go saseka, gi lukilweko khwatsi hilezi Jehova a leleteleko Mosi.
6Zonake va lo teka maribye ya onikisi va ma nameketa hi zitiyiso za nzalama, va tsala ka wona a mavito ya vanana va ka Israeli hi ku kehlela khwatsi hilezi va tsalisako zona lomu ka maribye.
7Zonake va lo ma mahela laha makatleni ya efode, kasi ma maha maribye ya xialakanyiso ka vanana va ka Israeli, khwatsi hilezi Jehova a leleteleko Mosi.
8Va lo maha a ngenge hi wutlhari, khwatsi hilezi yi nga mahiswa zona a efode; va lo maha hi nzalama, ni za wukuxe, ni zo zirila, ni zo pswhuka, ni wukene go saseka gi khatilweko.
9Yi wa hi ni mune wa matlhelo ma ringanako, va yi maha yi petsiwa; a kuleha ka yona ku wa ringana ni kuleha ka canja ginwe, ni kuanama ka yona ku wa hi canja ginwe loku yi petsilwe.
10Va lo yi nameketa a mune wa tixaxa ta maribye; ka lixaxa lo ranga ku wa hi sardoni, ni topazi, ni karbunkele
11a ka lixaxa la wumbiri; emeralda, ni safire, ni daimani;
12a lixaxa la wunharu: jakinte, ni agata, ni ametista;
13a lixaxa la wumune: krisolite, ni onikisi, ni jasperi. A maribye lawa ma wa nameketilwe lomu matshanwini ya wona hi nzalama.
14A maribye lawa ya 12 ma wa mehelwe hi kulanzelana ka mavito ya vanana va ka Israeli; a ginwe ni ginwani gi wa tsalilwe a vito ga lixaka linwe; na ma tsalilwe hi ku kehlela khwatsi hilezi ku tsaliswako zona a phera ya xifungo.
15Laha ka ngenge ya laha xifuveni va lo lungelela a tiketani ta nzalama yo saseka, ti swulilweko khwatsi i ngoti.
16Va lo maha ni zihareketo zimbiri, ni zingwavila magumesweni mambiri ya ngenge ya laha xifuveni.
17Zonake va khweketa tiketani leti ta timbiri lomu ka zingwavila lezi za zimbiri za le magumo ya ngenge ya laha xifuveni.
18Va khweketa lomu magunweni mambiri ya tiketani lomu ka zihareketo zimbiri, ziva le makatleni ya efode, hi tlhelo ga le mahlweni.
19Va maha ni zinwani zingwavila za zimbiri hi nzalama, va zi veka magunweni mambiri ya ngenge ya laha xifuveni, kusuhani ni nzhungo hi tlhelo ga efode hi lomu nzeni.
20Va lo maha zingwavila zimbiri za nzalama, va zi veka matlhelweni mambiri ya makatla ya efode hi lahasi, hi tlhelo ga lahandle, kusuhani ni laha yi tlhanganyisilweko ha kona ka bhandi ga efode.
21Zonake va lo boha ngenge laha xifuveni hi zingwavila za yona hi lomu ka zingwavila za efode, va boha hi ngoti ya wukuxe, kasi ziva hehla ka bhandi ga efode, kasi a ngenge ya laha xifuveni yi nga tlhatlheki laha ka efode, khwatsi hilezi Jehova a leleteleko Mosi.
22Va lo maha ni nguwo ya efode, yi lukiwa yontlhe hi tihinza ta wukuxe;
23a nguwo leyi yi wa bhoxilwe laha xikari ka yona, laha ku engheniswako a hloko ha kona, khwatsi hi xikatawu xa xiketse; na yi komelwe yi renzelekelwe kontlhe kasi yi nga hanzuki.
24Zonake va lorungela lahasi ka nguwo a mapomegranada ya wukuxe, ni kuzirila, ni kupswhuka; ni tihinza ta wukene,
25Va lo maha a vanyangende hi nzalama yi basileko, zonake va va mehela laha xikari ka mapomegranada hi lahasi ka nguwo hi kurenzelekela kontlhe.
26A nyangende ni pomegranada, a nyangende ni pomegranada, hi le magumo ka nguwo hi ku renzelekela kontlhe, kota lezi Jehova a leleteleko Mosi.
27Zonake va lo luka a tinguwo ta Aroni ni ta vana vakwe, a tinguwo ti lukilweko hi wukene go saseka.
28Ni xihuku xa wukene go saseka, ni zihuku za wumbhuri za wukene, ni mabhuluku ya wukene go saseka gi khatilweko;
29ni bhandi ga wukene legi gi khatilweko, ni wukuxe, ni kuzirila, ni kupswhuka, zi lukilwe hi wutlhari, kota lezi Jehova a nga leletela Mosi.
30Va lo maha a mubhodi wa xidlodlo xa kubasa hi nzalama yi basileko, zonake va tsala hehla ka xona hi ndlela leyi va kehlako ha yona lomu ka phera, va tsala timhaka leti: Ku basiselwe Jehova.
31Va mehela ka xona a ngotana ya wukuxe, kasi ku boha hehla ka xihuku, kota lezi Jehova a leleteleko Mosi.
32Zinghaho va lo mbhetisa lezo wontihe ntiro wa yindlu leyi va nge ngalo i tenda ga mutlhangano. A vanana va ka Israeli va lo maha zontlhe kota lezi Jehova a leleteleko Mosi.
33Va lo neha a tabernakeli ka Mosi, a tenda ni zibya zontlhe za gona, ni zihareketo za gona, ni tibakwa ta gona, ni tivalelo ta kona, ni timhanze ta kona, ni zikhato za kona:
34ni xifulelo xa mabhebhe ya tiyivu laya ma totilweko hi tinta yo pswhuka ni xifulelo xa mabhebhe ya macalot ni xisirelo xa nyangwa;
35ni nghaxa ya xivumelwano ni mipingo ya kona, ni xitshamu xa wuxinji;
36ni meza ni zontlhe zibya za yona, ni zibaba za xikombiso;
37ni meza ya nzalama ya tikandiya, ni tikandiya ta kona, ni zontlhe zibya za kona, ni mafura ya tikandiya;
38ni alati ga nzalama, ni mafura ya kutota, ni libani lo nuhela, ni xisirelo xa nyangwa ya Tenda;
39ni alati ga suku, ni xitlhata xa kona xa suku, ni mipingo ya gona, ni zontlhe zibya za gona;
40ni xinamelo ni xikhatelo xa kona, ni tinguwo ta hubye, ni timhanze ta kona, ni zikhato za tona, ni xisirelo xa nyangwa ya hubye, ni tingoti ta kona, ni timhingu ta kona, ni zontlhe zibya za ntiro wa yindlu ya tenda ga mutlhangano.
41Va lo neha ni tinguwo ta ku khozela ha tona lomu ntirweni wa yindlu ya kubasa, ni tinguwo ta kubasa ta mupristi Aroni, ni tinguwo ta vana vakwe, kasi va tira ha tona wupristi.
42Ni vanana va ka Israeli va lo maha a ntiro wontihe kota lezi Jehova a leleteleko Mosi.
43Mosi i lo cuwuka wontihe ntiro, languta,, va wa mahile khwatsi hilezi Jehova a nga leletelisa zona, va wa mahile zalezo. Zonake Mosi i lo va katekisa.
Currently Selected:
Eksodusi 39: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
