Mavingu 1
1
I. GIPANDRE NYA GUPHELE: GINANI GUTI?
Magana nya gutule
1Aya khu mavingu ya Solomoni, mwamana wa Dhavhidhe,
mufumeli wa Israyeli,
2gasi gu hevbula guti ni wugengeli
ni gu pima magana nya guete,
3ma ngu ninga vathu sileletelo nya mavbanyelo nya yadi,
mavbanyelo ma lulamidego ni makhalelo nya yadi;
4mavingu ma ngu gengedzisa avo nyambana mano,
ma ninga madzaha wugengeli ni gupimisa.
5Muthu nya guti a gu mapwa, a gu engedzela mapimo,
ni muthu nya guti a na mana milayo nya wuhevbudzi
nya wadi,
6nya gupime mavingu ni guti sipimaniso;
gumogo ni magana nya guti ni misihalo ya va nya guti.
7Gu thava Nungungulu khilo litshina nya guti,
sipumbu sa gu nyenya guti ni sihevbudzo.
Siluleko nya guti
8Mwanangu, yingisa sileletelo sa babe wago,
u nga kanyisi sihevbudzo sa mayi wago,
9isoso si na khala nari gihugu nya wumburi
hungoni gwago
ni wulungu nya gumburise thamoni gwago.
10Mwanangu, u nga dzumeli gu sengwa khu sighohi.
11Va gu gu embela, khavo: “Hongole.
Hi ya sihalela vathu va gumwalo nandru
gasi hi vbaladza novba wawe,
12hongoleni hi va midza na va nga gu vbanya,
kha nga lithowo;
khwatshi khu vale va relelago phalani.
13Hi na mana satshavbo nya sadi hi si vbwetago,
hi tadza dzinyumba dzathu khiso nya guphangwe,
14bela tsawani gwathu,
kholu kwama wathu wu na bani wuri moyo.”
15Mwanangu, u nga tshuki u longoloka ni vathu
nya nga avovo,
ndreya ga ndzila va gimbilago khiyo.
16Kholu avo va gu tutumela umo nya guvivbe,
va vbiredzela gu vbaladza novba.
17Khu lisine kha si phasi gilo gu demba naphwi
sinyoni na si gu wona.
18Vathu vovo navo, kha va dziti gukhavo
va gu dzi dembela vabune naphwi
wu na gu vbaladzago novba wawe
va dzi kambula vabune.
19Aya khu mahegiso nya vatshavbo va nya lidiwo
ni wuphangi,
va gufa khu wuphangi wawe.
Magana nya guti
20Guti gwa gu khusa lito li pwala mudzindzilani
ni mitendrelani nya madhoropa.
21 # Wona gambe: Mav 8:1-3. Gwa gu laledza khu mahandzakanyani nya dzindzila,
gupwala ni dzinyangwani nya madhoropa, khugo:
22“Enu sipumbu, kala lini na mu nga gu hamuga mano?
Ni enu vatseketseli, kala lini na mu nga gu gola gutseketsela?
Enu sipumbu, kala lini na mu gu bomba gu nyi yingisa?
23Vbindrugedzani mu yingisa gu kawuka gwangu,
nyi na mi thela liphuvbo langu ndrani gwanu,
nyi na mi gira muti magana yangu.
24Kholu nyi mi ranide, aholu mwalo a nyi hakhidego,
nyi thawuludzide mandza yangu, aholu mwalo
a nga khathalago.
25Kha nga olu, mu bombidego sileletelo sangu,
mu si yingisi gukawuka gwangu,
26khu guralo, eni neni nyi na mi hega litshigu
mu na dugedwago khu mhango,
gikhati mu ndrendremelago, eni nyi na mi tsorodzela;
27khu gu mi wona na mu gu tedwa khu hwanga nya nga gingulu
ni mhango nya nga gipupwane,
ni avbo mu na gu vbohedwago khu miketo ni wuvi.
28Khu guralo, mu na nyi rana,
aholu kha nyi na mi hakha,
mu na nyi vbweta,
aholu kha mu na nyi mana.
29Kholu mu di bomba guti,
mu si dzumeli guthava Pfhumu Nungungulu;
30mu di nyenya gu landrisa sileletelo sangu satshavbo,
mu kanyisa gukawuka gwangu gwatshavbo.
31Khu guralo, va na hodza handro nya mithumo yawe,
va khura khu gupimisa gwawe.
32Kholu sipumbu si nafa khu gumba yingisa gwawe,
ni va nyambana mapimo, va na dzi kembela liphala
khu gumba dzi garadza khu gilo.
33Aholu uye a nyi yingisago, a na vbanya gurulani
na tiyide nyambana hwanga, a si thavi gilo.”
Currently Selected:
Mavingu 1: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
