1 Samueli 15
15
A kuputsuketwa ka Amaleki.
1Samueli i te ngalo ka Saule: Jehova i nzi rumile ku ta tota wena a kuva hosi ya va ka Israeli; makunu ingisa a gezu ga Jehova:
2Jehova wa tiyimpi i ngalo: Nzi alakanyile lezi Amaleki a mahileko ka Israeli, lezaku i lo huma a ya vukela Israeli laha ndleleni xikhatini lexo va nga wata hi le Gipite. Ekso. 17:8; Deut. 25:17
3Makunu lezi famba u ya hlasela vaAmaleki, u lovisa zontlhe lezo va nga nazo; u nga va nyenyeleteli, kanilezi daya vontlhe vavanuna ni vavasati, ni vananani tisana ta ha anwako, ni tihomu, ni tiyivu, ni makameli, ni timbongola.
4Zonake Saule i lo hlomisa a vanhu, a va hlaya le Telaime; a vavanuna lava va fambako hi mikonzo va wa hi 200,000 wa vona, a va ka Juda va wa hi 10,000 wa vavanuna.
5Saule i loya le mutini wa vaAmaleki a ya veka valaveleli le minzhelelweni.
6Saule i te ngalo ka vaKeni: Sukani, mu huma xikari ka vaAmaleki, nzi nga mu patsa navo nzi mu hlasela; hakuva nwina mu kombisile wunene ka vontlhe va ka Israeli xikhatini lexo va nga wata hi le Gipite. Zinghaho a vaKeni va lo huma xikari ka vaAmaleki.
7Zonake Saule i lo hlasela a vaAmaleki kusukela le Havila kala ku chikela le Xura, a tiko gi cuwukeneko ni Gipite.
8I lo khoma Agagi na ha hanya, a hosi ya vaAmaleki, kanilezi vontlhe vanhu i lo va lovisa hi wutlha ga supado.
9Kanilezi Saule ni vanhu vakwe va lo tsika Agagi ni wulangelwa ga tiyivu, ni ga tihomu ti nonileko, ni ga zifuyo zinwani, ni tiyivana, ni zontlhe zo saseka, a nga lavangi ku zi lovisa. Kanilezi zontlhe lezi zi nga nyawuliko va lo zi lovisa.
10Zonake Jehova i lo wulawula na Samueli, aku:
11Nza ti laya hi lezi nzi nga yimisa Saule a kuva hosi, hakuva i hluwukile, a nga hlayisangi timhaka ta mina. Zonake Samueli i lo zangara, a rila ka Jehova gontlhe wusiku. Gen. 6:6
12I lo vinzuka ni mixo a khinga Saule. Kanilezi ku lo tiviswa ka Samueli lezaku: Saule i yile le Karmeli a ya ti akela xialakanyiso, a hunzelele a relela aya Gilgali.
13Samueli i loya ka Saule; Saule aku kakwe: U katekisilwe wena hi Jehova! Nzi mahile zileletelo za Jehova.
14Kanilezi Samueli i te ngalo kakwe: Gi wula yini a guwa lego ga tiyivu gi kulumelako tindleveni ta mina, ni kubhoma ka tihomu loko nzi ku zwako?
15Saule i te ngalo: Va zi tekile ka vaAmaleki va zi neha seno, hakuva a vanhu va lo tsika a tiyivu ni tihomu leti to saseka, kasi ku ta maha ha tona muphahlelo wa Jehova Nungungulu wa wena, kanilezi zontlhe zinwani hi zi lovisile.
16Samueli aku ka Saule: Rinzela nzi ku byela lezi Jehova a nga nzi byela matolo. Saule aku kakwe: Wulawula!
17Samueli aku: Hambu lezi wena u nga wa hi tsongwani kuwoneni ka wena nwinyi, wena u yimisilwe a kuva hosi hehla ka tixaka ta ka Israeli. Jehova i ku totile hi mafura a ku maha hosi ya ka Israeli.
18Jehova i ku rumile ku ngalo: Famba u ya lovisa vaonhi va ka Amaleki, u va hlasela kala va mbhela vontlhe.
19Hi kuyini u nga kala ku ingisa a gezu ga Jehova? Hi kuyini u tsutsumela muphango, u maha kubiha mahlweni ka Jehova?
20Saule i te ngalo ka Samueli: Mina nzi ingisile gezu ga Jehova, nzi fambile hi ndlela leyi Jehova a nzi rumileko yona, nzi nehile Agagi a hosi ya vaAmaleki; kanilezi zontlhe za vaAmaleki nzi zi lovisile.
21Kanilezi hi tlhelo ga lezi zi phangilweko, a vanhu va tekile tiyivu ni tihomu, a wulangelwa ga lezi ku phahlelwako ha zona, kasi ku ta nyikela ka Jehova Nungungulu wa wena leno Gilgali.
22Samueli a ku ngalo: Xana Jehova wa tsakiswa hi minyikelo ya kuhiswa ni miphahlelo, ku hunza ku ingisa gezu gakwe ke? Zwisisa! a kuingisa ku chukwana ku hunza miphahlelo, ni ku hlayisa gezu ga Jehova ku hunza mafura ya tiyivu. Hos. 6:6; Mat. 9:13; 12:7
23Hakuva a kuhluwuka ku fanana ni wutumbe, ni xikanikani xi fanana ni ku khozela xifananiso ni terafime. Makunu kota lezi u alileko a gezu ga Jehova, yenawu i ku alile; u nga ha ta kuva hosi kambe.
24Zonake Saule aku ka Samueli: Nzi onhile, hakuva nzi hambunyetile zileletelo za Jehova ni magezu ya wena, hi kota ya lezi nzi nga chava vanhu nzi ingisa timhaka tabye.
25Hikwalaho nza ku khongotela lezaku u nzi tsetselela xionho xa mina hi famba hontlhe nzi ya khizama mahlweni ka Jehova.
26Samueli i te ngalo kakwe: A nzi na ku famba na wena, hakuva u hoxile a gezu ga Jehova, yenawu Jehova i ku hoxile, kasi u nga ha mahi hosi ya va ka Israeli.
27Makunu, khwatsi hi lezi Samueli a nga wa hunzuluka a kuva a famba, Saule i lo mu khoma hi nguwo yakwe, yi si hanzuka.
28Samueli i te ngalo kakwe: Inyamutlha Jehova i hanzule a mufumo wa ka Israeli hehla ka wena, a wu nyikela ka muakelane wa wena, loyi a nga chukwana ku hunza wena.
29Loyi a nga Ntamu wa va ka Israeli a nga hembi hambu ku hunzuluka, hakuva yena a hi munhu waku i ta hunzuluka.
30Saule aku: Mina nzi onhile! Kanilezi nzi dzunze makunu mahlweni ka masingalakati ya vanhu va mina, ni mahlweni ka va ka Israeli, u tlhela na mina, kasi nza fela ku ya khizama mahlweni ka Jehova Nungungulu wa wena!
31Zonake Samueli i lo tlhela a lanza Saule, na Saule i lo ya khizama mahlweni ka Jehova.
32Kanilezi Samueli i te ngalo: Nehani Agagi a hosi ya vaAmaleki laha ka mina! Agagi i loya kakwe na a tangele, hakuva Agagi i waku mbilwini yakwe: Hakunene a kubayiseka ka kufa ku hunzile.
33Samueli i te ngalo kakwe: Khwatsi hi lezi u nga dayetela zivanana za vavasati, zinghaho ni mamani wa wena ngha a nga hi na nʼwana. Zonake Samueli i lo phaphulela Agagi mahlweni ka Jehova le Gilgali.
34Zonake Samueli i lo tlhela aya le Rama. Yenawu Saule i lo tlhela aya kaya kakwe le Gibea wa Saule.
35Samueli a nga ha engetangi kambe a wonana na Saule kala siku ga kufa kakwe, hakuva Samueli i lo rilela Saule, hakuva Jehova i wa ti laya hi lezi a nga yimisa Saule a kuva hosi ya ka Israeli.
Currently Selected:
1 Samueli 15: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
