Zakariya 10
10
Situmbiso ga va na Israyeli
1Lombani ndzadzi ga Pfhumu Nungungulu gikhatini nya gilimo,
kholu Uye khuye a girago mabara ni gulasa
ni gu wisa dzindzadzi nya dzikhongolo,
yi nonisa wulime,
a ninga ga moyo ni moyo mihandro ya thembweni gwaye.
2 # Wona gambe: Mat 9:36; Mark 6:34. Kholu sihuru nya mipaso ya ndrangani kha si ganeli gilo nya gupwale;
va nya dzisolo va gu lola malipha; va nya miloro va gulora ni gutshamusela silo nyambaya khumo;
va tangadzisa khu silo nyambana gighelo.
Khu kharato, vathu va gu pengiswa kha nga tshambi nya dzinvuta,
va tshaniseka khu gumbana muhavisi.
Gutshulega ni guwuya ga Israyeli
3Likhulo langu la gu vbisela vahavisi,
eni nyi na tsayisa vathangeli;
aholu Pfhumu Nungungulu nya Tshivba Yatshavbo
a nata sayisa tshambi waye,
a gu vathu va Judha, a nga va gira kha nga kavalu yaye
nya tshivba nyimbitunu.
4Khavbo ga Judha gu na duga giwindri nya gutiye gi vegwa vbakhonatunu;
khavbo gwaye gu na duga lidingo nya tshatsha;
khavbo gwaye gu na duga wulaho nya nyimbi;
khavbo gwaye gu na duga vafumeli vatshavbo khu gumogo.
5Na va patane vatshavbo va na fanana ni dzindrena nyimbitunu
dzi gandredzelago valala maragani ya dzindzilani;
kholu Pfhumu Nungungulu womo vbakari gwawe,
aholu a na thela dzitshoni vale va khiledego dzikavalu.
6Nyi na ninga tshivba nyumba ya Judha,
nyi wuya nyi vbanyisa nyumba ya Josefa,
eni nyi na va wuyisa nyaluphye,
kholu nyi ngu va pwela wusiwana.
Va na gira gukhwatshi gima kha nya nga va diga,
kholu eni kheni Pfhumu Nungungulu wawe,
nyi na va ninga phindrulo.
7Va na Efrayimi va na khala kha nga ndrena,
myonyo yawe yi na nengela
gukhwatshi va di sela vbinyu.
Ina, sanana sawe si na wona satshavbo sesi,
si nengela.
Myonyo yawe yi na tsakela Pfhumu Nungungulu.
8Nyi na womba ndrodzi nyi va tshanganisa nyaluphye,
kholu nyi va dzegiside;
va na wuya gambe va tala kha idzo va nga bani
varomo khidzo guhegulani.
9Nyi na va phalalegisa vbakari nya mahundzu,
khu mayigoni ga hwindzo va na nyi dundruga,
va na vbanya gumogo ni sanana sawe, khu hwane va na wuya.
10Nyi na va gira va wuya khu tigoni ga Egipito,
nyi na va tombanisa va duga tigoni ga Asiriya,
nyi na va dzega nyi va yisa tigoni ga Gileyadhi ni Libhanoni,
ga avo gu na bani guri mwalo wulanga nya guenele.
11Avo va na tsemakanya yiphwa nya sitshaniso,
a na veta mavimbi nya yiphwa,
milondrwa nya guete nya tsongo wa Nilo yi na banga.
Khavbo avbo, ma na vbela matshandza yatshavbo ya Asiriya,
yi duswa ni ndranga nya wufumu wa Egipito.
12Eni nyi na va tiyisa tshivbani ga Pfhumu Nungungulu,
va na gimbila linani gwangu;
a ngu ganela Pfhumu Nungungulu.
Currently Selected:
Zakariya 10: BGE2014
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
