Mitengo 23
23
Bhalahama a ngu kategisa Israyeli nyondro nya guhegule
1Khavbo avbo, Bhalahama, a di embela Bhalaki, khuye: “Nyi vbahele avba livbandre na sivili siluvelo, u nyi dongisela livbandre na dzimbili dzihamba.” 2Bhalaki a di gira kha nga guleletela ga Bhalahama. Khu hwane Bhalaki ni Bhalahama va di ningela phaselo ga giluvelo ni giluvelo khu mombe ni hamba.
3Bhalahama a di embela Bhalaki, khuye: “Khala vbafuvbi ni phaso wago nya guvbiswe; nyi nga gu hongola nyi ya wona gu Pfhumu Nungungulu a nata dzi wonegisa avbo gwangu, khu hwane, nyi nata gu embela Uye iso a na gu nyi yeyedzago.” Khavbo avbo, a di hongola wulangani nya gukhugege.
4Nungungulu a dita ga Bhalahama, a ta mu embela, khuye: “Nyi rumede gu emisa livbandre na sivili siluvelo, nyi payide ga giluvelo ni giluvelo mombe ni hamba mweyo.”
5Khavbo avbo, Pfhumu Nungungulu a di vega kanani ga Bhalahama magana yaye, a mu embela, khuye: “Indra ga Bhalaki u ya mu embela kharati.” 6Bhalahama a di bwelela ga Bhalaki aya mu mana na nga emide vbafuvbi ni phaso waye nya guvbiswe uye ni vatshavbo vathangeli va Mowabhi.
7Khavbo avbo, a di ganela magana yaye, a mu embela, khuye:
“Khu tigoni ga Arami,
nyi di raniswa khu Bhalaki,
mufumeli wa Mowabhi, a nyi rumela mwango
sigomoni sa Khugadambo, guta nyi embela, khuye:
Delu u ta vala Jakobe!
Delu uta yuyutela Israyeli!
8Nyi na vala kharini, uye a ngamba
vadwa khu Nungungulu?
Nyi na yuyutela kharini uye a ngamba yuyutedwa
khu Pfhumu Nungungulu?
9Kholu nyi ngu mu wona na nyiri
khu vbatshani nya siwindri,
nyi mu khedza na nyiri khu vbatshani
nya sigomo!
Vathu vava va vbanyago phuvbo,
nyamba patana ni mambe mayigo.
10Khu mani a na gu sayago vathu va Jakobe,
vale va tadego kha nga mafu?
Ambari guti tengo nya gipandre nya wu na
gya Israyeli?
Nyi nafe khu mafelo ya valulamidego,
mahegiso yangu ma na fanane ni yawe.”
11Khavbo avbo, Bhalaki a di embela Bhalahama, khuye: “Gasi khu ginani u nyi girelago esi? Eni nyi gu raniside gasi guta vala nala wangu, aholu uwe wa guta mu kategisa!”
12Bhalahama a di mu hakha, khuye: “Gasi kha nyi yeli gu ganela basi lisine nya esi Pfhumu Nungungulu a vegago kanani gwangu, gani?”
Bhalahama a ngu kategisa Israyeli nyondro nya wuvili
13Bhalaki a di engedza a mu embela, khuye: “Nyi ngu gu lomba kheni hongole khu wumbe wulanga avbo u na gu wonago. Kholu khavba wa gu wona gipandre gyawe basi, nyamba va wona vatshavbo; khavbovbo u naya va yuyutela.” 14A di mu dzega a gwela naye thembweni ga Zofimi, tshokani nya gigomo gya Pisiga, aya vbaha vbale livbandre na sivili siluvelo, a gira phaso nya mombe ni hamba ga giluvelo ni giluvelo.
15Aholu Bhalahama a di embela Bhalaki, khuye: “Khala avba vbafuvbi ni phaso wago nya guvbiswe; eni nyi nga gu hongola vbale nyi ya tshangana ni Pfhumu Nungungulu.”
16 Pfhumu Nungungulu a dita wonega ga Bhalahama, a mu thela magana yaye kanani gwaye, a mu embela, khuye: “Indra ga Bhalaki, u na ya mu embela esi ni esi.”
17Uye a di bwelela aya mana Bhalaki na nga emide vbafuvbi ni phaso waye nya guvbiswe, uye gumogo ni vathangeli va Mowabhi. Bhalaki a di mu wudzisa, khuye: “Ginani a ganedego Pfhumu Nungungulu?” 18Khavbo avbo, Bhalahama a di ganela wuprofeti waye, khuye:
“Khuga u ema, Bhalaki, u nyi yingisa;
demba ndzeve yago, uwe mwamana
wa Kipori:
19Nungungulu kha liphi kha nga muthu;
gambe kha vbindrugedzi mawonelo,
kha nga gyanana nya muthu.
Gasi khandri Uye a ganedego bwelo khavbo a si gira, gani?
A tumbisa, a tadzisa gitumbiso gyaye, gani?
20Khu lisine, nyi rumidwe gu kategisa.
Nungungulu kategiside,
eni kha nyi dzi kodzi gu vbindrugedza gikategiso.
21Kha gu wonegi libango ga Jakobe,
gu mwalo guvivba ga vathu va Israyeli.
Pfhumu Nungungulu wawe a na ni avo,
a ngu kulungedwa vbakari gwawe
kha nga Mufumeli wawe.
22 Pfhumu Nungungulu a va duside
khu tigoni ga Egipito;
Uye a va ningide tshivba nya
gufanane ni nyari.
23Olu gu mwalo wuloyi nya
guwugele Jakobe,
ambari wunyanga nya gufumbe Israyeli.
Ga gikhati gyakone gu na ganedwa
khu Jakobe ni Israyeli, pwani:
Khu gevbini egi Pfhumu Nungungulu
a ngamba gira gwago!”
24Wonani vathu va khugago kha nga
nghala nya ngadzi, va khuga va ema kha nga nghala nya matune, kha yi ruli na yi si gu hodzi pfimba waye,
na yi si gu seli novba wa avo va songidwego!”
25Bhalaki a di engedza a ganela ga Bhalahama, khuye: “Wa gumba vbweta gu va vala, u nga va kategisi!”
26Khu guralo, Bhalahama a di mu hakha, khuye: “Ina kha nya gu embela gukheni satshavbo esi Pfhumu Nungungulu, a na si ganelago nyi na si gira, gani?” 27Bhalaki a di embela gambe Bhalahama, khuye: “Hongole nyi gu yise ga wumbe wulanga; mwendro Pfhumu Nungungulu a na ya dzumela gukhuye u va vale khu vbale.” 28Bhalaki a di dzega Bhalahama a gu gwela naye tshokatunu nya gigomo gya Peyori, gi khedzanago ni giwula.
29Bhalahama a di embela Bhalaki, khuye: “Nyi emisele avba livbandre na sivili siluvelo, u nyi dongisela livbandre na dzimbili dzimombe ni livbandre na dzimbili dzihamba.” 30Bhalaki a di gira kha nga idzo a nga embedwago khidzo khu Bhalahama, a di ningela mombe ni hamba mweyo khu giluvelo ni giluvelo.
Currently Selected:
Mitengo 23: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
