Dhaniyeli 6
6
Dhaniyeli phalani nya dzinghala
1Mufumeli Dhariyo, a di wona nari gwadi gu emisa lizana ni magumavili (120) vathangeli nya gufumele litigo laye latshavbo, 2A vega vamwamangulu vararu, avbo moyo wakone a nga bani nari Dhaniyeli, vathangeli vava, va diri ni thumo nya guwonelele gasi mufumeli a si luzekedwi khu gilo. 3Khavbo avbo, Dhaniyeli a di hambanide ni vamwamangulu ni vathangeli vava, kholu uye a diri ni liphuvbo nya gusamadzise; avbo mufumeli a nga bani ari ni makungo nya gu mu emise gu khala muthangeli nya litigo laye latshavbo. 4Khu kotani nya kharato, vamwamangulu ni vathangeli, va di gu zama gu mana gihoso nya guvivbise khigyo Dhaniyeli thumoni gwaye nya mufumo, gambe va disi mani gihoso, kholu a di thuma khu gutumbega. 5Khu guhegisani, vama vava va di ganela, khavo: “Gima kha hi na nga mana gilo nya gusingedze khigyo Dhaniyeli, vbavbandze ga nayo wa Nungungulu waye.”
6Khavbo avbo, vamwamangulu ni vathangeli vava, va di pwanana khu gisihaledza va hongola gumogo ga mufumeli, vaya mu embela, khavo: Uwe mufumeli Dhariyo, vbanya kala gupindruga! 7Hatshavbo ethu vawoneleli nya litigo lago ni dzindruna dzatshavbo, vathangeli, dzindruna nya nyimbi ni vamwamangulu, hi pwananide nya gukhethu uwe mufumeli, dusa khwepa nya nayo wu na gu thumago ndrani nya magumararu matshigu, nya gu ni wevbini muthu a na gu girago gilombo ga mumbe nungungulu ni mumbe muthu, vbavbandze gwago uwe mufumeli, a na dzegwe a rinywa phalani nya dzinghala. 8#Wona gambe: Dhan 5:28. Gasi olu uwe mufumeli, vega nayo yoyu u wu sayina gasi wu si vbindrugedzwi, kha nga idzo wu rumago khidzo nayo wa Vamedhi ni Vaperesi, owu wu si kodzwigo gu vbindrugedzwa.
9Khu kotani nya isoso, mufumeli Dhariyo, a di funga nayo yoyu a wu tiyisa.
10Avbo Dhaniyeli a ngapwago gupwani gu hungidwe nayo yoyu, a di hongola gaya gwaye, aya bela makhuvini gwaye, nyumbani ga gitezi, na gu tudwe sihogo si nga bani si khedzide phuvbo ga Jerusalema, a di lombelela nyondro tharu khu litshigu na khidzimide khu dzikhungumudzi, a bonga Nungungulu waye, nga idzo a nga bani na gu gira khu gale. 11Khavbo avbo, vama vale va di pwanana vaya ga Dhaniyeli vaya mu mana na gu lombelela, a lomba guphaswa khu Nungungulu waye. 12Khavbo avbo, va di hongola vaya tivisa mufumeli, khavo: Ina avbo nya khwepa wago u nga wu dusago, khwa sayina u tiyisa nayo nya gukhuwe watshavbo muthu a na gu girago gilombo ga mumbe nungungulu mwendro ga mumbe muthu, ndrani nya magumararu matshigu, vbavbandze gwago uwe mufumeli, a na dzegwa a rinywa phalani nya dzinghala, gani? Mufumeli a di hakha, khuye: “Mahungu yaya ma tiyide gukhedza khidzo wu rumago khidzo nayo wa Vamedhi ni Vaperesi, wu si kodzwigo gu vbindrugedzwa.”
13Khavbo avbo, va di hakha va embela mufumeli, khavo: Dhaniyeli a gu moyo nya dzikhumbi dzi ngata khu tigoni ga Judha, kha theli kota khu uwe mufumeli, ambari khu khwepa u nga wu dusago u wu sayina. Uye a nga gu simama gu gira milombelo yaye, nyondro tharu khu litshigu.
14Avbo mufumeli a ngapwago mahungu yaya, a di vbisega ngudzu, a zama gu vbulugisa Dhaniyeli. A di thuma kala gupfola lidambo na gu zama mu gu vbulugisa.
15Khavbo avbo, vama vale va di hongola ga mufumeli va ya mu embela, khavo: “Pimisa gwadi uwe mufumeli, nya gukhuwe idzo wu rumago khidzo nayo wa Vamedhi ni Vaperesi, mwalo khwepa mwendro sileletelo si hungwago khu mufumeli, si kodzago gu vbindrugedzwa.” 16Khavbo avbo, mufumeli a di ruma gukhuye va resa Dhaniyeli, va mu rinya phalani nya dzinghala. Mufumeli, a di embela Dhaniyeli, khuye: “Nungungulu wago u mu thumelago gikhati gyatshavbo, a na gu vbulugise.”
17Khavbo avbo, gu di wumbulugiswa giwindri gi sega likana nya liphala, mufumeli a funga khu phera ya mandzani gwaye ni dziphera dza vathangeli vaye, gasi gu si vbindrugedzwi tsayiso wu lumbago Dhaniyeli. 18Khavbo avbo, mufumeli a di bwelela nyumbani gwaye nya wufumu, a pila wutshigu watshavbo na gu hala, a si dzumedzisi gu yisedwa vbafuvbi gwaye siwombawomba nya wutsendze. Gambe kha nga mana ligovbe. 19A di wuga gu ngari dzimindru, a hongola khu guvbiredza phalatunu nya dzinghala. 20Avbo a nga vbohago vbaphalatunu, a di rana Dhaniyeli khu lito nya wuvi. Mufumeli a di rana Dhaniyeli, khuye: “Dhaniyeli! Githumi gya Nungungulu a vbanyago! Ina Nungungulu u mu thumelago gikhati gyatshavbo a gu vbulugiside ga dzinghala, gani?” 21Dhaniyeli a di embela mufumeli, khuye: “Uwe mufumeli, vbanya kala gupindruga! 22Nungungulu wangu rumede ngilozi yaye yita sega likana nya dzinghala. Idzo kha dza nyi gira gilo, kholu nyi wonidwe na nyiri mwalo nandru mbeli ga Nungungulu. Ambari avbo gwago gimwalo nyi ghohidego.”
23Mufumeli a di tsaka ngudzu a ruma gukhuye va dusa Dhaniyeli khu phalani. Hwane nya gu bani va mu duside khu phalani, va di wona nya gukhavo uye ne mbanga mweyo nya gubayiswe a diri mwalo nayo, kholu uye a di gu tumba Nungungulu waye. 24Mufumeli a di dusa nayo nya gukhuye va reswa vama vale va nga ketsari Dhaniyeli vata rinywa phalani nya dzinghala, gumogo ni vagadzi vawe ni sanana sawe. Avo na va si gu vbohi vbavbatshi, dzinghala dzi di va ndragela dzi va vbadzulela marambo yawe yatshavbo.
25Khavbo avbo, mufumeli Dhariyo a di lovela mayigo yatshavbo, mafumbu ni malimi yatshavbo nya guhambanelane ma manegago mafuni gwatshavbo, khuye: “Gurula gu na khale vbakari gwanu gikhati gyatshavbo!”
26Nyi ngu lova khwepa yoyu gasi nyi rumela malangani gwatshavbo nya mufumo wangu, gu vathu va na ndrendremele va thava Nungungulu wa Dhaniyeli.
Kholu uye Nungungulu a vbanyago
a ngu simama kala gupindruga;
mufumo waye wu mwalo mahegiso,
gufuma gwaye gwa gu simama kala gupindruga.
27Uye ngu vbulugisa ni gu vbanyisa;
a ngu gira siwoniso ni siliwugiso
ndzadzini ni mafuni.
Uye a vbulugiside Dhaniyeli
tshivbani nya dzinghala.
28 # Wona gambe: Dhan 1:21. Khu guralo, Dhaniyeli a di pwala gidhumo gikhatini nya gufume ga Dhariyo ni Kiro Muperesi.
Currently Selected:
Dhaniyeli 6: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
