2 Samueli 14
14
1Makunu Joabe nʼwana Zeruia i lo wona lezaku a mbilu ya hosi yi khumbula Absalome.
2I lo ruma a vanhu vaya Tekoa va ya vitana a xitlhatlha xa wasati, a taku kakwe: Ti mahisa uku khwatsi u muhlaluki, u ambala tinguwo ta xirilo; u nga toli mafura, kanilezi u ti mahisa ku khwatsi u wasati loyi xi nga xikhati xo leha na u kari u hlaluka.
3U ta enghena ka hosi, u wulawula a timhaka leti nzi ku leletelako. Zonake Joabe i lo mu byela timhaka ta kona.
4A wasati loye wa le Tekoa, i lo wulawula ka hosi, awa lahasi hi nghohe yakwe a kombisa xichavo, aku: Nzi hlangute wena hosi!
5A hosi yi te ngalo kakwe: Mahungu muni? Xini xi ku karatako? Yena aku: Hakunene mina nzi noni, a nuna wa mina i file.
6A nanza ga wena ga xisati gi wa hi ni vafana vambiri. Makunu va lo holova le handle na ku nga hi na munhu wa ku va lamula; hikwalaho a munwe i lo lamata munwani a mu daya.
7Makunu wontihe maxaka ya mina ma vukela a nanza ga wena, maku: Hi nyike loyi a nga daya nakulobye hi mu daya, hi photela wutomi ga nakulobye loyi a mu deleko, hi hetisawu a xiga-tshomba lexo. Makunu va lava a ku tima a khala ga mina legi gi seleko, va fuvisa a vito ga nuna wa mina laha misaveni! Deut. 19:11
8A hosi yi te ngalo ka wasati: Famba kaya ka wena, nzi ta leletela hi mhaka ya wena.
9A wasati wa le Tekoa i te ngalo ka hosi: Wena hosi yanga, ngha a nanzu wu hi hehla ka mina ni yindlu ya dadani, kanilezi a hosi ni xitshamu xakwe xa wukosi ngha a nga hi na nanzu.
10A hosi yi te ngalo kakwe: Mu nehe laha ka mina loyi a ta nga wula mhaka leyo, kasi a fela ku kala a nga ha engeti a ku karata.
11A wasati aku: Ngha a hosi yi alakanya Jehova Nungungulu wa wena, lezaku a muphoteli wa nkhata a nga engeteli a khombo legi hi ku daya a nʼwana wa mina. A hosi yi lo hlamula, yiku: Nzi hlambanya ha Jehova a hanyako, cima ku nga ta kuva kona ni sisi munwe wa nʼwana wa wena wu ta ngawa lahasi. Mitse. 35:10; Jox. 20:1
12Zonake a wasati i te ngalo: Ngha a nanza ga wena ga xisati gi wula gezu ginwe ka hosi ya mina.
13A hosi yiku: Wula! A wasati aku: Hi kota ya yini u alakanya a zilo za ku nghahi za ku vukela a vanhu va Nungungulu ke? Hakuva khwatsi hi lezi yi wulisako zona hosi, yi na ni nanzu hi lezi yi nga lanziko loyi yi mu hlongoleko.
14Hakuva zi te dlunya lezaku hi tafa hakunene; hi fanana ni mati lawa ma halatilweko lahasi ma nga ha kotekiko ku wungeletelwa kambe, Nungungulu a nga susi wutomi ga munhu, kanilezi i xuva lezaku loyi a hlongolweko ngha a nga hambani naye. Tis. 89:49; Ezek. 18:23, 32
15Makunu kota lezi nzi tileko ku ta wulawula leti timhaka ka hosi ya mina, a vanhu Va wa nzi dzukisela; kanilezi a nanza ga wena ga xisati gi te ngalo: Nzi lava ku ya wulawula ni hosi, kutani a hosi yi ta maha lezi a nanza ga wena gi ta nga kombela zona.
16Hakuva a hosi yi tazwa a nanza ga yona yi nzi hlanguta mandleni ya loyi a ta nga lava ku nzi lovisa ni nʼwana wa mina, lomu tshombeni ya Nungungulu.
17A nanza ga wena gi waku: A gezu ga hosi yanga gi ta nzi nyika kurula, hakuva a hosi ya mina yi fanana ni ngelosi ya Nungungulu a ku tiva kusasa ni kubiha; hikwalaho Jehova Nungungulu wa wena ave zinwe na wena!
18Zonake a hosi yi lo hlamula, yiku: U nga nzi fihleli a mhaka leyi nzi ta nga ku wutisa. A wasati aku: Wulawula, hosi yanga!
19A hosi yiku: Xana yenawu Joabe i lomu timhakeni tontlhe leti ke? A wasati a hlamula, aku: Hizinene, loku a hosi yi wula nchumu, ku hava ku ponela tlhelweni ga xinene hambu ka ga xibhabha. Hi yena a nanza ga wena Joabe a nzi leleteleko tontlhe timhaka leti.
20A nanza ga wena Joabe hi yena a nga hunzulusa mawulela ya mhaka, kanilezi a hosi yi na ni wutlhari go fanana ni ga ngelosi ya Nungungulu, a ku tiva zontlhe za laha misaveni.
21A hosi yi te ngalo ka Joabe: Hi zona, nzi ta maha zalezo; fambake u ya teka Absalome kambe.
22Joabe i lowa lahasi hi nghohe a kombisa xichavo, a bonga hosi, aku: Inyamutlha a nanza ga wena ga zi tiva lezaku nzi kumile thomo mahlweni ka wena hosi ya mina, hakuva a hosi yi vumele a xikombelo xa nanza gakwe.
23Zinghaho Joabe i lo suka aya le Gexura a ya teka Absalome a wuya Jerusalema.
24A hosi yiku: A tshame ndlwini yakwe, a nga woni nghohe ya mina. Zinghaho Absalome i lo tshama ndlwini yakwe, a ngayi ka hosi.
25Makunu xikari ka vontlhe va ka Israeli yi wa nga hi kona a mbhuri yo hunza Absalome. Va wa mu babaza nguvu; i wa nga hi na bawa kusukela mikonzweni kala hlokweni yakwe.
26Lembe ni lembe i wa kaya misisi yakwe, hakuva yi wa mu binza. Loku a kayile, a yi veka xikalweni a kubinza ka yona yi wa ringana 200 wa maxekeli, hi lipimo la hosi.
27Absalome i wa pswele vafana vanharu ni nhanyana munwe a vitwako Tamara, a mbhuri ya wasati.
28Loku Absalome a tshamile malembe mambiri le Jerusalema na a nga woni a nghohe ya hosi,
29i lo vitanisa Joabe kasi a fela ku ta mu heleketa ka hosi, kanilezi Joabe i lo ala. I lo mu vitanisa ga wumbiri; a si ala kambe.
30Hikwalaho Absalome i te ngalo ka malanza yakwe: Cuwukani, a simu ga Joabe gi laha kusuhani ni ga mina; gi na ni mavele. Yanani mu ya gi hisa hi nzilo. Zalezo a malanza ya Absalome ma lo ya gi hisa.
31Zonake Joabe i lo suka aya le ndlwini ya Absalome, a yaku kakwe: Hi kuyini a malanza ya wena ma hisa a simu ga mina ke?
32Absalome aku ka Joabe: Mina nzi rumele gezu go ku vitanisa, nziku: Ngone nzi ta ku ruma ka hosi, u yaku: Nzi wuyele yini hi le Gexura? Ku wa nga hi chukwana loku nzi wa simamisile nzi tshama leyo ke? Hikwalaho mina nzi lava ku wona a nghohe ya hosi; loku nzi hi ni nanzu, a nzi daye.
33Zinghaho Joabe i lo ya enghena ka hosi, a yi hlawutela timhaka leto. Laha Absalome a nga vitanwa le hosini, i loya chikela a korama le mahlweni ka hosi; ni hosi yi lo pswopswa Absalome.
Currently Selected:
2 Samueli 14: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
