Matewu 1
1
Linyangwa la Jesu
(Luka 3:23-38)
1Longoloko nya lihundzu la Jesu Kristo, Gyanana gya Dhavhidhe, Gyanana gya Abrahama. 2Abrahama a di velega Isaki; Isaki a velega Jakobe; Jakobe a velega Judha ni vandriyaye; 3Judha a velega, ni Tamari, Peresi ni Zera; Peresi a velega Esrome; Esrome a velega Aroni; 4Aroni a velega Aminadhabhi; Aminadhabhi a velega Nasoni; Nasoni a velega Salimoni; 5Salimoni a velega, ni Rahabhi, Bhowazi, Bhowazi a velega, ni Rute, Obhedhi; Obhedhi a velega Jese; 6Jese a velega mufumeli Dhavhidhe.
Dhavhidhe a velega, ni ngadza Uriya, Solomoni; 7Solomoni a velega Rohobhowamu, Rohobhowamu a velega Abhiya; Abhiya a velega Asa; 8Asa a velega Josafati; Josafati a velega Joramo; Joramo a velega Oziya; 9Oziya a velega Jothamo; Jothamo a velega Akazi; Akazi a velega Ezekhiya; 10Ezekhiya a velega Manasi; Manasi a velega Amoni; Amoni a velega Josiya; 11Josiya a velega Jekoniya ni vandriyaye, gikhati va nga vbagedwago va gu yiswa Bhabhiloni.
12Na va wide khu Bhabhiloni, Jekoniya a di velega Salatiyeli; Salatiyeli a velega Zorobhabheli; 13Zorobhabheli a velega Abhiyudi; Abhiyudi a velega Eliyakimi; Eliyakimi a velega Azore; 14Azore a velega Sadhoki; Sadhoki a velega Akhime; Akhime a velega Eliyude; 15Eliyude a velega Eliyazari; Eliyazari a velega Matani; Matani a velega Jakobe; 16Jakobe a velega Josefe, mwama wa Mariya, a gu uye a nga velega Jesu, a ranwago Kristo.
17Khu kharato, mimela yatshavbo, gukhugela Abrahama kala Dhavhidhe, likhumi na mina mimela. Gukhugela Dhavhidhe kala guvbagedwa gwawe va gu yiswa Bhabhiloni, likhumi na mina. Gukhugela guvbagedwa gwawe kala Kristo, likhumi na mina mimela.
Guvelegwa ga Jesu Kristo
(Luka 2:1-7)
18Guvelegwa ga Jesu Kristo gu di girega, kharati: Mariya mayi waye, a nga bani a tumbisidwe khu Josefe, a di khura mimba khu tshivba nya Liphuvbo nya Guage, nasi gu tshangani ni mwama waye. 19Khavbo avbo, Josefe mwama waye, a nga bani ari muthu nya ndruda, kha nga vbweta gu mu thela dzitshoni; a di vbweta gu mu hula khu gisihaledza.
20Na nga gu vinga mano yakone, a di tumbulugedwa khu ngilozi ya Pfhumu khu ndroroni, yita, khiyo: “Josefe, mwamana wa Dhavhidhe, u nga kanakani gu hakha Mariya, mwangadzi wago, kholu mimba a gu nayo khya Liphuvbo nya Guage. 21Uye a na velega gyanana nya gikhwathana u na gi thangisago lina la Jesu, kholu gi na vbanyisa vathu vaye musighohoni sawe.”
22Satshavbo sesi si giregide, gasi gu landrisa iso si nga ganedwago khu Pfhumu, si gu tiviswa khu muprofeti, khuye: 23“Dzitini nya gukhenu gyagadzyana nya mbiri gi na khura mimba, gi velega gyanana nya gikhwathana gi na ranwago gupwani khigyo Emanuweli” (gu tshamusago, gupwani: “Nungungulu womo vbakari gwathu.”) 24Na khendzugide khu ligovbeni, a di gira kha nga idzo a nga embedwago khidzo khu ngilozi ya Pfhumu a gu hakha mwangadzi waye. 25Nasi gu hengeli naye lidawu, a di velega gyanana gyaye nya gikhwathana, igyo a nga gi thangisago lina la Jesu.
Currently Selected:
Matewu 1: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.