Deuteronome 15
15
1A lembe ga wuntlhanu ni mambiri gi tava lembe go tlhatlheka. Ekso. 23:10; Levi 25:3
2A tirela ga lembe go tlhatlheka hi legi: Vontlhe lava va pembisileko ka vamakabye vabye, va ta va tlhatlhisa ka milanzu leyo. Cima va nga ta va lonza kambe, hakuva kutlhatlhisa ku bikilwe hi vito ga Jehova; hikwalaho u nga ha mu lonzi kambe muakelane wa wena ni makabye wa wena.
3Wa zi kota ku lonza wamatiko, kanilezi lezi zi pembilweko hi makabye wa wena u ta zi tlhatlhisa.
4Na zona ku nga ta kuva ni xisiwana ka va ka nwina, hakuva Jehova i ta ku katekisa hi zinene a tikweni legi Jehova Nungungulu wa wena a ku nyikileko ku ya gi fumela, ni kuva tshomba ya wena;
5loku wa nga ingisa a gezu ga Jehova Nungungulu wa wena, u chela kota hi ku maha yontlhe milayo leyi nzi ku leletelako yona inyamutlha.
6Jehova Nungungulu wa wena i ta ku katekisa kota lezi a ku tsumbisileko; wena u ta pemba mali ka matiko ya ku tala, kanilezi wena cima u nga ta pembiwa nchumu; wena u ta fumela matiko ya ku tala, kanilezi wona ma nga ta ku fumela.
7Loku ku ngha ku hi kona a munwe wa vamakabye va wena a vumalako ka wunwani muti wa wena ka tiko legi Jehova Nungungulu wa wena a ku nyikileko, u nga nonohisi a mbilu ya wena, hambu ni ku vala a canja ga wena ka makabye wa wena a vumalako,
8kanilezi u ta tshambuluta a canja ga wena, u mu cenekisa lezi zi mu ringanako ka zontlhe lezi a zi vumalako. Mat. 5:42; Lu. 6:34
9Ti wonele lezaku lomu mbilwini ya wena ku ngave na maalakanyo ya kubiha, u sangula ku ngalo: A lembe ga wu 7, a lembe ga kutlhatlhisa gi tshinele, zonake u sangula ku wona makabye wa wena hi tihlo ga kubiha, u nga ha mu nyiki nchumu; tivake lezaku yena wa rila ha wena ka Jehova, na wena u ta kuma nanzu.
10Mu nyike hi matsenya, ni loku u mu nyikile, a mbilu ya wena yi nga kanakani; hakuva hi kota ya lezo u mahileko, Jehova Nungungulu wa wena i ta ku katekisa ka yontlhe mitiro ya wena ni ka zontlhe lezi u zi mahako. 2 Kor. 9:7
11Hakuva a xisiwana cima xi nga ta vumaleka lomu tikweni; hikwalaho nzi ku nyika lowu nayo inyamutlha, nziku: U ta vulula a canja ga wena lomu tikweni ka makabye wa wena wa xisiwana, ni muvumali loyi a nga lomu tikweni ga wena. Mat. 26:11; Joh. 12:6
12Loku makabye wa wena wa xinuna kutani wa xisati xikari ka vaHeberu a ti xavisile ka wena, yena i ta ku tirela ntlhanu wa malembe ni ginwe; zonake hi lembe ga wu 7 u ta mu tsika a huma lomu ndlwini ka wena, hakuva i tlhatlhekile.
13Ni loku a huma ka wena na u mu tlhatlhile, u nga mu fambisi kabye na a nga welelangi nchumu.
14U ta mu nyika xinwani xilo xa lomu ka zifuyo za wena lezi za zitsongwani ni za le ka nzhimbo wa wena wa kuhula, ni za le xigowolweni xa wena, u pambula ka lezi Jehova Nungungulu wa wena a ku katekisileko ha zona, u mu nyika.
15U ta alakanya lezaku na wenawu u wa hi khumbi le Gipite; ni lezaku Jehova Nungungulu wa wena i ku tlhatlhisile; hi kota ya lezo nza ku nyika lowu nayo inyamutlha.
16Ni loku a nanza ga wena gi ku ngalo ka wena: Mina nzi nga ta huma laha ka wena, hi kota ya kuva a ku ranzako wena ni ngango wa wena, hilezi i tshamekile khwatsi laho ka wena,
17zonake u ta teka litlhawo u bhoxa a ndleve yakwe laha nyangweni; zonake i ta kuva nanza ga wena kala kupinzuka; u ta maha zalezo kambe ka nanza ga wena ga xisati.
18Ngha xi nga mahi a xilo xo binza ka wena hi ku mu tsika a huma ka wena na a tlhatlhekile, hakuva i ku tirele ntlhanu wa malembe ni ginwe, i ku bhinzulela hi zitiri zimbiri; na Jehova Nungungulu wa wena i ta ku katekisa ka zontlhe lezi u ta nga zi maha.
19Wontihe matewula ya xinuna ya zifuyo lezi za hombe ni lezi za zitsongwani, u ta ma basisela Jehova Nungungulu wa wena. U nga dzuki u tirisa matewula ya zifuyo za wena lezi za hombe hambu ni ku kaya matewula ya zifuyo za wena lezi za zitsongwani. Ekso. 13:2; Mitse. 3:13
20Wena u ta yaga wona zinwe ni ngango wa wena lembe ni lembe mahlweni ka Jehova Nungungulu wa wena ka wutshamu lego Jehova a ta nga gi hlawula.
21Ni loku a xifuyo xi lamele, kutani na xi khwita, kutani na xi file mahlo, kutani na xi ni wulema ginwani ga hombe, u nga xi nyikeli ka Jehova Nungungulu wa wena laha maganzelweni. Mal. 1:8, 13
22A zo maha lezo u taga laha ngangweni wa wena; loyi a nga hlazekangiko ni loyi a hlazekileko va taga vontlhe khwatsi hi loku na vaga a mhuti ni hlangu.
23Ntsena lezaku u ngagi a nkhata wa zona; u ta wu halata lahasi kota mati.
Currently Selected:
Deuteronome 15: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
