Mitengo 3
3
Tengo ni thumo wa va na Levhi
(Mitengo 8:13-22; 1 Dzikoronika 24:1-31)
1Eli khu livelego la Aroni ni Mosi, gikhati Pfhumu Nungungulu a nga ganela ni Mosi gigomoni ga Sinayi. 2#Wona gambe: Mit 26:60. Malina ya sanana sa Aroni khaya: Matiwula khu Nadhabhi, gu landrela Abhiyu, Eleyazari ni Itamari. 3Aya khayo malina ya sanana sa Aroni, a gu vaphasi nya mhamba va todzidwego mafura, va wumbedwa wuphasi nya mhamba. 4Aholu, Nadhabhi ni Abhiyu va difa mbeli ga Pfhumu Nungungulu na va gu ningela nilo wa va nya mayigo gigomoni ga Sinayi; avo va fude nyamba tshiya sanana. Khu guralo, Eleyazari ni Itamari, va di simama thumoni nya wuphasi nya mhamba mbeli ga babe wawe Aroni. 5Pfhumu Nungungulu a di ganela ga Mosi, khuye: 6“Resa lihundzu la na Levhi, u li vega mbeli ga muphasi nya mhamba Aroni, gasi va mu thumela. 7Va na thumela Aroni, ni tshangano watshavbo mbeli nya Tshatsha nya Tshangano, va gira thumo wa tshatshani. 8Va sayisa mikanvu yatshavbo ya Tshatshani nya Tshangano, ni gu thumela va na Israyeli, gasi va gira thumo wa tshatshani. 9Khu guralo, u na ningela va na Levhi, ga Aroni ni sanana saye, va na fumedwa khu Aroni va khala nari sihathwa vbakari ga va na Israyeli. 10Aholu Aroni ni sanana saye, u na va leletela gukhuye va sayise wuphasi wawe, gani khu mani nyamayigo a na gu hidzimelago a na songwa.” 11Pfhumu Nungungulu a di ganela ga Mosi, khuye: 12“Wona nya gukhuwe Eni nyi hathide va na Levhi vbakari ga na Israyeli, wulangani nya gu na nyi dzegide matiwula yatshavbo a gu mihandro nya guphele ya mahembeni ya na Israyeli. Va na Levhi va na khala vangu, 13#Wona gambe: Eks 13:2. kholu matiwula yatshavbo ma gu lumba Eni gukhugela litshigu lile nyi nga songa matiwula yatshavbo tigoni ga Egipito. Nyi phasede avbo gwangu matiwula yatshavbo ya na Israyeli, gukhugela ayo nya vathu kala nya sifuyo; ma gu lumba Eni. Eni kheni Pfhumu Nungungulu.”
Gilovela gya va na Levhi
(Mitengo 26:57-65; 1 Dzikoronika 6:1-15)
14 Pfhumu Nungungulu a di ganela ga Mosi giwulani ga Sinayi, khuye: 15“Gira gilovela nya sanana sa Levhi gukhedza khu dzindranga dza vababe vawe, mapango nya dzinyumba dzawe. U na lovela yatshavbo madzaha avo va gu na ni ngima moyo guya mbeli. 16Mosi a di va lovela kha nga idzo Pfhumu Nungungulu a nga mu leletela khidzo. 17Aya khu malina nya sanana sa Levhi: Gerisoni, Khowati ni Merari. 18Malina ya sanana sa Gerisoni ni mapango yawe khaya: Libini ni Simeyi. 19Sanana sa Khowati gukhedza khu mapango yawe khesi: Aniramo, Izari, Hebroni ni Uziyeli. 20Sanana sa Merari, gukhedza khu mapango yawe khesi: Mahali ni Musi. Khayo aya mapango ya na Levhi gukhedza khu dzinyumba dza vababe vawe. 21Khu ga Gerisoni gu di velegwa nyumba ya na Libini gumogo ni nyumba ya Simeyi. Edzi khu dzinyumba dza Gerisoni. 22Gu di lovedwa madzaha yatshavbo gukhugela avo nya ngima moyo guya mbeli, va diri tengo nya livbandre na mavili magumi, ni livbandre mazana (7.500). 23Linyumba la na Gerisoni va di ya ghwimba mitshatsha yawe khu hwane nya Tshatsha wa Nungungulu, khu phuvbo ga Pfoladambo. 24Muthangeli nya linyumba la Gerisoni a diri Eliyasafi, mwamana wa Layeli. 25Va na Gerisoni va di rwegidwe thumo nya gusayise Tshatsha nya Tshangano, ni gu pfhulela Tshatsha ni gu ghwimba makhuvi vbanyangwatunu nya Tshatsha nya Tshangano, 26ni makhuvi nya likupakupa, ni makhuvi nya nyangwa nya hudzwe yi dzundrulugelago Tshatsha ni giluvelo khu maphuvbo yatshavbo, ni dzingodzi dzaye, ni sombo satshavbo nya thumo wakone. 27Ga va na Khowati ni linyumba la va na Anirami, gumogo ni la va na Izari ni linyumba la na Hebroni ni la na Uziyeli; ava khavo a gu situgulwana sa Khowati. 28Vama vatshavbo va lovedwego nya tanga nya ngima moyo guya mbeli, tengo wawe va diri livbandre na mararu magumi, ni livbandre na limwedo mazana (8.600), va nga bani vari ni thumo nya gusayise Wulangani nya Guage. 29Lihundzu la sanana sa Khowati, va na ghwimba mitshatsha yawe vbafuvbi ni Tshatsha nya Tshangano, khu phuvbo ga Marandzi. 30Muthangeli nya dzinyumba dzatshavbo nya lihundzu la na Khowati a na bani ari uye Elisafani, mwamana wa Uziyeli. 31Avo va na rwegwa thumo nya gusayise Ngasa nya Gidzumeledzwano ni meza, gidzigaredzo nya dzikandriya ni siluvelo ni satshavbo nya thumo sa vbawulangani nya guage, makhuvi ni satshavbo si thumelago avbovbo. 32Muthangeli wa vathangeli va na Levhi a na bani ari Eleyazari, mwamana wa muphasi nya mhamba, Aroni; uye a na wonelela vatshavbo va sayisago Wulanga nya Guage. 33Va na Merari a gu nyumba ya na Mahali ni nyumba ya na Musi, ava khavo a gu livelego la Merari. 34Avo va nga sayedwago tengo nya vatshavbo vale va enedzidego ngima moyo guya mbeli, va diri khu tengo nya livbandre na limwedo magumi mazana ni mazana mavili (6.200). 35Muthangeli nya dzinyumba dza va na Merari a na bani ari Zuriyeli, mwamana wa Abhiyayili; avo va na tsitsa mitshatsha yawe vbafuvbi ni Tshatsha nya Tshangano, khu phuvbo ga Wuronga. 36Thumo wa na Merari va na sayisa mapulango nya Tshatsha nya Tshangano ni mipingwi yakone, madingo, ni sirandro, ni satshavbo sombo si thumiswago, 37ni madingo ma bhiyidwego khu likupakupa, dzitshina dzaye, misimbo ni dzingodzi dzakone. 38Ava va na ghwimba mitshatsha yawe mbeli ga Nungungulu, khu phuvbo ga Khugadambo nya Tshatsha nya Tshangano, gu khedza gugyatunu. Mosi ni Aroni gumogo ni sanana sawe khavo va na gu sayisago Wulanga nya Guage, ni gu sayisa sanana sa Israyeli; a gu hidzimela mumbe muthu wa walo, a na songwa. 39Vatshavbo va na Levhi va nga sayedwa khu Mosi ni Aroni, khu guleletela ga Pfhumu Nungungulu, gukhedza khu lihundzu lawe, vatshavbo vama nya gukhugele ngima moyo guya mbeli, va diri magumavili na mavili magumi mazana (22.000).”
Gudzegiswa ga avo nya matiwula
40 Pfhumu Nungungulu a di embela Mosi, khuye: “Saya matiwula yatshavbo nya vama nya sanana sa Israyeli, gukhugela vale va gu ni tanga nya ngima moyo guya mbeli, u dzega tengo nya malina yawe.
41Gasi Eni u na nyi dzegela va na Levhi wulangani ga yatshavbo matiwula ya na Israyeli; kholu kheni Pfhumu Nungungulu. U na dzega gambe ni matiwula nya sifuyo sa na Levhi wulangani nya matiwula yatshavbo nya sifuyo sa na Israyeli.
42Mosi a di saya matiwula yatshavbo ya na Israyeli, kha nga idzo Pfhumu Nungungulu a mu leletedego khidzo.
43Matiwula yatshavbo nya vama, khu tengo nya malina nya avo va tshanganisidego tanga nya ngima moyo guya mbeli, avo va nga sayedwago vbakari gwawe va diri khu tengo nya magumavili na mavili magumi ni mazana mavili ni livbandre na mavili magumi na vararu (22.273).
44 Pfhumu Nungungulu a di ganela ga Mosi, a mu embela, khuye: 45“Dzega va na Levhi, wulangani nya matiwula yatshavbo ya va na Israyeli, u dzega ni sifuyo sa va na Levhi wulangani nya sifuyo sawe; kholu va na Levhi va na lumba Eni. Eni kheni Pfhumu Nungungulu. 46Gasi avo nya mazana mavili ni livbandre na mavili magumi na vararu (273) nya matiwula ya na Israyeli, avo va vbindrago tengo nya Valevhi, va na dzegiswa. 47Hungo ni hungo u na wu dzegisa khu livbandre singerengere a gu dzisekeli, a gu tengo wa Wulangani nya Guage, gulemela gu ninganago likhumi dzigera. 48Gyuma gyogyo u na ningela Aroni ni sanana saye, kha nga dzegiso nya vale va vbindrwago khavo.” 49Khavbo avbo, Mosi a di hengeledzela gyuma gyatshavbo nya avo nya gu dzi dzegise, nya avo va vbindrago tengo wa na Levhi. 50Gyuma gi nga dugago khavbo nya dzegiso wa sanana sa na Israyeli, a diri tengo nya likhumi na mararu mazana ni livbandre na limwedo magumi ni livbandre (1365) singerengere (sekele) nya tengo wa vbawulangani nya guage. 51Mosi a di ningela gyuma gegi nya dzegiso ga Aroni ni ga sanana saye, khu guleletela ga Pfhumu Nungungulu, kha nga idzo Pfhumu Nungungulu a nga bani a leletede khidzo Mosi.
Currently Selected:
Mitengo 3: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
