Deuteronome 13
13
1Loku ku vumbuluka muprofeti kutani mulori ka nwina, a vumba ni ku kombisa zihlamaliso ni zirewukiso,
2ni loku ku humelela a xikombiso ni xihlamaliso lexi a xi wulileko, aku ngalo: A hi lanzeleni vanwani vanungungulu lava u nga va tiviko, hi va khozela:
3u nga ingisi timhaka ta muprofeti loye ni mulori loye, hakuva Jehova Nungungulu wa nwina hi yena a mu ringako, kasi ku tiva lezaku xana ma ranza Jehova Nungungulu wa nwina hi timbilu tontlhe ta nwina ni mihefemulo yontlhe ya nwina.
4Nwina mu ta lanzela Jehova Nungungulu wa nwina; mu nyika xichawo ka yena mu hlayisa milayo yakwe, mu ingisa a gezu gakwe; mu mu khozela, ni ku namarela ka yena.
5A muprofeti loye, kutani mulori loye, i ta dawa; hakuva i kucetele vanhu ku hluwuka ka Jehova Nungungulu wa nwina, loyi a mu humesileko tikweni ga le Gipite, a mu tlhatlhisa ndlwini ya wukhumbi; a lava ku mu hambukisa ndleleni ya Jehova Nungungulu wa nwina, leyi a mu leleteleko ku famba ha yona. Hikwalaho mu ta susa lezi zo biha xikari ka nwina.
6Loku makabye wa wena, loyi a nga nʼwana wa mamani wa wena, kutani i nʼwana wa wena wa mufana, kutani i nhanyana wa wena, kutani i sati wa mbilu ya wena, kutani i nakuloni loyi u mu ranzako hi mbilu yontlhe ya wena, a ku kucetela hi le xihundleni, aku: A hi fambe hi ya khozela vanwani vanungungulu lava wena ni vararu va wena mu nga va tivangiko,
7a vanungungulu va vanhu lava va mu ranzeleko, lava va nga kusuhani na nwina hambu lava va nga kule na nwina, kusukela magemetamusi ya misava kala manwani magemetamusi,
8u nga vumeli, hambu ni ku mu ingisa, ni kambe u nga mu tsetsi hambu ni ku mu zwela wusiwana, hambu ni ku mu fihla.
9Kanilezi u ta mu daya futsi; ni canja ga wena gi ta sangula ku mu gandla, zonake mawoko ya vontlhe vanhu va ta lanzela.
10U ta mu gandla hi maribye kala afa; hakuva yena i wa lava ku ku kokela kule na Jehova Nungungulu wa wena, loyi a ku humesileko tikweni ga le Gipite, ni le ndlwini ya wukhumbi.
11Vontlhe va ka Israeli va ta zizwa, va chava, kasi va nga ha engeti kambe va maha zo biha zo kota lezo xikari ka nwina.
12Loku uzwa timhaka ta wunwe wa miti leyi Jehova Nungungulu wa wena a ku nyikileko ku aka ka yona, taku ngalo:
13A tlawa wo kari wa vanhu va hava wu humile lomu xikari ka nwina, va hambukisile a vanhu va muti wabye, vaku: A hi fambeni hi ya khozela vanwani vanungungulu lava mu nga va tiviko;
14u ta hlolisisa mhaka leyo, u wutisisa khwatsi. Ni loku zi hi zinene, na zi tiyile lezaku a kubiha loko ku mahilwe xikari ka wena;
15zonake u ta daya vontlhe vanhu va muti lowo, u wu hahlula ni zontlhe lezi zi nga ka wona, u daya ni zifuyo zabye hi tlhari.
16U ta tsombanyisa yontlhe a tshomba ya muti lowo laha phangweni ga muti, zonake u hisa zontlhe hi kota ya Jehova Nungungulu wa wena, a muti ni yontlhe a tshomba ya wona, ku tava rumbi laho; ku nga ha akiwi kambe.
17Ku nga namarelani xilo xinwe xa lezo zo yila mandleni ya wena; kasi Jehova a fela ku bohla zangeni yakwe, a ku zwela wusiwana, a ku mahela wuxinji, zonake a ku enzelekisa khwatsi hi lezi a hlambanyileko ka vararu va wena,
18laha u ta nga ingisa a gezu ga Jehova Nungungulu wa wena, u hlayisa yontlhe milayo yakwe leyi nzi ku leletelako inyamutlha, u maha kululama mahlweni ka Jehova Nungungulu wa wena.
Currently Selected:
Deuteronome 13: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
