1 Samueli 19
19
1Saule i lo wulawula ni nʼwana wakwe Jonatani, ni malanza yakwe wontihe, aku: Mina nzi lava ku daya Davida! Kanilezi Jonatani nʼwana Saule i wa ranza nguvu Davida.
2Hikwalaho Jonatani i lo byela Davida, aku: Baba wa mina Saule i lava ku ku daya. Hikwalaho ti wonele ni mixo, u tshama xihundleni u fihlala.
3Kasike mina nzi ta huma nzi ya yima kusuhani na dadani le handle, hi tlhelo lego u nga kona wena; nzi ta ku wulawulela ka dadani lezo nzi ta nga zi wona ka yena, nzi ta ku byela.
4Jonatani i lo Wulawulela Davida ka raru wakwe Saule, aku: Ngha hosi yi nga dzuki yi onha hi ku vukela a nanza ga yena Davida, hakuva a nga ku onhelangi nchumu, kanilezi lezi a mahileko hi lezi zi ku vunako nguvu.
5Hakuva yena i ti enghenisile mhangweni a hlasela vaFilistia, na Jehova i hlulele vaIsraeli ha hombe. Wena u zi wonile ha wece u kala u tsakiswa ha zona. Makunu u ta mahisa kuyini ku onha hi nkhata lowu wu nga hiko na nanzu, u daya Davida ahandle ka xigelo?
6Saule! lo ingisa a gezu ga Jonatani, a hlambanya, aku: Nzi hlambanya ha Jehova a hanyako, cima a nga ta dawa.
7Zonake Jonatani i lo vitana Davida, a mu byela tontlhe timhaka leto, a mu neha ka Saule. I lo yimeletela hosi kota zinwani zikhati.
8Ku lo engeta ku huma yinwani yimpi, na Davida i lo huma a yalwa ni vaFilistia, a va hlasela nguvu kala va panzanyeka mahlweni kakwe.
9Kanilezi a moya lowu wobiha wu tako hi ka Jehova wu lota ka Saule na a tshamile lomu ndlwini yakwe, na hi ni tlhari canjeni gakwe, Davida na a kari a yimbelela hi xitende.
10Saule i wa lava ku tlhava Davida a mu patsanyeta ni khurisi hi tlhari gakwe. Kanilezi Davida i lo vika mahlweni ka Saule, ni tlhari gi lo ya gwe-lela khurisi. Davida i lo tsutsuma, a pona gona wusiku lego.
11Kanilezi Saule i lo rumela vanhu le ndlwini ya Davida a ku ya mu rinzela kasi a fela ku mu daya laha mixweni. Kanilezi a sati wakwe Mikali i lo mu byela, aku: Loku u nga tsutsumi wusiku legi, u ta ta dawa ni mixo.
12Zinghaho Mikali i lo releta Davida hi laha njhaneleni, a huluka hi kutsutsuma. Miti. 9:25
13Zonake Mikali i lo teka a xifananiso xa terafime a xi etlelisa laha mubhedini, a vekela xitshikelo xa woya ga timbuti laha hlokweni ya xona, a xi fenengeta hi nguwo.
14Saule i lo rumela vanhu a ku ya khoma Davida, kanilezi Mikali i te ngalo: Wa babya!
15Saule i lo rumela kambe vanhu a ku ya wona Davida, aku: Mu neheni hi mubhedi laha ka mina, nzi ta ta mu daya.
16Laha mitsumi yi nga wa enghenile, yi lo wona a xifananiso laha mubhedini zinwe ni xitshikelo xa woya ga timbuti laha hlokweni ya xona.
17Saule i te ngalo ka Mikali: Hi yini u nzi khohlisa u tsika a nala wa mina a tsutsuma ke? Mikali aku ka Saule: Hi yena a ngaku: Nzi tsike nzi famba, nzi ta ku dayela yini ke?
18Davida i lo huluka a tsutsuma aya ka Samueli le Rama a ya mu hlawutela zontlhe lezi Saule a mahileko ka yena. Zonake yena na Samueli va lo suka va ya tshama le Naiote.
19Zonake va lo byela Saule vaku: Davida i le Naiote le Rama.
20Saule i lo rumela a vanhu a ku ya khoma Davida; zonake vona va lo wona a ntlawa wa vaprofeti va nga wa profeta, na Samueli a hi xikari kabye a va rangela, zonake a Moya wa Nungungulu wu lota hehla ka mitsumi, vonawu va profeta.
21Va lo ya bikela Saule, zonake Saule i lo rumela vanwani vanhu, vonawu kambe va lo ya profeta. Saule i lo ruma mitsumi hi xikhati xa wunharu, na vonawu va profeta.
22Zonake yenawu Saule i loya le Rama; laha a nga chikela le hlobyeni ya hombe yi nga le Seku, i lo wutisa, aku: I kwihi Samueli na Davida? Vona va te ngalo: Va le Naiote le Rama.
23I loya kona le Naiote wa le Rama. Zalezo a Moya wa Nungungulu wu lota hehla ka yena. Ni laha a nga wa famba pfhumbeni gakwe, i lo profeta kala a chikela le Naiote le Rama.
24Zonake i lo susa a tinguwo takwe, yenawu i lo profeta mahlweni ka Samueli, a tshama siku gontlhe ni wusiku gontlhe na a etlele lahasi, na a hi ximbyiri. Hikwalaho vaku ngalo: Kasi yenawu Saule i lomu xikari ka vaprofeti ke?
Currently Selected:
1 Samueli 19: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
