1 Tihosi 18
18
1Makunu laha na ku hunzile masiku yo tata, a gezu ga Jehova gi lota ka Elija hi lembe ga wunharu, giku: Famba u ya ti kombisa ka Ahabi, zonake nzi ta nisa vuta laha misaveni. Jak. 5:17
2Zonake Elija i lo suka a ya ti kombisa ka Ahabi. A ndlala yi wa hi ya hombe le Samaria.
3Zonake Ahabi i lo vitana Obadia, a muhlayisi wa yindlu yakwe. Obadia i wa hi munhu a chavako Jehova;
4hakuva xikhatini lexo Jezebeli a nga hlasela a vaprofeti va Jehova, Obadia i wa tekile a zana ga vaprofeti, a va avanyisa hi mitlawa mimbiri ya 50 a munwe, a va fihla lomu muhumeni, a va phamela ni ku va nwisa.
5Ahabi i te ngalo ka Obadia: Renzeleka a tiko gontlhe, u famba lomu tihlobyeni tontlhe ni lomu ka zicongwana zontlhe, kutani u ta kuma byanyi, kasi hi fela ku hanyisa a mahaxi ni timbongola, hi nga felwa hi zifuyo.
6Va lo avelana a tiko kasi va fela ku gi hlola. Ahabi i lo famba hi yakwe ndlela, Obadia a famba hi yakwewo.
7Makunu Obadia na hi laha ndleleni, i lo tlhangana na Elija. Obadia i lo mu tiva, awa hi nghohe yakwe, aku; Xana hi wena Elija hosi ya mina ke?
8Yena aku: Hi mina! Famba u ya byela a hosi ya wena, uku: Elija hi loyi!
9Obadia aku: Xa kuva xini nzi onhileko, lezi u nyikelako a nanza ga wena mandleni ya Ahabi, kasi a fela ku nzi daya!
10Nzi hlambanya ha Jehova Nungungulu wa wena a hanyako! Ku hava a tiko ni mufumo lomu a hosi ya mina yi nga rumangiko kona a vanhu a ku ya tava wena; ni loku vaku: A nga kona; a hosi yi lo hlambanyisa a tiko ni mufumo, va tiyisa lezaku a va ku kumangi.
11Ni lezi u nge ngalo: Famba u ya byela a hosi ya wena uku: Elija hi loyi!
12Loku nzi sukile, ku ta si dzuka kuta a Moya wa Jehova wu ta ku tlakula wu ku yisa laha nzi nga ku tiviko; nzi tava nzi tivisile Ahabi, a wuya a nga ku kumi, zonake a nzi daya. Kasilezo a nanza ga wena ga chava Jehova kusukela wunwananeni gakwe. 2 Tih. 2:16; Miti. 3:39
13Kasi a hosi ya mina a yi byelwangi lezi nzi nga zi maha a xikhatini lexo Jezebeli a nga hlasela vaprofeti va Jehova ke? Lezaku nzi tekile a zana ga vaprofeti va Jehova nzi va avanyisa hi mitlawa mimbiri ya 50 a munwe, nzi va fihla lomu muhumeni, nzi va phamela ni ku vaha mati.
14Ni lezi wena u nge: Famba u ya byela a hosi ya wena, uku: Elija hi loyi! I ta nzi daya.
15Elija aku: Nzi hlambanya ha Jehova wa tiyimpi a hanyako, loyi mina nzi nga xitiri xakwe! Inyamutlha nzi ta ti kombisa ka yena.
16Zinghaho Obadia i lo tlhangaveta Ahabi, a mu hlawutela timhaka leto. Zonake Ahabi i lo ya tlhangana na Elija.
17Laha Ahabi a nga wonile Elija, i te ngalo kakwe: Xana a hi wena muxanisi wa va ka Israeli ke?
18Yena aku: Mina a nzi xanisangi va ka Israeli, kanilezi hi wena ni yindlu ya raru wa wena, lezi mu tsikileko a milayo ya Jehova, mu lanzela Baali.
19Makunu rumela a vanhu va ya nzi tsombanyisela vontlhe va ka Israeli le xitsungeni xa Karmeli, zinwe nj 450 wa vaprofeti va Baali, ni 400 wa vaprofeti va Axtarte, lava va gako mezeni ya Jezebeli.
20Zinghaho Ahabi i lo ramba vontlhe va ka Israeli, a tsombanyisa ni vaprofeti le xitsungeni xa Karmeli.
21Elija i lota mahlweni ka vanhu vontlhe, a taku: Kala rini na ma ha yimile xikari ka maalakanyo mambiri ke? Loku Jehova a hi Nungungulu, mu lanzeleni; ni loku Baali a hi Nungungulu, lanzelani yena! A vanhu va lo miyela vaku hwi! Jox. 24:15; Vala. 6:31
22Elija i te ngalo ka vanhu: Hi mina nzoce nzi seleko a muprofeti wa Jehova, kasi a vaprofeti va Baali i 450 wa vona.
23Makunu hi nyikeni a tinkuzi timbiri; vona va ta hlawula yinwe, va yi tsemelela yi maha zitluwu, va yi tlhateka hehla ka tihunyi, kanilezi va nga dziveli nzilo. Minawu nzi ta longisa yinwani nkuzi, nzi yi tsemelela nzi yi tlhateka hehla ka tihunyi, nzi nga dziveli nzilo.
24Zonake nwina mu ta khongela ka nungungulu wa nwina, minawu nzi ta khongela ka Jehova. A nungungulu loye a ta nga hlamula hi nzilo, hi yena a nga Nungungulu. A vanhu vontlhe va lo hlamula, vaku: Hi zona, zinene lezo!
25Elija aku ka vaprofeti va Baali: Rangani nwina mu hlawula a nkuzi, mu yi longisa, hakuva nwina mu tele; mu ta khongela ka nungungulu wa nwina, kanilezi mu nga dziveli nzilo.
26Va lo teka a nkuzi leyo va nga wa nyikilwe, va yi longisa, va khongela hi vito ga Baali kusukela ni mixo kala hlikanhini, vaku: O Baali, hi hlamule! Kanilezi a va zwangi ni gezu ga ku hlamula. Zonake va lo ti tlatlalatela, va renzelekela a alati lego va gi mahileko. Hab. 2:19
27Zonake ni hlikanhi Elija i lo sangula ku va tseketsela, aku: Vitanani nguvu, hakuva i nungungulu! Kutani wa ha alakanyela, kutani i hambukile, hambu kuva a enzile, kutani kuva a etlele. Loku zi hi lezo, i fanele ku vuxiwa!
28Va lo rila hi gezu ga hombe, va ti tsemelela hi mikwana ni tikari, kala a nkhata wu xilila hehla kabye. Deut. 14:1
29Va lo simama va maha lezo kala ku hunza hlikanhi ku ya chikela xikhatini xa muphahlelo wa gambo; kanilezi cima a va zwangi gezu, ne ni ku kuma hlamulo, hambu ku wona nchumu. Ekso. 29:39; Mitse. 28:3
30Zonake Elija i te ngalo ka vontlhe vanhu: Tshinelani laha ka mina! A vanhu vontlhe va lo tshinela kusuhani kakwe. Va lo aketa a alati ga Jehova legi gi nga wa khungumulwe.
31Elija i lo teka a 12 wa maribye, ku ringana ni tsengo wa tixaka ta vanana va ka Jakobe, loyi Jehova a teku kakwe: A vito ga wena gi tava Israeli. Gen. 32:28; 30:10; Jox. 4:5, 20
32A maribye lawo i lo aka ha wona a alati vitweni ga Jehova; a kela a nkele matlhelweni wontihe ya alati, ku ringana tipimo timbiri ta timbewu.
33Loku a veketele a tihunyi, i lo tsemelela a nkuzi a yi tlhateka hehla ka tihunyi.
34Aku ngalo: Tatani mune wa tifuko hi mati mu chela hehla ka muphahlo wa kuhiswa ni hehla ka tihunyi. Va lo maha lezo. I lo engeta aku: Engetani kambe khati ga wumbiri. Va lo chela a khati ga wumbiri. A engeta kambe aku: Chelani kambe khati ga wunharu!
35Zonake a mati ma su hlafala matlhelo wontihe ya alati, a tata ni nkele wa kona.
36Zonake hi xikhati xa ku nyikela a muphahlelo wa gambo, muprofeti Elija i lo tshinela laha kusuhani, aku: Jehova, Nungungulu wa Abrahama, na Isaka, na Israeli, a zi tibyiwe inyamutlha lezaku wena u Nungungulu wa ka Israeli, ni lezaku mina nzi nanza ga wena, ni lezaku mina nzi mahile lezi hi kota ya kuleletela ka wena! Ekso. 3:6; Mat. 22:32
37Makunu nzi hlamule, Jehova, nzi hlamule! kasi a vanhu lava va ta zi tiva lezaku wena Jehova u Nungungulu loyi u tlheliseleko timbilu tabye.
38Zonake a nzilo wa Jehova wu lota wu ta mbhetisa a muphahlelo wa kuhiswa, ni tihunyi ni maribye, ni misava; wu pswonga ni mati ya lomu nkeleni. Levi 9:24; Vala. 6:21; 2 Kro. 7:1
39Laha vontlhe vanhu va nga wa zi wona, va lowa hi tinghohe tabye, vaku: Jehova i Nungungulu! Jehova i Nungungulu!
40Zonake Elija i te ngalo kabye: Khomani vaprofeti va Baali, ku nga poni ni munwe! Va lo va khoma. Zonake Elija i lo relela navo le xicongwaneni xa Kixoni, a ya va daya leyo. Deut. 11:5; 18:20
41Elija aku ka Ahabi: Suka u kanziha u yaga, unwa; hakuva ka zwala xiwuta xa vula ya hombe.
42Ahabi i lo kanziha a yaga, anwa; kanilezi Elija i lo kanziha le hehla ka xitsunga xa Karmeli, a ya korama lahasi, a veka nghohe yakwe xikari ka madzolo yakwe.
43Aku ka nanza gakwe: Kanziha u ya cuwuka hi tlhelo ga bimbi! Yena i lo kanziha a ya cuwuka, aku: A ku na nchumu! Elija aku: Famba kambe 7 wa zikhati!
44Makunu laha a nga wa yile 7 wa zikhati, i lo wuya a ta ku ngalo: Ka woneka a refanyana go ringana ni canja ga munhu, na gi tlakuka hi lomu bimbini. Zonake Elija i te ngalo: Famba u ya byela Ahabi, uku: Panisa a kareta ya wena u relela u famba, u nga ta valelwa hi vula.
45Ka xikhati xwalexo, a tilo gi lo fenengetwa hi marefu ni mheho, ni vula yi lona hi ntamu. Ahabi i lo kanziha kareteni yakwe aya le Jezreeli. Jak. 5:18
46Ni canja ga Jehova gi wa hi hehla ka Elija; na yena i lo ti boha xiwunu a tsutsuma mahlweni ka Ahabi kala nyangweni ya Jezreeli.
Currently Selected:
1 Tihosi 18: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
