Agewu 2

NOMBELO NYA WUVILI

Wugulu nya nyumba nya yiphya ya Nungungulu

1Khu litshigu nya magumavili na limwedo nya ngima nya livbandre na wuvili, lito la Pfhumu Nungungulu li dita khavbo ga muprofeti Agewu li ta mu embela, khilo: 2“Ganela olu ga Zorobhabheli, mwamana wa Salatiyeli, mwamangulu wa Judha, ni ga Josuwa, mwamana wa muphasi nya khongolo nya mhamba Jozadhaki, gumogo ni ga mitshaledwa nya vathu, khuwe:

3 # Wona gambe: Ezek 3:12. Khu mani vbakari gwanu, enu mu tshadego,

a nengedego khu gu wona wumburi nya guhegule nya nyumba #2:3 Nyumba nya wumburi nya nombelo yi vbahidwego khu Solomoni yi di khungumudwe hwane nya livbandre na mavili magumi myaga. yeyi?

Olu mwa gu yi wona kharini?

Kha mu yi woni kha nga khwatshi khandri ya gilo mahoni gwanu, gani?

4Khu guralo, olu dzi garadze uwe Zorobhabheli;

a ngu ganela Pfhumu Nungungulu,

dzi garadze nuwe Josuwa, mwamana wa muphasi nya khongolo nya mhamba Jozadhaki,

dzi garadzeni nenu vathu vatshavbo va tigoni,

a ngu ganela Pfhumu Nungungulu, thumani;

kholu eni nyi womo gumogo nanu;

a ngu ganela Pfhumu Nungungulu nya Tshivba Yatshavbo.

5Kha nga gidzumeledzwano nyi giridego nanu,

gikhati mu dugidego khu tigoni ga Egipito,

Liphuvbo langu li ngu vbanya #2:5 Wona gambe: Eks 29:45-46. vbakari gwanu; mu nga thavi gilo.

6 # Wona gambe: Hebh 12:26. Kholu Pfhumu Nungungulu nya Tshivba Yatshavbo a ngu ganela kharati, khuye:

Khu gikhati gidugwana,

Eni nyi na tsekatsekisa ndzadzini, litigo, linene ni mafu nya gubange.

7Nyi na tsekatsekisa mayigo yatshavbo,

gasi ma rese eno dzithomba dzawe dzatshavbo;

nyi na tadza nyumba yeyi khu wudhumo; a ngu ganela Pfhumu Nungungulu nya Tshivba Yatshavbo.

8Parata ni ndralama sa gu lumba eni;

a ngu ganela Pfhumu Nungungulu nya Tshivba Yatshavbo.

9Wudhumo wa nyumba yeyi nya guhegise

wu na bani wuri wukhongolo guvbindra uwo wa iyo nya guhegule,

a ngu ganela Pfhumu Nungungulu nya Tshivba Yatshavbo;

wulanga wowu nyi na resa gurula,

a ngu ganela Pfhumu Nungungulu nya Tshivba Yatshavbo.”

NOMBELO NYA WURARU

Gitumbiso ni makategwa

10Khu litshigu nya magumavili na livbandre na mana nya ngima nya livbandre na wu na, khu mwaga nya wuvili nya gufume gwa Dhariyo, lito la Pfhumu Nungungulu, li dzude khu ga muprofeti Agewu, a ganela, khuye: 11“Pfhumu Nungungulu nya Tshivba Yatshavbo a ngu ganela kharati, khuye: Olu nga wudzisa vaphasi nya mhamba, mayelano khu nayo, khuwe: 12Muthu nya gukari a gu fumbela nyama nya gukategiswe umo nya tshoka nya ngandzu yaye, tshoka yoyo nya ngandzu yaye ya gu kuha gibaba, mwendro guhodza, mwendro vbinyu, mwendro mafura, mwendro gimbe gilo gi hodzwago, gi na katega nigyo, gani?” Vaphasi nya mhamba va di mu ninga phindrulo, khavo: “Ahihi.”

13 # Wona gambe: Mit 19:11-22. Khavbo avbo, Agewu a di va wudzisa gambe, khuye: “Ahati muthu a nga dzi nyenyezisa khu gu kuha girumbi, a gu kuha gimwegyo nya silo soso, si na nyenyeza niso, gani?” Vaphasi nya mhamba va di hakha, khavo: “Ina si na bani si nyenyezide.” 14Khavbo avbo, Agewu a di va ninga phindrulo a va embela, khuye: Si na girega kharato ga vathu vava, ni ga lifumbu leli, mbeli nya khovbe yangu, a ngu ganela Pfhumu Nungungulu; kharati thumo watshavbo wa mandzani gwawe, ni satshavbo vayago naso gu ya luva vbale, si nyenyezide!

15Gasi olu pimisani gwadi myonyoni gwanu, iso si mu dugelelago gukhugela litshigu leli guya mbeli, na gu si gu handzegwi giwindri vbatshani nya giwindri, Nyumbani ga Pfhumu Nungungulu. 16Khu hwane nya gikhati, muthu a guta gwela vbalitalatunu li gu ni magumavili mipimo a di ta mana basi likhumi mipimo, a guta umo nya miphongolo guta dusa livbandre magumi mipimo nya vbinyu, a nata mana basi magumavili. 17Nyi mi bayiside khu libara, ni gukunela, khu maralala, ni tungu nyi ghohetela thumo watshavbo wa mandzani gwanu, aholu mwalo ni moyo vbakari gwanu a bweledego eno gwangu; a ngu ganela Pfhumu Nungungulu. 18Nyi ngu mi lomba mu pimise gwadi, gukhugela muhuno guya mbeli, gukhugela litshigu nya magumavili na mana nya ngima nya livbandre na wu na kala litshigu gi nga emiswago khilo giseketelo nya Nyumba ya Pfhumu Nungungulu, pimisani gwadi khu silo sesi. 19Ina yi nga romo mbewu githungani, gani? Gu diga nya isoso, ambari mikandzu miromani kha yi nga gu ninga gambe mihandro. Aholu, gukhugela muhuno, Eni nyi na mi kategisa.

NOMBELO NYA WUNA

Gitumbiso gya Pfhumu Nungungulu ga Zorobhabheli

20Mahungu ya Pfhumu Nungungulu ma dita nya wuvili avbo ga Agewu, khu litshigu nya magumavili na mana nya ngima, a mu embela, khuye:

21Embela Zorobhabheli, mwamangulu wa Judha, khuwe: Nyi na tsekatsekisa ndzadzini ni mafuni, 22nyi na thesa sikhalo nya mifumo, nyi khungumula dzitshivba nya mifumo ya va nya mayigo, nyi khungumulela dzikareta ni vakhileli vakone, dzikavalu ni vakhileli vakone dzi na theswa, moyo ni moyo a na songwa khu litshari la ndriyaye.

23Khu litshigu lolo, a ngu ganela Pfhumu Nungungulu nya Tshivba Yatshavbo. Nyi na gu dzega uwe githumi gyangu Zorobhabheli, mwamana wa Salatiyeli, a ngu ganela Pfhumu Nungungulu. Nyi na gu gira kha nga phera nya gifungo; kholu nyi gu hathide, a ngu ganela Pfhumu Nungungulu nya Tshivba Yatshavbo.

Currently Selected:

Agewu 2: BGE2014

Highlight

Compare

Copy