Mitengo 5
5
Milayo khu vathu nya gunyenyeze
(Levhi 13:1-46)
1 Pfhumu Nungungulu a di ganela ga Mosi, khuye: 2“Embela va na Israyeli va duse vbavbandze nya lizumbo vatshavbo va gu na ni sokono, va gu ni tungu nya gudugelele wusila ni avo va dzi nyenyezisidego khu kotani nya guphare girumbi. 3Mwama mwendro nyamayi mu na va dusani; va duseni vbavbandze nya lizumbo, gasi va si li nyenyezisi, kholu Eni nyi womo vbakari gwawe.” 4Va na Israyeli va di gira kharato, va va dusa vbavbandze nya lizumbo kha nga idzo Pfhumu Nungungulu a nga leletelago khidzo Mosi.
Nayo nya gulivbe milandru
5 Pfhumu Nungungulu a di engedza gambe a embela Mosi, khuye: 6“Ganela ga va na Israyeli, khuwe: Gani mwama mwendro nyamayi a na girago guvivba ga muthu nya gukari, a gu ghohela Pfhumu Nungungulu, a na mana nandru khiso a giridego. 7Khu guralo, gu vbwetega a dawulela iso a giridego; a bweledzela silo satshavbo a si manidego khu wuvivbi, bwelo khavbo a engedzela gipandre nya livbandre ga wule a mu ghohedego. 8#Wona gambe: Levh 6:1-7. Aholu wule a ghohedwego a gu bani na fude nari mwalo nongo nya guyele guta hakha iso a livbwago khiso, si na ningedwa ga Pfhumu Nungungulu khu mandzani ga muphasi nya mhamba, vbavbandze nya nvuta yi ningedwago gasi gu livba sighoho saye. 9Miningelo yatshavbo nya sombo nya guagiswa esi va na Israyeli va resago ga muphasi nya mhamba, si na lumba uye. 10Muthu ni muthu a gu ni sombo nya guagiswe khyaye; aholu esi a na si bikelago ga muphasi nya mhamba sa gu lumba muphasi nya mhamba.”
Ningelo nya wufu
11 Pfhumu Nungungulu a di engedza a ganela ga Mosi, khuye: 12“Ganela ga va na Israyeli u va embela, khuwe: Nyamayi a gu handruga a ghohela mwama waye, 13a ya lala ni mumbe mwama, mahungu ma gumba vboha dzindzeveni ga mwama waye, mwendro a gu ghoha gusihalani nyamba tidwa khu muthu a nga si wonago gasi gu khala fakazi, nyamayi yoyo kha na dzi thuledza abune. 14Aholu mwama a gu beledwa khu liphuvbo nya wufu, a girela wufu mwangadzi waye a ghohidego, ni gu liphuvbo nya wufu li mu belela a girela wufu mwangadzi waye ambari na sa ghoha gilo, 15mwama a na dzega mwangadzi waye gumogo ni mideva miraru nya wuguvbi nya mavbila, nyamba wu thela mafura, ambari libani a mu yisa ga muphasi nya mhamba, kholu ningelo nya wufu, a gu ningelo nya gualakanye sighoho. 16Muphasi nya mhamba a na ranisa nyamayi a ta ema mbeli ga Pfhumu Nungungulu. 17Muphasi nya mhamba a na rega mati nya guagiswe khalini nya libumba; a dzega gambe ni kudzudzwane nya mafu ya vbavbatshi nya Wulanga nya Guage, a wu thela matini. 18Khavbo avbo, muphasi nya mhamba a na bikela nyamayi mbeli ga Pfhumu Nungungulu, a mu funungula hungo, a vega mandzani gwaye ningelo nya dzimbewu nya gualakanye, a gu ningelo nya dzimbewu nya gualakanye wufu, muphasi nya mhamba a na phara mandzani gwaye mati nya guvave ma girago givalo. 19Muphasi nya mhamba a na sambanyisa nyamayi wule a mu embela, khuye: Wa gu bani wa sa lala ni mumbe mwama, ni gu bani wa sa handruga u gira silo nya gunyenyeze ga mwama wago, mati yaya nya guvave ma girago givalo ma nga gu giri gilo. 20Aholu wa gu bani u ndreyide u gira guvivba ni mumbe mwama, u lala naye vbavbandze ga mwama wago; 21#Wona gambe: Umo nya sipimo 22 ni 27. khavbo avbo muphasi nya mhamba a na engedza gu sambanyisa nyamayi khu gisambanyo nya givalo, a mu embela, khuye: Wa gu bani u handrugede mwama wago a nga gu lowola, ni gu bani u dzi nyenyeziside khu gulala ni mwama a gu sigu wago, Pfhumu Nungungulu a na gu gire givalo, a gu nyenyezisa vbakari ga vathu vago, u khala gyumba, u mana madwali nya gitamba. 22Mati yaya nya givalo ma na bele rumbuni gwago, ma simbisa girumbu gyago, u khala gyumba. Khavbo avbo, nyamayi a na hakha, khuye: Amen! Amen! 23Muphasi nya mhamba a na lova sivalo sesi umo nya libhuku, khu hwane a si futa khu mati nya guvave, 24a sedza mati nya guvave ma girago givalo nyamayi, mati yoyo nya guvave ma na bela ndrani gwaye ma mu pwisa wuvi. 25Khu mandzani ga nyamayi, muphasi nya mhamba a na dzega miningelo nya wufu nya dzimbewu, a yi ndziwitela mbeli ga Pfhumu Nungungulu; a yi ningela vbagiluvelotunu. 26Muphasi nya mhamba a na baga gambe gyandza nya wuguvbi ni miningelo nya gualakanye, a yi vbisa vbagiluvelotunu; khu hwane a sedza mati nyamayi. 27Hwane nya gu bani a mu sedzide mati, uye a gu bani a dzi nyenyeziside, ni gu bani a ghohede mwama waye, mati nya gugire givalo ma na bela ndrani gwaye ma mu pwisa wuvi, girumbu gyaye gi na simba, ni gu a na khala gyumba; nyamayi yoyo a na khala givalo vbakari ga vathu vawe. 28Aholu nyamayi a gu bani na sa ghoha, na handzegide, uye a na tshulega a mana livelego. 29Owu khuwo nayo nya wufu, nyamayi a dzegidwego khu mwama waye, a gu ndreya aya dzi nyenyezisa; 30mwendro mwama a gu beledwa khu liphuvbo nya wufu, a girela wufu mwangadzi waye, uye a na bikele mwangadzi waye mbeli ga Pfhumu Nungungulu, muphasi nya mhamba a na mu linga khu watshavbo nayo yoyu. 31Mwama kha na nga manega nari ni nandru, aholu nyamayi a na rwala guvivba gwaye.”
Currently Selected:
Mitengo 5: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
