Ezekiyeli 47
47
Mati ma dugago khu Nyumbani ga Nungungulu
(Jeremiya 3:18; Zakariya 13:1)
1 # Wona gambe: Zak 14:8; Joh 7:38; Gutu 22:1. Khu hwane nya esi, mwama a di nyi dzega a nyi bweledza vbamwanyatunu nya Nyumba ya Nungungulu, nyi di wona mati ma nga bani ma gu goga khu vbavbatshi nya nvunvuri nya Nyumba ya Nungungulu, ma hongola phuvbo ga Khugadambo; kholu mwanya nya Nyumba ya Nungungulu, wu di khedzide Khugadambo, mati ma di guta khu vbavbatshi, khu phuvbo ga nyamudye nya Nyumba ya Nungungulu, khu phuvbo ga Marandzi nya giluvelo. 2Uye a di nyi dzega khu mwanya wa Wuronga a nyi dzundrulugisa khu vbavbandze, kala mwanya wa vbavbandze, wu khedzidego phuvbo ga Khugadambo; nyi di wona mati na ma gu goga khu phuvbo ga nyamudye.
3Mwama wule a diya phuvbo ga Khugadambo, na pharide mandzani ngodzi nya gupime khiyo; a di pima likhumi mazana (1.000) mikono, a nyi vbindrisa khu matini, mati ma di gu nyi langaladza migondro. 4A di pima gambe likhumi mazana (1.000) mikono, a nyi vbindrisa khu matini, mati ma di gu nyi hegisela mudzikhumudzini; a di pima gambe likhumi mazana (1.000) mikono a nyi vbindrisa khu matini, mati ma di gu nyi hegisela giwununi. 5A di pima gambe yimbe likhumi mazana (1.000) mikono, a diri tsongo nyi nga bani nyi si wu kodzi ni gu wu tsemakanya, kholu mati ma di khugegide, ma khala nondrwa nya guyele gu tshatuga basi khu gu hamba mayaka. 6A di nyi wudzisa, khuye: “Mwamana wa muthu, u ngu si wona esi, gani?” Khavbo avbo, a di nyi dzega a nyi bweledza bambe nya tsongo. 7Na nyi vbohide vbale, nyi di wona misimbo nya yingi, khu phuvbo ga eno ni eno nya tsongo. 8Khavbo avbo, a di nyi embela, khuye: Mati yaya ma gu duga ma goga ma hongola phuvbo ga Khugadambo, ma relela kala kovani wa Joridhani, ma bela ga Yiphwa nya Gufe, ma guya vbaladza phwani, mati ya phwani ma na vbindrugedza ma khala mati nya gutshambe. 9Umo wu vbindrago khumo tsongo, gu na manega na ma romo mafumbo yatshavbo nya sirengo ni dzindzandzi. Kholu mati yaya ma gu goga guya iyoyo ma ya vbindrugedza mati nya yiphwa ma khala mati nya gutshambe. Gasi gwatshavbo umo wu vbindrago khumo tsongo, satshavbo si na mana womi. 10#Wona gambe: Umo nya sindrimana nya 15, 19, 20, numo nya gipimo 48:28. Gu na manega vagogi funguni gwatshavbo nya yiphwa; gukhugela Eni-Gedhi kala Eni-Egilayimi gu na manega wulanga nya guladze dzikhoga; dzindzandzi dzi na bani dziri dza mafumbo nya mangi, gu fanana ni dzindzandzi dza linene. 11Aholu milonga ni sikhele saye, mati yakone kha ma na nga lombela; ma na dunga gasi vathu va kodze gu mana munyu umo. 12#Wona gambe: Gutu 22:2.Vbafuvbi ni tsongo, khu bambe ga eno ni eno, gu na buga misimbo nya mafumbo yatshavbo nya guninge mihandro nya guhodzwe; mahagane yaye kha ma na nga wu na, gambe kha gu na hamugega mihandro yaye; khu migima yaye, yi na velega mihandro nya yiphya, kholu mati yaye ma gu duga khu nyumbani nya guage; mihandro yaye yi na khala guhodza, mahagane yaye ma khala rendre.”
Mivbingano nya litigo la Israyeli
(Genesi 49:5; Mitengo 34:2; Josuwa 17:17)
13Mune Pfhumu Nungungulu, a ngu ganela kharati, khuye: “Eyi khiyo mivbingano nya litigo la Israyeli mu na kabanelanago kha nga thomba, gukhedza khu likhumi na mavili mahundzu ya Israyeli. Josefe a na mana sipandre sivili.#47:13 Josefe a di velega sanana sivili, Manasi ni Efrayimi, khu guralo lihundzu laye li di kabaniswa khu sipandre sivili. Khu kotani nya isoso, mahundzu ya Manasi ni Efrayimi moyo ni moyo a di hakha gipandre gyaye. 14Enu mu na kabanelana thomba nya gufanane, ga moyo kha nga ga mumbe; kholu, nyi sambanyide na nyi khusedzide mandza, gu li ningela ga vababe vanu; khidzo kharato litigo leli li na thegelago mandzani gwanu kha nga thomba.
15Owu wu na bani wuri uwo vbingano nya litigo: Khu phuvbo ga Wuronga, gukhugela yiphwa nya Yikhongolo, khu ndzila ya Hetilomi, kala vbamwanyatunu ga Zedhadi, 16Hamati, Bherota, Sibhrayimi gu khalago vbakari ni vbakari nya vbingano wa Dhamasiko ni Hamati, lidhoropa la Hazeri-Hatikomi gu manegelago vbafuvbi ni vbingano wa Hawurami. 17Kharato, vbingano wu na khugela Phwani kala Hazeri-Enomi, vbingano wa Dhamasiko, khu phuvbo ga Wuronga, womo vbingano wa Hamati; owu wu na bani wuri wa phuvbo ga Wuronga. 18Khu phuvbo ga Khugadambo, khu vbinganoni ga Hawurami, ni Dhamasiko, khu ndzila nya tsongo wa Joridhani, wu vbindra khu vbakari ga Gileyadhi ni litigo la Israyeli, wu vboha kala Tamari vbafuvbi ni yiphwa ya Khugadambo, Owu khuwo vbingano wanu wa Khugadambo.
19Phuvbo ga Marandzi wu na khugela Tamari kala matini ga Meribha-Kadhesi, wu simama kala gitsongwanani gya Egipito, kala ga yiphwa nya Yikhongolo. Owu wu na bani wuri vbingano wa phuvbo ga Marandzi. 20Phuvbo ga Muhwadambo gu na bani guri yiphwa nya Yikhongolo, gukhugela vbinganoni wa Marandzi kala vbanyangwatunu ga Hamati. Owu wu na bani wuri vbingano wa phuvbo ga Muhwadambo. 21Khu guralo, mu na kabanelana litigo leli khu gyanu, gukhedza khu mahundzu ya Israyeli. 22Enu mu na kabana kha nga thomba yanu kamwe gumogo ni valuveli va vbanyago vbakari gwanu, na vari ni sanana. Enu va vegeni kha nga sivelegwa sa Israyeli; gumogo nanu va na bela thombani, vbakari nya mahundzu ya Israyeli. 23Ni ga levbini lihundzu muluveli a na gu dzi bedzago avbo, avbovbo mu na mu ninga thomba yi mu ninganago. A ngu ganela Mune Pfhumu Nungungulu.
Currently Selected:
Ezekiyeli 47: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
