Levhi 10
10
Gufa ga Nadhabhi ni Abhiyu
(Mitengo 3:1-4; 16:1-35)
1Sanana sa Aroni, Nadhabhi ni Abhiyu, moyo ni moyo a di phara gyombo gyaye nya guvbisele umo libani, va vega umo magala nya nilo, va thela libani khu vbatshani, va bikela ga Pfhumu Nungungulu nilo nyambasi uwo, va gira esi Uye a ngamba va leletela. 2Khavbo avbo, gu di duga nilo khu ga Pfhumu Nungungulu, wu va vbisa vafa mbeli ga Pfhumu Nungungulu. 3Mosi a di embela Aroni, khuye: “Khiso esi a nga tivisago Pfhumu Nungungulu, gikhati a nga khuye: Nyi ngu wonegisa guaga gwangu ga vale va guromo vbafuvbi gwangu, ga vathu vatshavbo nyi ngu nonedza wudhumo wangu.” Aroni a di degula. 4Mosi a di rana Misayeli ni Elizafani, sanana sa Uziyeli babe dugwane wa Aroni, a va embela, khuye: “Deluni muta dzega vandriyanu mbeli nya wulanga nya miphaso, mu va dusa vbavbandze nya lizumbo.” 5Avo va di hidzimela, va ta va ndrindra khu dzingandzu dzawe va gu va dusa vbavbandze nya lizumbo kha nga idzo va nga embedwago khidzo khu Mosi.
6Mosi a di embela Aroni ni sanana saye, Eliyazari ni Itamari, khuye: “Mu nga vbalulini ndzudzu mu pferula dzingandzu dzanu mwendro gumba samula, kholu mwa gu gira kharato, mu nafa, mu wusa likhulo la Pfhumu Nungungulu li vbisela tshangano watshavbo. Digani vandriyanu ni ndranga ya Israyeli va lila vale Pfhumu Nungungulu a va mbembisidego khu nilo. 7Mu nga khugi khu nyangwani nya Tshatsha nya Tshangano; mwa gu khuga, mu nafa, kholu mu todzidwe mafura ya Pfhumu Nungungulu. Avo va di landrisa esi va nga embedwa khu Mosi.”
8Khavbo avbo, Pfhumu Nungungulu a di embela Aroni, khuye: 9“Wa guta bela Tshatshani nya Tshangano, u nga seli vbinyu mwendro wadwa nya guvave, uwe ni sanana sago, kholu wa gu sela u nafa. Oyu nayo nya gupindruge ga sanana sanu, 10gu vbwetega mu kodza gu hambanisa esi si agisidwego ni esi si ngamba agiswa, esi si tshambidego ni esi si nyenyezidego, 11gu vbwetega mu hevbudza sanana satshavbo sa Israyeli milayo yile Pfhumu Nungungulu a va ningidego khu mandzani ga Mosi.”
12Mosi a di embela Aroni ni sanana si nga mu tshalelago, Eliyazari ni Itamari, khuye: “Dzegani guhodza nya miphaso gu tshadego avbo nya miningelo yi vbisedwego Pfhumu Nungungulu, mu hodza nyamba thedwa mela; mu hodza vbafuvbi ni giluvelo kholu gilo gi agidego ngudzu. 13#Wona gambe: Levh 6:7-11. Mu na yi hodzela avbo nya wulanga wu agidego, kholu khigyo gipandre gi gu lumbago ni sanana sago avbo nya miningelo yi vbisedwego Pfhumu Nungungulu, kholu khidzo nyi nga leletedwago khidzo. 14Gasi khana yi ningedwego khu gu ndziwitedwa khu nayo nya bikelo, gumogo ni litundru li kasidwego, mu naya hodzani, uwe gumogo ni sanana sago nya vama ni vanyamayi, wulangani wu agidego, kholu mu ningidwe kha nga gipandre gyanu uwe ni sanana sago avbo nya mhamba nya miphaso nya pwanano yi duswago khu sanana sa Israyeli. 15#Wona gambe: Levh 7:30-34. Avbo nya litundru leli nya ndruwo ni khana nya nayo nya bikelo, mu na pata mafura ma fanelago guya vbiswa niloni gasi mu si ndziwitela khu nayo nya bikelo mbeli ga Pfhumu Nungungulu; si na lumba uwe ni sanana sago, kha nga idzo Pfhumu Nungungulu a rumidego khidzo.”
16Mosi a di vbweta guti ginani va giridego khu nyamabhongwe nya phaso nya ditshedzo, a wona gukhuye wu di vbiswa. Khavbo avbo, a di goroga ngudzu a vbenyela Eliyazari ni Itamari, sanana si nga tshalago sa Aroni, khuye: 17#Wona gambe: Levh 6:17-19. “Khu ginani mu ngamba hodzani, Wulangani nya Guage, miphaso nya ditshedzo a gu gilo gi agidego ngudzu? Pfhumu Nungungulu a mi ningide esi gasi mufela gu rwala sihoso nya tshangano, ni gu handza sighoho sawe mbeli ga Pfhumu Nungungulu.” 18Kha nga olu novba nya phongo yeyi wu ngamba yiswa Wulangani wu Agidego, gu di yela na mu hodzide nyama yakone Wulangani nya Guage, kha nga edzi nyi mi rumidego khidzo.
19Aroni a di hakha Mosi, khuye: “Avo va ngari gu ningela muhuno olu phaso wawe nya ditshedzo ni phaso wawe nya guvbiswe mbeli ga Pfhumu Nungungulu, kha nga eni neni nyi giridego kharato. Nari gupwani nyi di hodzide muhuno phaso nya ditshedzo, ina na wu hakhidwe gwadi wu salalalegisa Pfhumu Nungungulu, gani?” 20Mosi na pwide mahungu yaya a di salalega.
Currently Selected:
Levhi 10: BGE2014
Highlight
Share
Copy
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
