Mitiro 14
14
Paule na Barnabasi va gonzisa le Ikoniume, ni Listra, ni Derbe.
1Le Ikoniume, Paule na Barnabasi va lo enghena zinwe sinagogeni ga vaJuda va kanela, laha ka kuva ku kholwa a xidlemo xa hombe xa vaJuda ni vaGreki.
2Kanilezi a vaJuda lava va nga kala ku kholwa va lo vindlukisa a vamatiko, lezaku a timbilu tabye ti zangarela a vamakabye.
3Ahemba-lezoke a vapostoli va lo tshama kona a xikhati xa hombe, va kanela hi kutiya hi Hosi; leyi yi nga kustumunyela a mhaka ya yona ya tipswalo hi ziwoniso ni zirewukiso zi nga mahiwa hi vona. Mar. 16:20; Rom. 15:19; Maheb. 2:4
4Kanilezi a vanhu va muti va lo hambana, a vanwani va yimela a vaJuda ni vanwani va yimela vapostoli.
5Laha na ku mahilwe a gujeguje hi vamatiko ni vaJuda zinwe ni varangeli vabye, go va khoma hi kubiha ni ku va gandla hi maribye, 2 Tim. 3:11; 1 Tes. 2:14-16
6va lo zi tiva, va chavela mitini ya le Likaonia, ni le Listra, ni Derbe, ni le tikweni ga kona;
7va ya kanela ivangeli kona.
8Le Listra ku wa hi kona a munhu loyi a nga lamele milenge hi le rumbyini ga nyine wakwe, yena cima a nga fambangi.
9Yena i lozwa Paule na a kanela; Paule na a mu cuwukisisa, a wona lezaku i na ni kukholwa ka ku hanyiswa,
10aku ngalo hi gezu ga hombe: Suka u yima hi milenge ya wena uku pswhe! I lo tlula a famba. Isa. 35:6
11Laha a zidlemo zi nga wona lezi zi mahilweko hi Paule, zi lo tlakusa gezu ga zona hi lirimi la xi Likaonia, ziku: A vanungungulu va relele ka hina na va hi ni madzumba ya vanhu. Xip. 8:10; 28:6
12Va lo chula Barnabasi vaku hi Jupiteri; Paule vaku hi Merkure, hakuva hi yena a nga hi muwulawuli wa kona.
13Zonake a mupristi wa tempeli ya Jupiteri, leyi yi nga mahlweni ka muti, i lo neha tinkavi ni tisimbo ta zitsangi le tinyangweni, na a lava ku va tlhavela mhamba zinwe ni xidlemo.
14Kanilezi laha vapostoli, Barnabasi na Paule, va nga wa zizwa, va lo hanzula tinguwo tabye, va tsutsumela xidlenwini, va kanyuluka,
15vaku: Madota, Hiyini mu mahako lezi zilo? Hinawu hi vanhu va tshamela ginwe na nwina, hi mu nehela a ivangeli, lezaku kasi ma fela ku tsika lezi zi nga nyawuliko, muta ka Nungungulu loyi a hanyako, loyi a nga maha tilo ni misava ni bimbi, ni zontlhe lezi zi nga ka zona; Jak. 5:17; 1 Sam. 12:21; 1 Tes. 1:9
16loyi hi zizukulwana zi hunzileko a nga tsika matiko wontihe lezaku ma famba tindleleni ta wona.
17Hambu lezo a nga vumalangi Wukustumunyu ka wona, hakuva i lo maha kusaseka, a mu nyika vula hi le tilweni ni tinguva ta mihanzu, a mu anzisela zakuga, a tatisa timbilu ta nwina hi kutsaka. Deut. 11:14; Levi 26:4; Mat. 5:45
18Hambu lezi va nga wula lezo, kutsongwani va wa lava ku tsanzeka ku tsimbeta a zidlemo lezaku zi nga va phahleli.
19Kanilezi ku lo chikela a vaJuda na vata hi le Antiokia ni le Ikoniume, va hlohlotela a zidlemo, va gandla Paule hi maribye, va mu rorovisela le handle ka muti, na va alakanya lezaku i file. Xip. 13:45; 2 Kor. 11:25
20Kanilezi laha a vapizani va nga yimile va mu ranzela, i lo vuka a enghena mutini; hi manziko wa kona i lo suka aya Derbe zinwe na Barnabasi.
Vapostoli va tlhelela Antiokia.
21Laha va nga wa kanele a ivangeli mutini lowo, va maha vapizani vo tala, va lo tlhelela Listra, ni le Ikoniume, ni le Antiokia,
22na va tiyisa a mihefemulo ya vapizani, va va khongotela ku tiyiseta kukholweni, vaku hi yimelwe hi ku enghena mufunweni wa Nungungulu hi zikarato zo tala. Xip. 11:23; Mat. 10:38; Rom. 8:17
23Laha na va va hlawulele a masingalakati mabandleni wontihe, hi kukhongela ni kuyila, va lo va nyikela Hosini, leyi va nga kholwa ka yona. Tit. 1:5
24Zonake va lo tsemakanya Pisidia, vaya Pamfilia.
25Laha va nga kanele a mhaka le Perga, va lo relela vaya Atalia;
26ku suka hi laho va loya Antiokia hi taru, ku nga laha va nga nyikelwe kona tipswalweni ta Nungungulu a kuya ntirweni lowu va wu hetileko.
27Laha va nga wa chikele, va lo tsombanyisa a handla, va hlawutela zontlhe lezi Nungungulu a zi mahileko ha vona, ni lezaku i vululele a vamatiko a nyangwa ya kukholwa. Xip. 15:4, 12; 1 Kor. 16:9
28Zonake va lo tshama laho a xikhati xo leha zinwe ni vapizani.
Currently Selected:
Mitiro 14: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
