Ezekiyeli 42
42
Guwusedzwa nya Nyumba ya Nungungulu ni makhuvi nya guage
1Khu hwane nya esi, a di nyi dusa vbavbandze, a nyi yisa likupakupani la vbavbandze, khu phuvbo nya ndzila ya Wuronga; a nyi dzega a nyi yisa ga makhuvi ya limbe liphuvbo nya gukhedzane ni Nyumba ya Nungungulu, khu phuvbo ga Wuronga. 2Nyumba nya gitezi yi nga bani yiri khu phuvbo ga Wuronga, lidimba laye li diri ni lizana mikono gulapha, ni myanya yi nga khedza phuvbo ga Wuronga; guanama gu diri livbandre magumi mikono. 3Khu mbeli nya magumavili mikono, yi nga bani yi lumba likupakupa la ndrani, mbeli nya nyumba nya gitezi yi nga bani yi lumba likupakupa la vbavbandze, gu diromo hubhe mbeli ga simbe sitezi nya siraru. 4Mbeli nya makhuvi gu diromo ndzila nya likhumi mikono guanama, khu nyumbani, gu diri ni ndzila nya kono moyo; ni myanya yaye yi di khedzide phuvbo ga Wuronga. 5Makhuvi ya vbatshani ma di hongide ngudzu; kholu mihubhe yi di gu dzega ngudzu wulanga guvbindra ya vbavbatshi ni ya vbakari nya nyumba nya gitezi. 6Kholu ayo ma diri ya sitezi siraru, gambe ma diri mwalo madingo kha nga madingo nya likupakupa; khu kotani nya isoso, ayo ya vbatshani ma diri ya guhonga guvbindra ayo ya vbavbatshi ni ayo ya vbakari. 7Li diromo libhiyo khu vbavbandze, li nga bani li lulama ni makhuvi nya likupakupa la vbavbandze, li diri ni livbandre magumi (50) mikono gulapha. 8Khu guralo, gulapha nya makhuvi, ma nga bani ma romo likupakupani la vbavbandze, ma diri ni livbandre magumi (50) mikono; ilo li nga bani li romo mbeli nya Nyumba ya Nungungulu, li diri ni lizana (100) mikono gulapha. 9Khu phuvbo ga vbavbatshi nya makhuvi yaya, gu diromo mwanya khu phuvbo ga Khugadambo, avbo gu nga bani gu bedwa khu likupakupa la vbavbandze.
10Khu vbakari nya libhiyo nya likupakupa li khedzidego Khugadambo, mbeli nya nyumba nya gitezi nya wulanga nya muhubhe, gu diromo gambe makhuvi. 11Gasi ndzila ya mbeli gwawe, yi diri kha nga makhuvi na ma khedzide ndzila ya phuvbo ga Wuronga. Yi diri ni pimo nya gufanane gulapha ni guanama, ni myanya nya guduge nya gufanane ni myanya ya phuvbo ga Wuronga. 12Yi diri idzosaye ni myanya nya makhuvi ma nga bani ma khedza phuvbo ga Marandzi, gu diromo mwanya guphelani nya hubhe wa vbakari wu nga bani wu ladza guya Khugadambo, ni mwanya nya gubele makhuvini. 13Khavbo avbo, mwama a di nyi embela, khuye: “Makhuvi ya Wuronga ni ayo ya Marandzi, ma guromo mbeli nya mihubhe nya Nyumba ya Nungungulu, makhuvi nya guage, umo vaphasi nya mhamba va thumelago Pfhumu Nungungulu nyumbani nya miphaso, va na hodzago ni gu vega umo sombo nya guage ngudzu, a gu miningelo nya dzimbewu niyo nya ditshedzo nya sighoho ni gutsetselela milandru; kholu wulanga wu agidego. 14Gikhati vaphasi nya mhamba va belago, kha va na duga khu wulangani nya guage va hongola likupakupani la vbavbandze, aholu va na vega mule guambala va thumidego khugo, kholu ugo gu agide; va ambala gumbe guambala, khavbo va na dzi kodzago gu hidzimela ga wulanga wu lumbago vathu.”
15Uye na vbedzide gu pima Nyumba ya Nungungulu khu ndrani, a di nyi dusa khu mwanya wu khedzidego phuvbo ga Khugadambo; a di pima maphuvbo yatshavbo. 16A di pima phuvbo ga Khugadambo khu ndronga nya gupime, khiyo: Maphuvbo yatshavbo gu di manega livbandre mazana (500) dzindronga nya gupime khidzo. 17A di pima phuvbo ga Wuronga: Maphuvbo yatshavbo gu di manega livbandre mazana (500) dzindronga nya gupime khidzo. 18A di pima gambe phuvbo ga Marandzi: Gu di manega livbandre mazana (500) dzindronga. 19Khu hwane, uye a di hongola phuvbo ga Muhwadambo, aya pima: Gu manega livbandre mazana (500) dzindronga. 20#Wona gambe: 1 Dzipf 6:1-38; 2 Dzik 3:1-9. A di pima maphuvbo yatshavbo ya mana, maphuvbo yatshavbo gu diromo libhiyo nya livbandre mazana (500) dzindronga gulapha, livbandre mazana (500) guanama, gasi gu hambanisa Wulanga nya Guage ni uwo nya gunyenyeze.
Currently Selected:
Ezekiyeli 42: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
