1 Va le Tesalonika 2
2
A ntiro wa Paule le Tesalonika.
1Hakuva na nwina, vamakabye, ma zi tiva lezaku a ku mu enzela ka hina a ku mahiwangi mahala.
2Kanilezi hambu lezi hi nga rangile hi xaniseka ni ku khonʼwa hi tingana le Filipi (kota lezi mu zi tivako), hi lo tiya-hlana ka Nungungulu wa hina, hi kanela ka nwina a ivangeli hi kulwa ka hombe. Miti. 16:22; 17:2
3Hakuva a kukhongotela ka hina a hi timhaka ti kanganyisako ni kungahlazeki, hambu hi mano.
4Kanilezi kota lezi hi kumilweko hi Nungungulu, hi hi ni fanelo a kuva hi nyikwa a ntiro wa ivangeli, hina ha yi kanela, na ku nga hi ku xalalisa vanhu, kanilezi kasi ku xalalisa Nungungulu, loyi a hlolako timbilu ta hina. Mav. 17:3; 1 Kor. 7:25; 1 Tim. 1:11; Tit. 1:3
5Nwina ma zi tiva lezaku cima a hi kanelangi a magezu ya ku dzumeleta, hambu a mano ya ku ti fumisa; Nungungulu hi kustumunyu wa hina.
6Kambe a hi lavangi a ku dumiswa hi vanhu, hambu hi nwina, kutani hi vanwani; hambu loku hi wa ta ngha hi zi kotile ku mu binzela, kota lezi hi nga vapostoli va Kristu. Joh. 5:41
7Kanilezi hi lo rula xikari ka nwina, kota a muanwisi loku a hlayisa a vanana vakwe.
8Kota lezi hi nga mu ranza nguvu hi lo tsaka a ku mu nyika ivangeli ya Nungungulu, na ku nga hi yona yoce, kanilezi hi wa longile a ku nyikela hambu ni wutomi ga hina, hakuva mu wa ranzeka nguvu ka hina. Rom. 1:11; 15:29; 2 Kor. 12:15
9Vamakabye, nwina ma alakanya a ntiro wa hina ni kukarateka ka hina; lezi hi nga tira wusiku ni mumu, kasi hi nga binzisi ni munwe wa nwina, laha hi nga kanela ivangeli ya Nungungulu ka nwina. 2 Kor. 11:9
10Nwina mu vakustumunyu va hina, ni Nungungulu kambe, lezaku hi tshamisile kuyini hi kubasa ni kululama ni kungasoleki ka nwina lava mu kholwako.
11Na nwina ma zi tiva lezaku hi wa mu layile munwe ni munwani, hi mu luleka ni ku mu layisisa khwatsi hi raru loyi a layako vanana vakwe.
12Kasi ma famba hi kufaneleko Nungungulu, loyi a mu vitaneleko mufunweni wakwe ni kungangameleni kakwe. Kol. 1:10; 1 Ped. 1:15
13Hi kota ya lezo ha simamisa hi bonga Nungungulu, lezaku laha mu nga amukela a mhaka ya Nungungulu, leyi mu nga yi kuma ka hina, a mu yi amukelangi khwatsi i mhaka ya vanhu, kanilezi mu lo amukela a mhaka ya Nungungulu kota lezi yi nga yona, a mhaka leyi yi tirako xikari ka nwina lava mu kholwako. Mat. 10:40
14Hakuva nwina, vamakabye, mu lo maha vaecanyisi va mabandla ya Nungungulu ma nga le Judia, lawa ma nga ka Kristu Jesu; hakuva nwina mu lo xaniswa hi va ka nwina, kota lezi va nga xanisiswa zona hi vaJuda. Miti. 17:5; Gal. 1:22; Maheb. 10:33
15Lava va nga daya Hosi Jesu ni vaprofeti, va hlongola na hina; a va xalalisi Nungungulu, kanilezi mbalala va vanhu vontlhe; Mat. 5:12; Miti. 7:52
16va hi tsimbetela a ku kanela ka vamatiko, lezaku va fela ku hanyiswa; lezo va tatisa xontlhe xikhati a lipimo la zionho zabye. Kanilezi a khulo ga Nungungulu gi va putsuketele magumo. Gen. 15:16; Mat. 24:6; Miti. 13:50; 14:19; 17:5; 22:21; Lu. 11:52
17Vamakabye, kota lezi hi nga tsawukene na nwina mirini a xikhatanyana, kanilezi na hi nga tsawukanangi hi mbilu, hi lo navela nguvu a ku wona tinghohe ta nwina.
18Hakuva hi wa xuvile a kuta ka nwina; nguvu mina Paule, nzi ringile kanwe ni kumbiri, kanilezi Satani i lo hi thindekisa. Rom. 1:13
19Hakuva xini a kutsumba ka hina, kutani kutsaka ka hina, kutani a xidlodlo lexi hi ti kulisako ha xona mahlweni ka Hosi ya hina Jesu a kuwuyeni kakwe? A hi yena nwina ke? Kuv. 1:7; 22:12; 1 Kor. 15:23; Xip. 3:13
20Ina, hi nwina mu nga wudumo ga hina ni kutsaka ka hina.
Currently Selected:
1 Va le Tesalonika 2: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
