2 Tihosi 9
9
Jehu a maha hosi ya ka Israeli.
1Muprofeti Elixa i lo vitana a munwe wa vapizani va vaprofeti, aku kakwe: Ti bohe xiwunu xa wena u teka limhonzo leli la mafura uya le Ramote-Gileade.
2Loku u chikele u ta ya lava Jehu nʼwana Jehoxafate nʼwana Nimxi, u enghena u mu byela a yima xikari ka vanakulobye, u mu yisa lomu kwarutwini ya lomu xikari.
3Zonake u ta teka a limhonzo la mafura, u mu chela laha hlokweni yakwe, uku: Jehova i ngalo: Mina nzi ku totile a kuva hosi ya ka Israeli. Zonake u vulula livati u tsutsuma, u nga yimi.
4Zinghaho a jaha lego ga muprofeti gi lo suka gi famba le Ramote-Gileade.
5A xikhati a nga chikela i lo kuma a tinduna timbiri ta yimpi na ti tshamile, aku: Nzi na ni mahungu nzi ma nehako ka wena hosi! Jehu i lo hlamula, aku: U wula mani xikari ka hina laha? Yena aku: Nzi wula wena hosi.
6Jehu i lo suka a enghena lomu kwarutwini, a jaha gi lo chela mafura hlokweni yakwe, aku: Jehova Nungungulu wa ka Israeli i ngalo: Mina nzi ku totile a kuva hosi ya ka Israeli, a vanhu va Jehova.
7Wena u ta lovisa a yindlu ya Ahabi a hosi ya wena, kasi mina nza fela ku photela a nkhata wa malanza ya mina a vaprofeti ka Jezebeli, hi kota ya nkhata ya wontihe malanza ya Jehova.
8Hakuva a yindlu yontlhe ya ka Ahabi yi ta lobyiswa, nzi fuvisa munwe ni munwani wa yona, a wa hombe ni tsongwani lomu tikweni ga ka Israeli.
9A yindlu ya ka Ahabi nzi ta yi maha khwatsi hi lezi nzi mahileko ya Jeroboamu nʼwana Nebate, ni ku khwatsi hi yindlu ya Baaxa nʼwana Ahija.
10Jezebeli i ta giwa hi timbyana le masinwini ya Jezreeli; a nga tava na mulahli. Zonake i lo vulula a livati a tsutsuma.
11Zonake Jehu i lo huma aya ka malanza ya hosi yakwe, vona vaku kakwe: Khwatsi lezo! A munhu loyi wo hunguka i wo tela yini ka wena? Yena a va hlamula, aku: Ma mu tiva khwatsi loyi munhu ni mahungu yakwe. Jer. 29:26; Hos. 9:7
12Vona va te ngalo: Mawunwa, hi byele zinene! I lo va hlawutela, aku: I te ngalo: Jehova i te: Mina nzi ku totile a kuva hosi ya ka Israeli.
13Zonake va lo hatlisa, munwe ni munwani a teka a nguwo yakwe, va ti andlala laha hehla ka mayingo, vaba punzu vaku: Jehu i hosi! Mat. 21:8
14Zinghaho Jehu nʼwana Jehoxafate wa Nimxi i lo maha xikungo xo vukela Joramu. Xikhatini lexo Joramu i wa kari a hlayisa Ramot-Gileade zinwe ni vontlhe va ka Israeli hi kota ya Hazaeli a hosi ya ka maSiria.
15Hosi Joramu i wa tlhelile a kuya le Jezreeli a ku ya chumiwa a timbanga leti a nga wa khuvazilwe hi maSiria, a xikhati va nga walwa na Hazaeli, a hosi ya maSiria. Jehu aku: Loku mu alakanya lezo, ngha ku nga poni ni munhu munwe a huma mutini a kuya va byela le Jezreeli.
16Zinghaho i lo khilela a kareta yakwe a suka aya le Jezreeli, hakuva Joramu i wa hi sangweni na a babya. Na Ahazia a hosi ya ka Juda i wa relele a ku ya wona Joramu.
17A murinzeli loyi a nga wa hi le hehla ka khokhola ga le Jezreeli, laha a nga wona a yimpi ya Jehu na yi kari yita, i te ngalo: Nzi wona a yimpi. Joramu aku: Ruma a mukhileli wa haxi a va khinga a ya va wutisa, aku: Khwatsi ke?
18A mukhileli wa haxi i lo suka a khinga Jehu, a yaku: Khwatsi lezo? Jehu a hlamula, aku: U na ni mhaka muni ni loku ku hi khwatsi? Hambuka uya lenzhako ka mina. A murinzeli i lo tivisa hosi, aku: A ntsumi wu va chikelele, kanilezi a wu wuyi.
19Zonake i lo engeta a ruma a munwani mukhileli wa haxi, yenawu i lo chikela ka vona, aku: A hosi yi wutisa ku ngalo: Khwatsi ke? Jehu i lo hlamula, aku: U na ni mhaka muni loku ku hi khwatsi? Hambuka uya lenzhako ka mina!
20A murinzeli i lo tivisa hosi kambe, aku: Yenawu i va chikelele, kanilezi a nga wuyi; kanilezi a mafambela ya kona ma fanana ni ya Jehu nʼwana Nimxi, hakuva i famba hi ntamu.
21Joramu i te ngalo: Panisa kareta! Va lo panisa a kareta yakwe; Joramu a hosi ya ka Israeli yi lo huma zinwe na Ahazia a hosi ya ka Juda, loyi ni loyi a khilela a kareta yakwe; va lo huma ku tlhangaveta Jehu, va ya mu kuma le masinwini ya Nabote le Jezreeli.
22Laha Joramu a nga wona Jehu, i te ngalo kakwe: Jehu, u fambisa kurula ke? Yena a hlamula, aku: Ku ngava kona kurula, loku ka ha simamisa ku hi ni manyala ya wubhayi ga nyine wa wena Jezebeli, ni wuloyi gakwe giva ginyingi kota lezi ke?
23Joramu i lo hunzuluka a tlhela hi kutsutsuma, aku ka Ahazia: Yi kona a mhango laha, wena Ahazia!
24Jehu i lo teka a wura gakwe a gi phanda hi ntamu, a fula Joramu hi laha xikari ka makatla yakwe, a paxa wu phuruta a mbilu, a siwa lomu kareteni yakwe.
25Jehu aku ka Bidkare, a nduna yakwe: Mu tlakule u mu hoxa lomu sinwini ga tshomba ya Nabote a muJezreeli, hakuva alakanya lezaku a xikhatini lexo hi nga khilela, mina na wena, hi lanzela Ahabi a raru wakwe. Jehova i wa wulile a mhaka leyi xungetano na yena, aku:
26Hizinene, kota lezi nzi wonileko a nkhata wa Nabote tolo, ni nkhata wa vana vakwe, nzi ta tlhelisela ka wena kota zalezo ka legi simu. Hikwalaho mu tlakule u mu hoxa lomu ka gona, khwatsi hi lezi Jehova a wulileko.
27Laha Ahazia a hosi ya ka Juda a nga wa zi wonile, i lo tsutsuma hi ndlela ya yindlu ya simu, kanilezi Jehu i lo hlongolisa, aku: Mu dayeni yenawu lomu kareteni! Va lo mu daya lomu kareteni yakwe a kukanziheni ka Gura legi gi nga kusuhi ni Ibieama. I lo chavela le Megiddo a ya fela kona.
28A malanza yakwe ma lo mu neha le Jerusalema, ma ya mu lahla lomu xilahleni zinwe ni vararu vakwe, le mutini wa Davida.
29Ahazia i wa sangule ku fuma le tikweni ga ka Juda hi lembe ga wu 11 ga kufuma ka Joramu nʼwana Ahabi.
30Laha Jehu a ngaya le Jezreeli, Jezebeli i lo zizwa, a ti tota a mahlo yakwe, a bombisa a hloko yakwe, a cuwuka hi laha njhaneleni.
31Khwatsi hi lezi Jehu a nga wa ha enghena laha nyangweni, yena i te ngalo: U fambisa kurula ke, wena Zimri mudayi wa hosi ya wena?
32Jehu i lo tlakusa a mahlo yakwe hi tlhelo ga le njhaneleni, aku: Himani a yimako na mina ke? Hi mani xana? A malanza mambiri kutani manharu ma lo tshinela laha njhaneleni ma cuwuka kakwe; yena aku:
33Mu hoxeni lahasi! Va lo mu hoxa lahasi, a nkhata wakwe wu phandlukele laha khurisini ni lomu ka mahaxi, yena a mu kanzihela hi mikonzo ya wona.
34Laha na a enghenile lomu ndlwini aga, anwa, i te ngalo: Hlayisani murukateliwa loyi, mu mu lahla, hakuva i nʼwana wa hosi.
35Va lo famba va ya mu lahla: kanilezi va lo ya kuma a hloko ni mikonzo ni mandla ntsena.
36Va lo wuya va ta byela Jehu; yena aku: Hi zalezo Jehova a wulileko hi nanza gakwe Elija a muTixebeti, aku: Le masinwini ya Jezreeli a timbyana ti taga a nkhata wa Jezebeli.
37A miri wa Jezebeli wu ta fanana ni koho lomu masinwini ya petso wa Jezreeli, laha ka kuva ku nga ha wuliwi kambe ku ngalo: Loyi hi Jezebeli.
Currently Selected:
2 Tihosi 9: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
