2 Tihosi 11
11
Kudawa ka Atalia.
1Laha Atalia, a nyine wa Ahazia, a wona lezaku a nʼwana wakwe i file, i lo suka a hihirita vontlhe va yindlu ya wuhosi.
2Kanilezi Jehoxeba, a nhanyana wa hosi Joramu nakulobye wa Ahazia, i lo nyemukisa Joaxi nʼwana Ahazia, a mu susa xikari ka vana va hosi lava va nga wa dawetelwa, a ya mu fihla ni muwundli wakwe lomu ndlwini ya kuetlela. Va lo fihlela Atalia, hikwalaho a nga mu dayangi.
3I lo tshama naye na a mu fihlile lomu ndlwini ya Jehova ntlhanu ni ginwe malembe, Atalia na a fumela a tiko ga ka Juda.
4Hi lembe ga wu 7, Jehoiada i lo vitana a tinduna ta mazana ta vaKereti ni varinzeli, a ta enghena zinwe navo lomu ndlwini ya Jehova; i lo maha xivumelwano navo, a va hlambanyisa lomu ndlwini ya Jehova, a va kombisa a nʼwana wa hosi,
5I lo va leletela, aku; Mu ta maha lezi: a xipanze xa wunharu xa nwina lava mu enghenako ntirweni wa sabado, xi tava xa ku rinzela a yindlu ya hosi.
6A xinwani xipanze xa wunharu xi ta yima laha nyangweni ya Sura; a xinwani xa wunharu xi ta yima le nyangweni hi le nzhako ka varinzeli; mu ta rinzela a yindlu lezaku ku nga engheni munhu.
7Kasike nwina mitlawa mimbiri ya vontlhe lava va enghenako ntirweni wa siku ga sabado, mu ta rinzela a yindlu ya Jehova kusuhi ni hosi.
8Mu ta renzelekela a hosi, munwe ni munwani wa nwina na khomile matlhari yakwe; ni wihi loyi a enghenako lomu tixaxeni, i ta dawa. Mu tava ni hosi loku yi enghena ni loku yi huma.
9A tinduna ta mazana ti lo maha zontlhe lezi mupristi Jehoiada a nga wa leletele zona kabye. Munwe ni munwani i lo teka a ntlawa wakwe, vontlhe lava va enghenako ntirweni wa siku ga sabado, ni lava va humako hi lomu ntirweni wa siku ga sabado, va lota ka mupristi Jehoiada.
10A mupristi i lo nyika ka tinduna ta mazana a matlhari ni zitlhangu, lezi zi nga wa hi za hosi Davida zi nga wa hi lomu ndlwini ya Jehova.
11A varinzeli va lo yima ni matlhari yabye, kusukela tlhelweni ga xinene ga yindlu kala tlhelweni ga xibhabha, kusuhani ni alati ni yindlu, va renzelekela a hesi.
12Zonake i lo humesa a nʼwana wa hosi, a mu tlhateka a xidlodlo, a mu nyika bhuku ga Wukustumunyu; va lo mu maha hosi, va mu tota hi mafura, va phakatela mandla yabye, vaku: A yi hanye, a hosi! Ekso. 25:16; Deut. 17:18
13Laha Atalia a ngazwa a guwa ga varangeli ni vanhu, i lota lomu ndlwini ya Jehova.
14I lo lunguza a wona a hosi na yi yimile laha wutshanwini gi tlakukileko, khwatsi hi nayo wa kona, a tinduna ni vabi va mipunzu na va yimile hi laha hosini, a vanhu vontlhe va tiko na va tsaka, vaba mipunzu. Zonake Atalia i lo hanzula a tinguwo takwe, aba huwa, aku: Mahlevo, mahlevo!
15Mupristi Jehoiada i lo leletela a tinduna ta yimpi, aku ka tona: Mu humeseni lomu tixaxeni; loyi a mu lanzako mu dayeni hi tlhari, hakuva mupristi i waku va nga dzuka va mu dayela lomu ndlwini ya Jehova.
16Zinghaho va lo mu hendlela a ndlela va mu tsika a hunza, a famba hi nyangwa yo enghena mahaxi a ya chikela lomu ndlwini ya hosi, a si dawelwa kwalaho.
17Jehoiada i lo maha xivumelwano xikari ka Jehova ni hosi ni vanhu, lezaku vona va tava vanhu va Jehova, a maha kambe xikari ka hosi ni vanhu.
18A vanhu vontlhe va tiko va loya ndlwini ya Baali va ya yi khungumulela, va fayetela maalati yakwe, ni zifananiso zakwe, va daya Matani a mupristi wa Baali mahlweni ka maalati. Zonake a mupristi i lo yimisa a vahlayisi va yindlu ya Jehova.
19I lo teka a tinduna ta mabutho, ni vaKereti, ni varinzeli, ni vanhu vontlhe va relelisa a hosi hi le ndlwini ya Jehova, va ya enghena lomu ndlwini ya hosi hi ndlela ya nyangwa ya varinzeli, zonake Joaxi i lo tshama xitshanwini xa wuhosi.
20Zinghaho vontlhe vanhu va lo tsaka, ni muti wu lo rula. Atalia va lo mu daya hi supado lomu ndlwini ya hosi.
Currently Selected:
2 Tihosi 11: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
