Dhaniyeli 3
3
Dhaniyeli niloni nya gudzure
(Isaya 43:2)
1Mufumeli Nabhukodhonosori a di gira gifananiso nya ndralama nya livbandre na limwedo magumi mikono gukhugega, ni magumararu mikono guanama, a gi emisa kovani ga Dhura, gipandrengulu gya Bhabhiloni. 2Mufumeli Nabhukodhonosori a di ruma gu tombanisa manganagana, dzindruna, vathangeli, valamuli, vaphari nya gyuma, madhota, dzindruna nya nyimbi ni vamwamangulu vatshavbo nya sipandrengulu, gasi guta khangula gifananiso gi nga emiswago khu mufumeli Nabhukodhonosori. 3Khu guralo, gu di tombana manganagana, dzindruna, vathangeli, valamuli, vaphari nya gyuma, vasingalagadzi, vathangeli nya dzinyimbi ni vamwamangulu vatshavbo nya sipandrengulu, gasi guta khangula gifananiso egi mufumeli Nabhukodhonosori a nga gi emisago, vatshavbo va di emide mbeli nya gifananiso gi nga emiswago khu mufumeli.
4Khavbo avbo, mutivisi nya mahungu nya litigo a di khusa lito a laledza, khuye: “Enu vathu nya mafumbu yatshavbo, mayigo ni vathu mu ganelago malimi nya guhambanelane, nyi ngu mi embelani, kheni: 5Avbo mu na pwago gudzuma nya pundru, ni tsholi, ni gitendre, ni gitoliyo, ni tandrandra, ni hwambi, ni sengele ni satshavbo siwombawomba si ningago wutsendze, mu fanede gu khidzima mu khozela gifananiso nya ndralama gi emisidwego khu mufumeli Nabhukodhonosori. 6Uye a na gumba khidzima a gi khozela, a na dzegela gu rinywa niloni gidhingiseloni nya gudzure ngudzu.” 7Khavbo avbo, vathu vatshavbo gikhati va ngapwa gudzuma nya pundru, ni gitendre, ni hwambi, ni tsholi ni satshavbo si ningago wutsendze, mayigo yatshavbo, mafumbu, malimi, va di thega vbavbatshi va khidzimela gifananiso nya ndralama gi nga emiswago khu mufumeli Nabhukodhonosori.
8Khu gikhati gyogyo, gu dita vama nya gukari nya Vakalidhiya, va dita ketsari Vajudha, 9va embela mufumeli Nabhukodhonosori, khavo: “Uwe mufumeli, vbanya kala gupindruga! 10Uwe mufumeli u emiside nayo, u leletela gukhuwe watshavbo wule a na pwago gudzuma nya pundru, sengele, gitendre, tsholi, hwambi, ni satshavbo siwombawomba nya wutsendze, a ngu yela gu thega vbavbatshi a khozela gifananiso nya ndralama, 11gasi ni wevbini a na gumba khidzima a gi khozela a na rinywa niloni nya gidhingiselo nya gudzure khu tshivba. 12Vomo Vajudha nya gukari avo u nga va emisago gu khala dzindruna nya gipandrengulu gya Bhabhiloni, a gu Sadraki, Misaki ni Abhedhi-Negho, vama vava, kha va khathali khuwe mufumeli, ni gu khozela vanungungulu vago, ambari gifananiso nya ndralama, u gi emisidego, kha va gi khozela.”
13Khavbo avbo, Nabhukodhonosori, a di tala khu giviti nya likhulo, a rumela guya ranisa Sadraki, Misaki ni Abhedhi-Negho va va resa mbeli ga mufumeli. 14Nabhukodhonosori a di va wudzisa, khuye: “Ina lisine, nya gupwani uwe Sadraki, Misaki ni Abhedhi-Negho, kha mu khozeli vanungungulu vangu ambari ni gifananiso nya ndralama nyi gi emisidego, gani?” 15Gasi olu, nyi embeleni gu ni gevbini gikhati mu na gu pwago gudzuma nya pundru, nya ngoma, nya gitendre, nya hwambi, nya tsholi, nya sengele ni satshavbo siwombawomba si ningago wutsendze, khidzimani mu khozela gifananiso nyi nga gi emisago. Mwa gumba girani kharato mu na dzegela gu modwa mu rinywa niloni gidhingiseloni nya gudzure ngudzu. Hi na wona gukhethu khu wevbini Nungungulu a na gu mi vbulugisago mandzani gwangu.
16Aholu Sadraki, Misaki ni Abhedhi-Negho, va di phindrula mufumeli Nabhukodhonosori, khavo: “Ethu kha hi vbweti gu gu ninga phindrulo khu mahungu yoyo. 17Sa gu girega kharato, Nungungulu wathu hi mu khozelago, khuye a yelago gu hi vbulugisa mandzani gwago uwe mufumeli, ni gu hi dusa khu niloni gidhingiseloni nya gudzure. 18Ambari a gumba hi vbulugisa, dziti gwadi uwe mufumeli, gukhuwe ethu gima kha hi na nga khozela vanungungulu vago, ambari gu khozela gifananiso nya ndralama u gi emisidego.”
19Khavbo avbo, Nabhukodhonosori a di tala khu giviti khu gu wona Sadraki, Misaki ni Abhedhi-Negho, yi vbindrugedza ni khovbe yaye. A di ninga nayo nya gukhuye gidhingiselo nya nilo gi engedzedwa gu dzuriswa livbandre na dzimbili dzinyondro guvbindra idzo gi dzuriswago khidzo, 20a leletisa gukhuye dzindrena nya gukari nya nyimbi, dzi na hunge Sadraki, Misaki ni Abhedhi-Negho, va va rinya gidhingiseloni nya nilo nya gudzure khu tshivba. 21Khavbo avbo, vama vale va di hungwa va rinywa gidhingiseloni nya nilo nya gudzure ngudzu na vari ni dzingandzu dzawe, mabhuluku, sihugu ni mabhadzi yawe. 22Guleleta ga mufumeli gu diri ga givbiredza, gidhingiselo gi di vbiside ngudzu avbo malavbelavbe yaye ma nga songa vama vale va nga rinyago niloni, Sadraki, Misaki ni Abhedhi-Nego.
23Vama vava va vararu, Sadraki, Misaki ni Abhedhi-Negho, va di thega gidhingiseloni nya nilo nya gudzure na va hungidwe.
24Khavbo avbo, Mufumeli Nabhukodhonosori a di samala a dzegela gu khuga a ema, a embela dzindruna dzaye, khuye: “Gasi khandri vama vararu hi nga va rinyago niloni, gani?” Avo va di embela mufumeli, va hakha, khavo: “Ina Mufumeli, lisine u ganelago!”
25Uye a di hakha, khuye: “Eni nya gu wona vama vana nyamba hungwa va gimbila gimbilago vbakari nya nilo nyambavbya, giyemo gya uye nya wu na gya gu fanana ni mwamana wa vanungungulu.”
26Khavbo avbo, Nabhukodhonosori, a di hidzimela vbafuvbi nya mwanya nya gidhingiselo nya gudzure a laledza, khuye: “Sadraki, Misaki ni Abhedhi-Negho, sithumi sa Nungungulu a Khusegidego ngudzu, dugani mute eno!” Khavbo avbo, Sadraki, Misaki ni Abhedhi-Negho, va di duga khu vbakari nya nilo. 27Khavbo avbo, manganagana ni dzindruna, vafumeli, ni vasingalagadzi va mufumeli, va di tombana va wona nya gukhavo, khidzo kamwe nilo wu diri mwalo tshivba sivilini ga vama vale, kholu ambari ni ndzudzu moyo basi wa hungoni gwawe kha wavbya gilo, ambari mabhadzi yawe kha mavbya, ni mahema nya guyeyedze gupwani va diri niloni kha mapwali.
28Nabhukodhonosori a di ganela, khuye: “A na dhumiswe Nungungulu wa Sadraki, Misaki ni Abhedhi-Negho, a rumedego ngilozi yaye yita vbanyisa sithumi saye, si mu tumbidego, kholu kha va dzumela gu landrisa magana ya mufumeli, si hatha gu ningela sivili sawe, guvbindra gu khozela mumbe nungungulu, vbavbandze ga Nungungulu wawe.”
29Khu guralo, eni nyi leletede gukheni muthu watshavbo wa levbini litigo, lifumbu ni lidimi a na ganelago guvivba khu Nungungulu wa Sadraki, Misaki ni Abhedhi-Negho, a na vbadzuledwe ni dzinyumba dzawe dzi na khale matala nya marumbi, kholu mwalo mumbe nungungulu a kodzago gu vbanyisa kha nga oyu.”
30Khavbo avbo, mufumeli a di khusedza Sadraki, Misaki ni Abhedhi-Negho, umo nya gipandrengulu gya Bhabhiloni.
Currently Selected:
Dhaniyeli 3: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
