Matewu 3
3
Guhevbudza ga Johane mubhapatisi
(Marko 1:1-8; Luka 3:1-18; Johane 1:19-28)
1Khu matshigu yale, Johane mubhapatisi a di wonega giwulani gya Judheya na gu hevbudza, khuye: 2“Vbindrugedzani mavbanyelo, kholu Mufumo wa Ndzadzini womo vbafuvbi gwanu.” 3Khuye oyu a nga thudwa khu muprofeti Isaya, gikhati a nga khuye:
Lomo lito li huwelelago mugiwulani, khilo:
Dongiselani ndzila ya Pfhumu,
lulamisani sindzilana saye.
4Guambala gwa Johane gu diri gwa mawoya nya ngameriya; libhandri a nga bani a gu hunga mugiwununi gwaye a diri lidowo; guhodza gwaye a diri dzimbera ni wulombe nya likhabi. 5Va diya iyo gwaye vathu va Jerusalema, va Judheya gwatshavbo ni va tigoni gwatshavbo ga Joridhani, 6vaya bhapatiswa khuye tsongoni wa Joridhani, na va gu dawulela sighoho sawe.
7Aholu, na wonide nya gukhuye Vasadhusi nya vangi ni Vafarisi va di guta navo gasi guta bhapatiswa khuye, a di va embela, khuye: “Enu livelego nya dzinyoga! Khu mani a nga mi ruma gu thava likhulo litago? 8Wonegisani mihandro yi yeyedzago gu vbindrugedza gwanu. 9Mu nga dzi pembi sanu, khenu: ‘Hi na ni babe Abrahama!’ Kholu, nyi ngu mi embelani gukheni, Nungungulu a ngu dzi kodza gu tumbulugisa sanana sa Abrahama khu musiwindrini momu. 10Ambari ulo, gibhewula gi vegidwe mikhambani nya simbo; simbo watshavbo wu si ningigo mihandro wu na kokwa, wu gu rinywa niloni. 11Eni nya gu mi bhapatisa khu mati, gasi mu vbindrugedze; aholu uye a tago khu hwane gwangu a na ni tshivba gu nyi vbindre; eni nyi mwalo fanelo nya gutshule silato saye. Uye a na mi bhapatisa khu Liphuvbo nya Guage ni nilo. 12A na ni gisalava mandzani gwaye; a na vbiyela githala gyaye, a vbevbera dzimbewu a thela mugisangalani, gasi mafisi a na ma vbisa niloni nyamba tshimega.”
Gubhapatiswa ga Jesu
(Marko 1:9-11; Luka 3:21-22)
13Khavbo avbo, khu Galileya Jesu a dita tsongoni wa Joridhani ga Johane, gasi guta bhapatiswa khuye. 14Aholu Johane a di bomba, khuye: “Eni kheni nyi gu ni fanelo nya gubhapatiswe khuwe, ni olu u tago gwangu!” 15Aholu Jesu a di mu hakha, khuye: “Si dige isoso. Gu vbwetega hi landrise, kharati, fanelo nya gululame gwatshavbo.” Khavbo avbo, Johane a di dzumela. 16Jesu na bhapatisidwe, a di duga khu matini. Avbovbo Ndzadzini gu di tulega, a wona Liphuvbo la Nungungulu na li gu relela kha nga lituva, li ta mbaka vbatshani gwaye. 17#Wona gambe: Mat 12:18; Mark 9:7; Luk 9:35. Khavbo lito nya gute khu Ndzadzini li di, khilo: “Oyu khu Mwamana wangu nya guhaladzege ngudzu, a nengedzisago monyo wangu.”
Currently Selected:
Matewu 3: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.