Mavingu 5
5
Guthava nyamayi nya liphuphulu
1Mwanangu, yingisa guti gwangu,
demba ndzeve upwa sileletelo sangu,
2Khu kharato, u na kodza gu mana mano nya yadi,
khu kanani gwago, gu na duga
mapimo nya yadi.
3Kholu sigundruni ga nyamayi nya liphuphulu
gu dota wulombe,
ni kanani gwaye gu duga magana nya gukwirige guvbindra mafura.
4Aholu guhegisani, magana yaye ma gu vava
kha nga nyongwa,
ma vbira kha nga litshari li lodzidwego eno ni eno.
5Migondro yaye ya gu hongola gufatunu,
ni magimbilelo yaye ma gu mu yisa thowoni.
6Kha khathali khu ndzila yi hongolago guvbanyani,
dzindzila dzaye kha dzi mu yisi danga;
gambe uye mune kha dzi woni.
7Gasi olu, mwanangu, nyi yingise;
u nga hambani ni silayelo sangu.
8Gimbilela hwindzo ga nyamayi yoyo,
u nga tshuki u bela ndrangani gwaye,
9gasi u si ningeli lisima lago ga valombo,
ambari matshigu yago ga vasongi,
10gasi va nya mayigo
va si ghanyi khu thomba yago,
ni handro nya tshivba yago wu ghanyisa ndranga ya mumbe muthu.
11U na hegisa khu gulila, gikhati nyama yago
ni mili wago wu na bani wu vbede tshivba.
12Gasi u ganela, khuwe:
“Khu ginani nyi nga bomba gulaywa!
Monyo wangu wu bomba gu kawukwa?
13Kholu kha nya yingisa vahevbudzi vangu,
ambari gu yingela sileletelo sa valayi vangu.
14Gu di tshala vbadugwana guthegela mhangoni nya yikhongolo
vbakari nya tshangano watshavbo nya vathu.”
15Tshima lidora khu mati ya namboni gwago,
ni mati ma gogago khu pusuni gwago.
16Ina u na diga mati yago ma vbalagela vbavbandze
ni sitsongwana sago si goga dzindzilani, gani?
17Isoso si na khale sago basi,
si nga manwi khu va nya mayigo.
18Wu na katege nambo wago!
U tangadziswa khu mwangadzi
wa wudzahani wago,
19gukhwatshi yisya nya guhaladzege,
wumburi gufanane ni mbavala,
mavele ya mwangadzi wago
ma na gu nengedzise gikhati gyatshavbo,
lihaladzo laye li na gutsakise gikhati
gyatshavbo.
20Mwanangu, khu ginani u sengedzedwago
khu nyamayi nya gibhayi?
Khu ginani u wugarelana ni nyamayi
nya liphuphulu?
21 Pfhumu Nungungulu gikhati gyatshavbo
a gu khevisela dzindzila nya muthu
a mu khedza gwadi ni magimbilelo yaye.
22Muthu nya guvivbe a na modwa khu nandru waye,
a hungwa khu ngodzi nya sighoho saye.
23A nafa khu gumba yingisa
a mbembiswa khu wupemi waye.
Currently Selected:
Mavingu 5: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
