1 Samueli 5
5
A arke ga Jehova lomo tempeleni ya Dagoni.
1Loku vaFilistia va tekile a arke ga Nungungulu, va lo gi susa le Ebenezera va gi yisa le Axdode,
2va gi enghenisa lomu tempeleni ya Dagoni, va gi veka kusuhani na Dagoni. Vala. 16:23
3Makunu hi siku gi gamelako, a vanhu va le Axdode va lo vuka ni mixo, va wona Dagoni na a wile lahasi hi nghohe yakwe mahlweni ka arke ga Jehova; va lo teka Dagoni va mu veka wutshanwini gakwe.
4A siku gi lanzelako, a vanhu va le Axdode va lo vuka kambe ni mixo va wona Dagoni na a wile hi nghohe yakwe mahlweni ka arke ga Jehova; a hloko ya Dagoni ni mandla yakwe zi wa tsemekile, na zi hi laha xipimbitsini xa nyangwa, na ku sele miri woce.
5Hikwalaho a vapristi va Dagoni ni vontlhe lava va enghenako lomu tempeleni ya Dagoni, a va kanziheli xipimbitsi xa yindlu ya Dagoni le Axdode kala ni lezi.
6Kanilezi a canja ga Jehova gi wa tsimbeketa a vanhu va le Axdode; a va lamata hi zidlayi, ni vanhu va matlhelo ya kona.
7Laha a vanhu va le Axdode va nga wonile lezo, va te ngalo: Hi nga tshami ni arke ga Nungungulu wa ka Israeli, hakuva a canja gakwe ga hi tsimbeketa nguvu, gi tsimbeketa ni nungungulu wa hina Dagoni.
8Zonake va lo ruma vanhu a ku ya ramba tontlhe tihosi ta vaFilistia, va taku: Hi ta maha yini hi arke ga Nungungulu wa ka Israeli? Vona vaku ngalo: A arke ga Nungungulu wa ka Israeli a gi heleketwe le Gati. Va lo rwala a arke ga Nungungulu wa ka Israeli, va gi heleketa leyo.
9Laha na va gi heleketile, a canja ga Jehova gi lo vukela a muti; ku lo humelela a khombo ga hombe gi riza a vanhu va muti, a vatsongwani ni vahombe, va pomelwa hi zidlayi mimirini yabye.
10Zonake va lo rumela a arke ga Nungungulu le Ekroni. Kanilezi a arke ga Nungungulu gi nga wa enghenile le Ekroni, a vanhu va kona va rila, vaku: Va hi nehele a arke ga Nungungulu wa ka Israeli kasi ku ta hi daya ni vanhu va hina.
11Va lo rumela a vanhu ku ya tsombanyisa tihosi tontlhe ta vaFilistia, vaku ngalo: Tlhelisani a arke ga Nungungulu wa ka Israeli giya kaya ka gona, gi nga hi mbheta ni vanhu va hina. Hakuva ku wa hi ni nyenganyenga ka wontihe muti; hi lezi a canja ga Jehova gi nga tshingile nguvu.
12A vanhu lava va nga kala va nga sefa, va wa xaniswa hi zidlayi, ni nkosi wa muti wu lo tlakukela tilweni.
Currently Selected:
1 Samueli 5: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
