1 Samueli 12
12
1Samueli i te ngalo ka vontlhe va ka Israeli: Mina nzi ingisile a gezu ga nwina ka tontlhe timhaka leti mu nga nzi byela; nzi yimisile a hosi hehla ka nwina.
2Makunu a hosi leyi yi ta nga mu rangela hi leyi; kasike mina nzi khosahele, nzi na ni wuvu, kanilezi a vana va mina va kona xikari ka nwina. Mina nzi mu rangele kusukela wujaheni ga mina, kala legi siku.
3Hi mina loyi; nzi kustumunyeleni mahlweni ka Jehova ni mahlweni ka a totilweko wakwe. I nkavi ya mani nzi tekileko? I mbongola ya mani nzi tekileko? Himani nzi mu phangileko? Himani nzi mu xanisileko? Kutani ku ngava mani nzi amukeleko hi kakwe a nchumu wo nzi rengelela ke? Nzi ta mu tlhelisela. Miti. 20:33
4Vona va te ngalo: A ku gangi nchumu xa hina, a ku hi tsimbeketangi ni kambe a ku tekangi nchumu hambu ka munhu munwe.
5Yena aku kabye: Jehova hi mboni ya ku mu vukela, zinwe ni a totilweko wa yena r mboni legi siku ya lezaku a mu kumangi nchumu lomu canjeni ga mina. Vona vaku ngalo: A zive tano.
6Samueli i lo engeta aku ngalo ka vanhu: Hi Jehova loyi a nga yimisa Mosi na Aroni a ku humesa vararu va nwina tikweni ga le Gipite.
7Makunu sukani mu yima, kasi nza fela ku wulawula na nwina mahlweni ka Jehova hi zilo zontlhe zo lulama za Jehova, lezi a mu maheleko nwina ni vararu va nwina.
8Laha Jakobe a nga enghenile le Gipite, ni laha vararu va nwina va nga wa rilile ka Jehova, zonake Jehova i lo rumela Mosi na Aroni, lava va nga vona va humesileko vararu va nwina le Gipite, va va neha ka legi wutshamu. Gen. 46:6; Ekso. 2:23; Jox. 24:5
9Kanilezi laha va nga rivala Jehova, Nungungulu wabye, i lo va xavisa ka Sisera, a nduna ya yimpi ya Hazora ni ka vaFilistia, ni ka hosi ya vaMoabi, lava va va hlaseleko.
10Zonake va lo rila ka Jehova, vaku: Hi onhile, hakuva hi tsikile Jehova hi khozela maBaali ni maAxtarte. Kanilezi makunu hi tlhatlhise mandleni ya valala va hina, na hina hi ta ku khozela.
11Zonake Jehova i lo ruma Jerubaali, na Bedani, na Jefta, na Samueli, va mu ponisa mandleni ya valala va nwina lava va mu ranzeleko ka wontihe matlhelo, zonake mu tshama hi kurula,
12Laha mu nga wa wonile Nahaxi a hosi ya va ka Amoni, na ata ku ta mu vukela, mu te ngalo ka mina: Za hava, kanilezi a hosi yi ta hi fumela, laha Jehova Nungungulu wa nwina a nga wa hi hosi ya nwina.
13Makunu a hosi leyi mu nga yi hlawula, leyi mu yi kombelileko, hi leyi; Jehova i yi yimisile hehla ka nwina.
14Loku nwina mu chava Jehova, ni loku mu mu khozela, mu ingisa a gezu gakwe, mu nga ali zileletelo za Jehova, nwina ni hosi ya nwina leyi yi mu fumelako, mu ta maha valanzeli va Jehova Nungungulu wa nwina.
15Kanilezi loku mu nga ingisi a gezu ga Jehova, ni loku mu ala zileletelo zakwe, zonake a canja gakwe gi ta mu vukela, khwatsi hi lezi gi nga wa vukela vararu va nwina.
16Makunu yimani laha, mu ta wona a xihlamaliso xa hombe, lexi Jehova a ta nga xi maha mahlweni ka nwina.
17A hi gona siku ga ku hula mavele nyamutlha ke? Mina nzi ta kanyuluka ka Jehova lezaku yena a rumela a kudzinza, ni ku nisa a vula, kasi nwina mu ta zi tiva ni ku wona a wukulu ga xionho xa nwina mahlweni ka Jehova, hi lezi mu nga kombela hosi.
18Zonake Samueli i lo kanyuluka ka Jehova, na Jehova i lo rumela kudzinza, a nisa vula lego siku; a vanhu vontlhe va lo mu chava nguvu Jehova na Samueli.
19Makunu vontlhe vanhu va te ngalo ka Samueli: Kombelela malanza ya wena ka Jehova Nungungulu wa wena, kasi hi ngafi, hakuva hi engetele kuonha ka hina hi lezi hi nga ti kombelela hosi.
20Samueli i te ngalo ka vanhu: Mu nga chavi. Hakunene mu mahile kubiha, ntsena lezaku mu nga tsiki ku lanzela Jehova, kanilezi khozelani Jehova hi timbilu ta nwina tontlhe.
21Mu nga dzuki mu hambuka, mu lanzela a zilo zi nga nyawuliko, lezi zi nga vuniko nchumu, ni lezi zi nga ponisiko, hakuva zilo zi nga nyawuliko.
22Hakuva Jehova a nga ta tsika a vanhu vakwe, hi kota ya vito gakwe ga hombe, hakuva Jehova zi mu xalalisile a ku mu maha a vanhu vakwe.
23Kasike loku ku hi mina, a zive kule na mina ku gohela Jehova, hi ku tsika ku mu khongelela, kanilezi nzi ta mu gonzisa a ndlela yi nene ni ya nongameto.
24Ntsena lezaku chavani Jehova, mu mu khozela hizinene hi timbilu ta nwina tontlhe; hakuva cuwukani mitiro ya hombe leyi a yi mahileko xikari ka nwina.
25Kanilezi loku nwina mu simamisa ku maha kubiha, nwina ni hosi ya nwina mu ta lobyiswa.
Currently Selected:
1 Samueli 12: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
