Levhi 17
17
II. NAYO NYA GUAGISE
Nayo nya gupaye sirengo nya miphaso
(Levhi 17:1—26:46)
1 Pfhumu Nungungulu a di embela Mosi, khuye: 2“Ganela ga Aroni ni sanana saye, ni sanana satshavbo sa Israyeli, u va embela, khuwe: Aya khu mahungu ya Pfhumu Nungungulu a nyi rumidego gu mi embela: 3Ni wevbini wa ndrangani ga Israyeli a payago mombe, mwendro nvuta, mwendro phongo, ndrani nya lizumbo mwendro vbavbandze nya lizumbo; 4nyamba phela khu gu yi dzega a hongola nayo nyangwatunu nya Tshatsha nya Tshangano, gasi aya yi bikela ga Pfhumu Nungungulu, mbeli nya Wulanga nya Guage, a na ningwa nandru nya guvbaladze novba; khu gu na vbaladzide novba, a na fuviswa vbakari nya vathu vaye. 5Khu kharato, sanana sa Israyeli, si olovedego gu paya sirengo nya miphaso vbavbandze, si fanede gu yisa sirengo sawe ga muphasi nya mhamba a si bikela ga Pfhumu Nungungulu. A na si paya nyangwatunu nya Tshatsha nya Tshangano, a gira ningelo nya phaso nya pwanano nya gurungudze Pfhumu Nungungulu. 6Muphasi nya mhamba a na mitegedzela novba vbagiluvelotunu gya Pfhumu Nungungulu, nyangwatunu nya Tshatsha nya Tshangano, a na vbisa mafura a gira mhamba nya gunungele gwadi yi salalegisa Pfhumu Nungungulu. 7Gima kha va na nga ningela gambe sifuyo sawe, va girela miphaso vanungungulu vawe nya vamabhongwe#17:7 Vanungungulu nya vamabhongwe, “Sátiros” a diri maphuvbo nya gufananiswe ni vanyamabhongwe, va na Israyeli va di khodwa gukhavo maphuvbo yoyo ma gu vbanya giwulani. Azazeli a diri Satiro, khu Gihebheru pwani: “Se-trim”. va vbanyago navo. Va fanede gu sayisa nayo yoyu, avo ni situgulwana sawe, khu mimela ni mimelana kala gupindruga. 8U na va embela gambe, khuwe: Muthu watshavbo wa nyumbani ga Israyeli, mwendro valuveli va vbanyago vbakari gwawe a na ningelago phaso nya guvbiswe, ambari wuri wumbe phaso, 9nyamba phela khu gu bikela girengo gyakone nyangwatunu nya Tshatsha nya Tshangano, gasi gu ningela ga Pfhumu Nungungulu, muthu yoyo a na fuviswa vbakari nya vathu vaye.”
Guloledziswa guhodza novba
10“Gani khu wevbini muthu wa nyumbani ga Israyeli, mwendro valuveli va vbanyago vbakari gwawe, a na hodzago novba, gani lifumbu muni, nyi na mu wugela muthu yoyo a hodzago novba, nyi mu fuvisa vbakari nya vathu vaye. 11#Wona gambe: Hebh 9:22. Kholu guvbanya nya mili gomo novbani; nyi mu ningide novba gasi mu agisa khuwo guvbanya gwanu vbagiluvelotunu, gasi guditshedzwa mihefemulo yanu, kholu novba wu na ni tshivba nya guagise guvbanya gwanu. 12Khu guralo, nyi embede sanana sa Israyeli, kheni: Gu nga manegi ni moyo basi vbakari nya sanana sa Israyeli ambari va nya guta va vbanyago vbakari gwawe a na hodzago novba. 13Ni wevbini muthu vbakari nya sanana sa Israyeli, mwendro valuveli va vbanyago vbakari gwanu, a sotago girengo nya likhabi mwendro ginyoni nya esi si dzumedziswago gu hodzwa, a na vbaladze novba wakone a wu futela khu mafu. 14#Wona gambe: Gen 9:4; Levh 7:26-27; 19:26; Dhet 12:16,23; 15:23. Kholu guvbanya nya mili gomo novbani gwaye, khidzo kharato nyi nga embela sanana sa Israyeli, kheni: Mu nga hodzini novba ni wa gevbini girengo, kholu guvbanya gwaye gomo novbani gwaye. Oyu a hodzago novba a na fuviswa vbakari gwawe. 15Muthu watshavbo, gani givelegwa mwendro muluveli, a gu hodza girengo nya gufe gyabune, mwendro nya gusongwe khu sirengo nya likhabi, a na handza guambala gwaye, aya hamba matini, ambari ulo a na nyenyeza kala gupfolani nya lidambo; hwane nya ugo, a na aga. 16Aholu, a gumba handza guambala gwaye ni gumba hamba mili waye, a na rwala gulemela nya nandru waye.”
Currently Selected:
Levhi 17: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
