Dzindzimo 135
135
Nungungulu fanede gu Dhumiswa!
1Aleluya!
Dhumisani Pfhumu Nungungulu!
Dhumisani lina Laye;
li dhumiseni enu sithumi saye.
2Enu mu guromo Nyumbani ga Pfhumu Nungungulu,
dzinyangwani nya Nyumba ya Nungungulu wathu.
3Dhumisani Pfhumu Nungungulu, kholu khwadi, embelelani mu dhumisa lina laye kholu li handzegide.
4Uye hathide Jakobe gu khala waye,
ni va na Israyeli gu khala thomba yaye.
5Kholu nyi ngu dziti gwadi gukheni Pfhumu Nungungulu khongolo,
ni gu, Nungungulu wathu womo vbatshani guvbindra vanungungulu vatshavbo.
6Kholu satshavbo a si vbwetago a ngu si gira,
ndzadzini ni mafuni, linene ni malangani yatshavbo nya guete.
7Khuye a wusago mapfhi gukhugela mahegiso nya mafu;
khuye a girago gulasa ni mabara, guwa ndzadzi;
a tulela phuvbo yi duga khu gukhothedwani gwaye.
8Khuye a nga songa sanana nya matiwula sa Egipito,
gukhugela matiwula nya vathu kala ni matiwula nya sifuyo;
9giride sisamadziso ni siliwugiso vbakari gwago uwe Egipito,
gasi gu tsayisa Faro gumogo ni vathu vaye vatshavbo;
10khuye a sasedego vathu nya mayigo nya gutale,
a songa vafumeli nya tshivba.
11Bayiside Seyoni, mufumeli wa Vaamori,
a songa Ogi, mufumeli wa Bhasani
ni vafumeli vatshavbo Vakhanani.
12Mayigo ya vafumeli vovo a di ma dzega a ninga va na Israyeli,
a ma gira thomba ya vathu vaye.
13Lina lago Pfhumu Nungungulu, li na simama kala gupindruga;
Pfhumu Nungungulu u na alakanywa khu situgulwana ni situgulwana.
14Kholu Pfhumu Nungungulu a na emela vathu vaye
ni gu pwela wusiwana sithumi saye.
15Vanungungulu va mambe mayigo
va gu wumbwa khu parata ni ndralama,
sigiro nya mandza nya vathu.
16Va na ni magana, aholu kha va ganeli;
va na ni maho, aholu kha va woni.
17Va na ni dzindzeve, aholu kha vapwi;
kholu va mwalo hefemulo maganani gwawe.
18 # Wona gambe: Dzind 115:4-8; Gutu 9:20. Va na fanane ni sithombe soso,
avo va si wumbago ni vatshavbo va khodwago ga iso.
19Enu va na Israyeli, dhumisani Pfhumu Nungungulu;
Ndranga ya Aroni dhumisani Pfhumu Nungungulu;
20Enu sanana sa Levhi dhumisani Pfhumu Nungungulu;
dhumisani Pfhumu Nungungulu enu mu Mu ningago githawo.
21Enu mu vbanyago Siyoni dhumisani Pfhumu Nungungulu
a khalago Jerusalema!
Aleluya!
A na dhumiswe Pfhumu Nungungulu!
Currently Selected:
Dzindzimo 135: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
