Ekisodha 37

Guvbahwa nya Ngasa nya Gidzumeledzwano

(Ekisodha 25:10-22)

1Bhezaleli a di gira ngasa nya mapulango nya sena yi gu na ni mikono mivili ni gipandre gulapha, kono moyo ni gipandre guanama ni kono moyo ni gipandre gukhugega. 2A di yi londra khu ndralama nya guhutwe khu ndrani ni vbavbandze, a yi girela libhandri nya ndralama li yi dzuwuluga. 3A di ruma gu pfhudwa masindra mana nya ndralama a ma khokhotela dzikhonani dza dzina nya ngasa, mavili khu phuvbo mwedo, mavili gambe khu limbe liphuvbo. 4A di gira gambe mipingo nya simbo nya sena a yi londra khu ndralama, 5a bedza khumo nya masindra sikhongwane si khokhotedwego muwubambe nya ngasa, gasi gu yi pinga khayo.

Gikhalo nya ditshedzo

(Ekisodha 25:22-27)

6A di gira gambe gikhalo nya ditshedzo khu ndralama nya guhutwe gwadi, gi gu na ni mikono mivili ni gipandre gulapha ni kono moyo ni gipandre guanama. 7Giride gambe dzikerubhimi dzimbili nya gupfhudwe khu ndralama a dzi emisa khu mahegiso nya gikhalo nya ditshedzo, khu phuvbo ga eno ni phuvbo ga eyi. 8Kerubhimi mweyo yi di khala khu phuvbo ga eno, yimbe yi gu khala khu phuvbo ga eyi. Kharati, dzikerubhimi dzi khala khu mudzitshokani dza dzimbili nya gikhalo nya ditshedzo, dzi khala gilo gimwegyo basi. 9Dzi di thawuludza mambapi vbatshani dzi gu fenengedza gikhalo nya ditshedzo, dza dzimbili dzikhovbe dzawe dzi di khedzisana, dzi khedzisa vbavbatshi, vbagikhalotunu nya ditshedzo.

Meza nya sibaba nya miningelo

(Ekisodha 25:23-30)

10Khu gulandrela a di gira meza khu mapulango nya sena yi gu na ni mikono mivili gulapha, kono moyo guanama ni kono moyo ni gipandre gukhugega. 11A di yi londra khu ndralama nya guhutwe gwadi, a yi girela libhandri nya ndralama li yi dzuwuluga maphuvbo yatshavbo. 12A di yi hunga maphuvbo yatshavbo khu lipulango nya gugule gipimo nya dzinyala dzina, a li fumbela khu libhandri nya ndralama. 13A di pfhula masindra mana nya ndralama a ma khokhotela mudzikhonani dza dzina dzi girago mawundru ya mana nya meza. 14Vbafuvbi ni ngongola, masindra ma di khedzisana, gasi gu bedza khumo misimbo nya gupinge khiyo meza. 15A di gira mipingo nya misimbo nya sena gasi gu pinga khiyo meza. 16A di gira sombo satshavbo si nga bani si fanede gu khala vbamezatunu a gu esi: Dzimbiya, mikho, sifugo nya guthele libani ni sikombe nya mawadwa; satshavbo khu ndralama nya guhutwe.

Gidzigaredzo nya dzikandriya

(Ekisodha 25:31-40)

17A di gira gidzigaredzo nya dzikandriya khu ndralama nya guhutwe, a di gira khu ndralama nya gupfhudwe, gidzigaredzo, tshina yakone, sifugwana, sipfupfu ni senge, satshavbo si wumba gilo gimwegyo basi nyamba yingwa. 18Livbandre na limwedo matamo ma di gu duga khu dzibambe gakone, mararu khu phuvbo mwedo, ni mambe mararu khu yimbe phuvbo. 19Litamo li diri ni sifugwana siraru nya gufanane ni senge nya alimondi ni sipfupfu ni senge. Ma diri idzosaye kharati matamo yatshavbo ma dugago khu vbagidzigaredzotunu nya dzikandriya. 20Vbalitamotunu la vbakari nya gidzigaredzo gu di romo sifugwana sina nya gufanane ni genge nya alimondi ni sipfupfu ni senge saye. 21Gu diri ni gipfupfu gimwegyo vbavbatshi nya matamo ya mavili ma dugago khu vbagidzigaredzotunu, ni gipfupfu gimwegyo vbavbatshi nya matamo ya mavili ma handzamedzago. A diri kharati matamo yatshavbo nya gidzigaredzo nya dzikandriya. 22Sipfupfu sesi, ni matamo yaya ni gidzigaredzo gyakone, satshavbo si di gira gilo gimwegyo basi nyamba yingwa, gyatshavbo gi di pfhudwa khu ndralama nya guhutwe.

23A di gira dzikandriya dzakone nya livbandre na dzimbili, ni sitshimo sakone ni simbiyana nya guthele umo nguma, satshavbo khu ndralama nya guhutwe. 24Gasi gu pfhula gidzigaredzo nya dzikandriya ni sombo saye satshavbo, a thumiside gipimo nya taleta nya ndralama nya guhutwe.

Giluvelo nya libani

(Ekisodha 30:1-10)

25A di gira giluvelo nya libani khu mapulango nya sena, nya kono moyo gulapha ni kono moyo guanama. Maphuvbo yaye ya mana ma diri pimo moyo, aholu gukhugega a diri mikono mivili dzikeho dzaye dzi di patidwe gumogo nagyo gu khala gilo gimwegyo basi. 26Vbatshani nya giluvelo a di londra khu ndralama nya guhutwe, kharato gambe dzibambe gwatshavbo ni dzikeho. A di gira libhandri nya ndralama li dzuwuluga giluvelo gyatshavbo. 27A di gira masindra mavili nya ndralama khu vbatshani nya libhandri maphuvbo ya mavili, eno ni eno, gasi gu bedza khumo mipingo nya gu gi rwale khiyo. 28A di gira mipingo khu misimbo nya sena a yi londra khu ndralama.

Mafura nya guagiswe ni libani nya gukategiswe

(Ekisodha 30:22-38)

29A di gira gambe mafura nya guagiswe nya gutodze, ni libani nya gunungele khu edzi va girago khidzo vapfangi nya sinungedziso.

Currently Selected:

Ekisodha 37: BGE2014

Highlight

Copy