Mikeya 1
1
I. SITHUSATHUSA
Gitiviso ga Israyeli ni Judha khu kotani nya mithumo yawe nya guvivbe
1 # Wona gambe: 2 Dzipf 15:32-38; 2 Dzik 27:1-7. Aya khu magana ya Pfhumu Nungungulu ma ngata ga Mikeya, wa Morasita, matshiguni ya Jotamo, vafumeli va Judha, na ma guta khu giwoniso a wonisidwego khu kotani ya Samariya ni Jerusalema.
2Upwani enu mayigo yatshavbo,
tulani dzindzeve mu yingise,
uwe litigo ni satshavbo si guromo umo,
Mune Pfhumu Nungungulu, a na khale fakazi vbakari gwanu,
Uye Pfhumu gukhugela khu nyumbani gwaye nya gukatege.
3Kholu, wonani nya gukhenu
Pfhumu Nungungulu a ngu duga khu wulangani gwaye.
A na tshiga ata gimbila khu vbatshani nya sigomo sa mafuni.
4Sigomo si na nyiviliga vbavbatshi nya migondro yaye,
ni mikova yi na tulega nga mafura vbavbatshi nya nilo,
kha nga mati ma gogago releloni ma khala nondrwa.
5Satshavbo si na girega khu kotani nya guyeyise ga Jakobe
ni sighoho sa nyumba ya Israyeli,
khu gevbini gighoho gya Jakobe?
Ina khandri Samariya?
Khu wevbini wulanga nya miphaso nya vanungungulu
nya malipha va Judha?
Khandri Jerusalema, gani?
6Khu guralo, nyi na gira gu Samariya
a khala litala nya siwindri sa khabini,
wulanga nya gu yale misimbo nya vhinya;
siwindri saye si na thindriligela kovani,
kala nyi tugula giseketelo gyaye.
7Sithombe saye satshavbo nya guvatwe,
si na khungumuledwa
ni satshavbo iso a nga bhindzulago khu wuphuphulu, si na dagarela khu nilo,
sithombe saye satshavbo si na khungumuledwa,
kholu uye a si wungedzede khu tengo nya wuphuphulu,
kha nga hakhelo nya wubhayi waye.#1:7 Vanyamayi vava va di gu khala dzinyumbani nya nombelo dza Vakhanani, umo va nga bani va khozedwa vanungungulu nya malipha. Va di gu pimisa gukhavo, gu bhaya navo, mafu ma na ninga gwadi mihandro ni sifuyo si na velegelana ngudzu.
8Khu kotani nya isoso, nyi na lila nyi bwelo khavbo nyipwa wuvi,
nyi gimbila wumbwiri ni gumba ambala silato,
nyi na lila nga lisolwa, nyi womba huwa kha nga dzimbowa.
9Kholu gilondra gyaye khya gimange,
gi vbohide kala Judha;
gi endrelega kala dzinyangwani dza vathu vangu, gi vboha kala Jerusalema.
10Mu nga tivisini isoso tigoni ga Gati,
gambe mu nga lili ngudzu.
Puluwundrani ngumani, enu vavbanyi va Bheti-Leyafira.#1:10 Umo nya sindrimana, gukhugela 10 kala 14, muprofeti a gu ganela khu madhoropa ma na dhumedwago khu valala kala Jerusalema.
11Dugani wumbwiri na mu tade khu dzitshoni,
enu vavbanyi va Safiri;
vavbanyi va Zahanani kha va na duga khu dhoropani gwawe;
mwa gupwani gililo gya vathu va Bheti-Ezeli,
pimani gukhenu mwalo gambe lipindru nya gu mi phaseni.
12Kholu vathu va vbanyago Maroti
vomo guvbisegani nya gukhongolo ngudzu
na va gu lirela guvbanyiswa,
aholu kha va na gu mana;
kholu libango leli li rumedwe khu Pfhumu Nungungulu,
li vboha kala vbanyangwatunu ga Jerusalema.
13Enu vavbanyi va Lakisi, hungani mipatwa nya dzikavalu vbadzikaretatunu,
(ogu khu guphela nya gughohe ga nyamahegyane wa Siyoni)
kholu avbo gwanu gu manegide sighoho sa Israyeli.
14Khu kotani nya isoso mu na ningela miningelo nya guvbanganane ga Moreseti-Gati;
dzinyumbani dza Akizebhi
dzi na wonega kha nga wukanganyisi ga vafumeli va Israyeli.
15Nyi nga na gu mu resela uye a na guta mu wandrela mufumo wanu
enu vavbanyi va Maresa;
wudhumo wa Israyeli wu na vboha kala Adhulamo.
16Vbalulani ndzudzu hungoni,
mu lila sanana sanu mu si golago;
vbalulani mihungo yanu yi fanana ni uwo nya lighama,
kholu sanana sanu si dzegidwe si yiswa wugumbini.
Currently Selected:
Mikeya 1: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
