1 Samueli 10
10
1Zonake Samueli i lo teka a xikudzana xa mafura a xi chulula laha hlokweni ka Saule, a mu pswopswa, aku: Hakunene Jehova i ku totile hi mafura lezaku u maha hosi hehla ka tshomba yakwe!
2Inyamutlha lezi u ta nga hambana na mina u famba, u ta kumana ni vanhu vambiri le tsizeni ga Rakeli, le mbhinganweni wa Benjamini le Zelza. Va ta ku byela ku ngalo: A timbongola leti u nga wa ti lava ti kumilwe. Makunu a raru wa wena a nga ha vileli hi mhaka ya timbongola, kanilezi i vilela ha nwina, aku: Nzi ta maha yini hi nʼwana wa mina? Gen. 35:19; 1 Sam. 9:5
3Ku suka hi laho u taya mahlweni kala u chikela laha ka kuhlu wa le Tabori. Laho u ta tlhangana ni vanhu vanharu na va kanziha vaya Beteli ka Nungungulu; munwe na rwele zimbutana zinharu, a munwani na rwele zibaba zinharu, a wa wunharu na rwele a kwama wa vinya.
4Va ta ku losa, va ku nyika zibaba zimbiri; u ta zi amukela lomu canjeni gabye.
5Anzhako ka lezo u ta ya chikela Gibea-Elohim, laha ku nga ni yindlu ya varinzeli va vaFilistia. Makunu a xikhati U enghenako mutini, u ta tlhangana ni ntlawa wa vaprofeti na va relela hi le wutshanwini gi tlakukileko, na va hi ni timbila, ni ngoma, ni maxava, ni zitende, na va kari va profeta.
6A Moya wa Jehova wu ta enghena ka wena hi ntamu, u ta profeta zinwe navo, u ta hunzuluswa u maha munwani munhu.
7Makunu laha zi ta nga maheka lezi zikombiso ka wena, u ta maha lezi zi ta nga woneka khwatsi ka wena, hakuva Nungungulu i zinwe na wena.
8Wena u ta ranga uya le Gilgali, zonake minawu nzi ta ku lanzela nzi ta maha munyikelo wa kuhiswa ni miphahlo ya kurula. U ta ya nzi rinzela leyo 7 wa masiku, kala nzi chikela; zonake nzi ta ta ku byela lezi u faneleko ku zi maha.
9Laha Saule a nga wa sukile a fularela Samueli, Nungungulu i lo mu hunzulusa a mu nyika yinwani mbilu, ni zontlhe zikombiso lezo zi lo maheka ka yena lego siku.
10Laha va nga wa chikele le Gibea, a ntlawa wa vaprofeti wu lo tlhangana naye, zonake a Moya wa Nungungulu wu lo enghena kakwe hi ntamu, yena i lo profeta xikari kabye.
11Makunu vontlhe lava va nga wa mu tiva hi kale, laha va nga mu wona na a kari a profeta ni vaprofeti, va lo wulawula, vaku: Zini zi humeleleko ka nʼwana Kixi? Kasi Saule i lomu xikari ka vaprofeti?
12Zonake a munwe wabye i lo hlamula, aku: Himani raru wabye? Hikwalaho a gezu lego gi lo hunzuka gi maha tsheketo waku: Kasi na Saule i lomu xikari ka vaprofeti?
13Laha Saule a nga wa gumesile ku profeta, i loya le wutshanwini gi tlakukileko.
14Zonake a hahani wa Saule i te ngalo kakwe ni ka nanza gakwe: Mu wa hi kwihi? Yena aku: Hi wa fambile hi lava timbongola; kanilezi laha hi nga wona lezaku ha ti vumala, hi loya ka Samueli.
15A hahani wa Saule aku: Nzi byele lezi Samueli a nga ku byela zona.
16Saule aku kakwe: I hi byelile ziku dlunya lezaku a timbongola ti kumilwe. Kanilezi hi tlhelo ga timhaka ta wuhosi, a nga kumbukangi lezi Samueli a nga wula.
17Makunu Samueli i lo tsombanyisa a vanhu mahlweni ka Jehova le Mizpa;
18aku ka va ka Israeli: Jehova Nungungulu wa ka Israeli i ngalo: Mina nzi humesile Israeli le Gipite, nzi mu ponisa canjeni ga vaGipite, ni canjeni ga tontlhe tihosi leti ti nga wa mu xanisa.
19Kanilezi inyamutlha mu alile Nungungulu wa nwina, loyi a nga mu ponisa timhangweni ta nwina tontlhe, ni le kuxanisekeni ka nwina, muku kakwe: Hi yimisele hosi leyi yi ta nga hi fumela! Makunu humelelani mahlweni ka Jehova hi tixaka ta nwina ni matala ya nwina.
20Zinghaho Samueli i lo tshineta tontlhe tixaka ta ka Israeli; ku si hlawuliwa a lixaka la ka Benjamini.
21Zonake i lo tshineta lixaka la ka Benjamini hi mingango yabye, zonake a ngango wa ka Matri wu lo hlawulwa, zonake Saule nʼwana Kixi i lo hlawulwa. Va lo mu lava, kanilezi a nga kumiwangi.
22Va lo nonohisa va wutisa ka Jehova, vaku: A munhu loye i tata laha kambe ke? Jehova aku ngalo: Hi gaya, i fihlele lomu ka zibya.
23Zonake va lo tsutsuma va ya mu teka, a ta yima xikari ka vanhu vontlhe. I wa lehile ku hunza vanhu vontlhe.
24Samueli aku ka vontlhe vanhu: Cuwukani loyi Jehova a mu hlawulileko! A ku na munhu lomu tikweni gontlhe wo fanana naye. A vanhu vontlhe va lo hlalela hi kutsaka, vaku: A yi hanye hosi!
25Zonake Samueli i lo hlawutela ka vanhu a timhaka ta mufumo, a ti tsala bhukwini, a gi veka mahlweni ka Jehova. Samueli i lo fambisa vanhu, loyi ni loyi aya kaya kakwe.
26Yenawu Saule i loya kaya kakwe le Gibea, zonake a vavanuna lava va tsumbekileko, lava Nungungulu a khumbileko timbilu tabye, va lo famba naye.
27Kanilezi a vanwani lava vo biha, va te ngalo: Xana loyi munhu i ta hi ponisisa kuyini? Va lo mu kanyisa, va nga nehi nzuvo kakwe. Kanilezi Saule a nga wulangi nchumu ha zona.
Currently Selected:
1 Samueli 10: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
