Dhaniyeli 10
10
Giwoniso gya Dhaniyeli tsongoni wa Tigre
1Khu mwaga nya wuraru nya gufume ga Kiro, mufumeli wa Perisiya, Dhaniyeli, a ranwago gambe gupwani khu Bhalitazari, a di ningwa giwoniso. Mahungu nya giwoniso gegi, ma diri ya lisine, ma di ganela khu libango nya nyimbi nya yikhongolo ngudzu. A di mati gwadi magana yakone ni gu mana tshamuselo nya giwoniso.
2Khu gikhati gyogyo, eni Dhaniyeli, nyi di vbedza semana tharu na nyi swihade. 3Nyi di si hodzi guhodza nya gutshambe, nyama, ambari gu sela vhinya, ambari gu tola mafura nya gunungele, kala guvbindra semana tharu.
4Khu litshigu nya magumavili na mana nya ngima nya guhegule, eni nyi di khade bambe nya tsongo nya wukhongolo wa Tigire. 5#Wona gambe: Gutu 1:13-15; 19:12. Nyi di khusa maho nyi khedza vbatshani, nyi di wona mwama nari vbafuvbi gwangu nya guambale dzingandzu nya seda, mugiwununi gwaye na hungide libhandri nya ndralama nya guhutwe ya Ufazi. 6Mili waye wu di fanana ni giwindri nya wumburi, khovbe yaye yi di khedziga nga libara, maho yaye nga myenge nya gudzure, mawogo ni mawundru yaye, ma diri ni muvala nya sugu, lito laye, li di dziya nga lito nya gidzemo.
7Kheni nyonga, eni Dhaniyeli, nyi nga wona giwoniso gegi; avo nyi nga bani nyiri navo, kha va wona gilo, aholu, va di thedwa hwanga nya wukhongolo ngudzu, va thava va tutuma vaya sihala. 8Nyi tshala nyiri nyenga, na nyi gu wona giwoniso gile nya gikhongolo; nyi di vbela tshivba, khovbe yangu yi vbindrugedza yi wu na. 9Khavbo avbo, nyi dipwa lito nya magana yaye, avbo nyi nga pwago magana yaye, nyi di thega khu khovbe mafuni, nyi titivala.
Dhaniyeli a ngu tangadziswa
10Khu hwane, nyi dipwa gyandza gya muthuyo na gi gu nyi kuha nyi phela gu khuga khu dzikhungumudzi ni mawogo na nyi gu ndrendremela. 11Uye a di khuye: “Dhaniyeli, muthu nya gugodwe ngudzu khu Nungungulu, yingisa gwadi iso nyi vbwetago gu gu embela; khuga u eme, kholu eni nyi rumedwe avbo gwago.” Avbo a nga nyi embela isoso, nyi di khuga nyi ema na nyi gu ndrendremela.
12A di engedza, khuye: “Dhaniyeli, u nga khali hwanga. Gukhugela litshigu nya guhegule u nga dzi sodzisa mbeli ga Nungungulu wago khu gu vbweta guti makungo yaye, malito yago ma yingisidwe, eni nya guta gu ninga phindrulo yaye. 13#Wona gambe: Gutu 12. Aholu ndruna nya mufumo wa Perisiya, yi dita dwana ni eni gipimo nya magumavili na limwedo matshigu; aholu Migeli, moyo nya dzingilozi nya guhegule, a dita nyi phasa, eni nyi di simama vbale ni vafumeli va Perisiya. 14Olu nyi dzude guta gu tivisa iso si na gu giregago ga vathu vago khu matshigu nya guhegise, kholu giwoniso gya gu ganela khu silo si ngarigo hwindzo ni gu girega.”
15Avbo a nga bani a nyi embela magana yaya, nyi di noga khovbe mafuni, nyi si kodzi ni gu ganela. 16Khavbo avbo, givangwa gimwegyo nya gufanane ni sanana nya vathu, gi di nyi kuha gihofu, khavbo avbo, nyi di tula likana nyi ganela, nyi embela wule a nga bani na emide mbeli gwangu, kheni: “Pfhumu yangu, nyi ngu saniseka ngudzu khu mahungu nya giwoniso nyi gi wonidego, nyi rerekide nyi vbela tshivba.”
17Ina nyi nga dzi kodza kharini gu ganela nago uwe mune wangu? Kholu, gukhugela olu nyi garade, nyi vbede tshivba.
18Givangwa nya gu gufanane ni muthu, gi di engedza gu nyi kuha gi nyi ninga tshivba. 19Gi nyi embela, khigyo: “U nga khali hwanga, uwe u gigodwa ngudzu. Gurula gu na khale ni uwe! Tiya! U nga thavi!” Avbo nyi nga embedwago magana yaya, nyi di dzipwa na nyi tiyide, nyi ganela, kheni: “Ganela mune wangu, kholu u nyi ningide tshivba.”
20Khavbo avbo, uye a di nyi embela, khuye: U ngu dziti gukhuwe ginani gi nga nyi tisago avbo gwago, gani? Nya guta gu tivisa gukheni nyi ngu yela gu bwelela nyi ya dwana ni girumwa gya Perisiya, me ni gu nyi khuga, gi na vboha girumwa gya Gerekiya; 21#Wona gambe: Gutu 12:7. aholu, nyi na phela khu gu gu embela esi si lovidwego Libhukuni nya Lisine. Mwalo a na gu nyi phasedzelago gu dwana litunga lolo, vbavbandze basi ga Migeli, muemeli wanu.
Currently Selected:
Dhaniyeli 10: BGE2014
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Gitonga © Bible Society in Mozambique, 2014.
