Levhi 25
25
Mwaga nya Sabhadho
(Ekisodha 23:10-11; Dhewuteronome 15:1-11)
1 Pfhumu Nungungulu a di ganela gambe ga Mosi gigomoni ga Sinayi, khuye: 2“Ganela ga sanana sa Israyeli u si embela, khuwe: Avbo mu na belago tigoni nyi na mi ningago, mu na vegisa Sabhadho, mu ningani mafu gikhati nya guhefemule khu lina la Pfhumu Nungungulu. 3Mu na lima mu yala marembwe yanu gipimo nya livbandre na moyo myaga, ndrani nya livbandre na moyo myaga mu na avbulela miuvha mu havela mihandro yakone. 4Aholu khu mwaga nya livbandre na mivili, mafu ma na ningwa gikhati nya guhefemule, Sabhadho nya gurungudze lina la Pfhumu Nungungulu. Khu na nga yala lithembwe lago, gambe khu na nga avbulela miuvha yago. 5U nga vbweri dzimbewu nya esi si na bugago sabune nya mbewu yi nga thegago guvbwerani ga vbanyamwage, gambe u nga haveli dziuvha nya miuvha yi ngamba avbuledwa. Wu na bani wuri Mwaga nya Sabhadho, nya guhefemule mafu. 6Aholu mihandro yi na velegwago mwagani nya Sabhadho nya guhefemule mafu, mu na hodzani, uwe gumogo ni sithumi sago nya vama ni vanyamayi, ni vathumegeli ni muwuyi u vbanyago naye. 7#Wona gambe: Eks 23:10-11. Ni sithumi sago, ambari ni sirengo nya likhabi sa tigoni gwago, satshavbo si na hodza niso mihandro yoyo.
Mwaga nya gunengele
8U na saya livbandre na dzimbili dzisemana nya myaga, khu gu khethu, livbandre na sivili sighava nya livbandre na mivili myaga, livbandre na mivili myaga yi wuyedzedwa livbandre na guvili; u tshanganisa kharati gipimo nya magumana na livbandre na mina myaga. 9Hwane nya ugo, u na ruma gu wombwa pundru khu tshivba ni tshivba, khu litshigu nya likhumi nya ngima nya livbandre na mivili. Litshigu nya tsetselelo nya wukhongolo, mu na ruma gu wombwa pundru tigoni gwanu gwatshavbo. 10Mu na agisa mwaga nya livbandre magumi, mu tivisa tigoni gwanu gwatshavbo gutshulega ga vathu vatshavbo va vbanyago umo. Mwaga yoyu, gu na bani guri gunengela nya gukhongolo vbakari gwanu; muthu ni muthu a na bwelela petoni gwaye, gambe muthu ni muthu a na wuya ga valongo vaye. 11Mwaga nya livbandre magumi, mwaga nya gunengele#25:11 Mwaga nya Sabhadho: Mwaga nya gunengele wu nga bani wu gu girwa guvbelani nya livbandre magumi myaga. Sihevbudzo nya mwago wowo khesi: 1. Dzikhumbi dzatshavbo gu vbwetega dzi tshulege; 2. Valongo gu vbwetega va phasedzela nongo wawe a guromo sigaradzoni; 3. Wundruye gu vbwetega wu dzi wonegisa khu mithumo nya wuhindzi ni gu phasedzelana; 4. Litigo la gu lumba Nungungulu, muthu watshavbo a na ni fanela nya gumane gipandre, Thomba nya ndranga kha yi dzi kodzi gu rengiswa, yi fanede gu wuya gambe mandzani ga mune. Nayo yoyu wu di himbedzela tsawanyana nya vathu vadugwana va nya dzitsapawu gu rengetela sipeto satshavbo, va gundrela kharati dzithomba dzatshavbo, va diga dhudhudhu nya vathu wusiwanani nyambana gilo. kha mu na lima mu yala, kha mu na vbwera esi si nga bugago sabune thembweni; kha mu na havela dziuvha nya guvelegwe khu miuvha mi ngamba avbuledwa. 12Kha nga a gu gunengela nya gukhongolo, mwaga yoyo fanede nari gilo gi agidego vbakari gwanu, mu na hodzani mihandro ya thembweni. 13Mwagani momo nya gunengele nya gukhongolo, moyo ni moyo nya enu a na hakha nyaluphye gipeto gyaye. 14Wa gu rengisela gilo muthu kwanu, mwendro gu renga, mu nga kalavelani khu gyanu. 15U na renga gilo gyogyo ga muthu kwanu, u wona myaga yi vbindridego hwane nya mwaga nya gunengele, uye a na rengisa na gu wona myaga nya guvbwere. 16Myaga ya gu bani yiri yingi, u na livba tengo nya wungi; ya gu bani yiri yidugwana u na livba tengo nya wudugwane ga esi u rengago, kholu a gu gu rengisela tengo nya dzinango nya guvbwere. 17“Mu nga tshanisini muakelane wanu, muthu ni muthu a na thave Nungungulu waye, kholu Eni kheni Pfhumu Nungungulu wanu.”
Situmbiso nya Mwaga nya Sabhadho
18Sayisani milayo yangu, vegisani sileletelo sangu; si landriseni guvbanyani gwanu, gasi mu vbanye nyamba thava gilo tigoni. 19Mafu ma na ninga mihandro yaye, mu na hodza mu khura; gambe mu na vbanyani na mu tiyide tigoni nyamba thava gilo. 20Mwa gu ganela, khenu: Hi na hodza ginani mwagani nya livbandre na mivili, olu hi na gumba yala mwendro guvbwera mihandro? 21Eni nyi na mi ninga gikategiso gyangu khu mwaga nya livbandre na moyo, gasi gu ninga mihandro nya guningane myaga miraru; 22avbo mu na gu yalago khu mwaga nya livbandre na miraru, mu na hodzani esi mu nga vbwera vbanyamwage, kala mwaga nya livbandre na mina. Kala mu gu vbwera dzimbewu, mu na vbanyani khu vbwero wa vbanyamwage.
Gudzegisa sipeto ni dzikhumbi
23Sipeto si nga rengisedwi muphelo, kholu mafu ma gu lumba Eni, enu muvawuyi ni vapfhumba vangu. 24Khu guralo, litigo latshavbo mu na gu li fumelago, mu na ningelani fanelo nya dzegiso nya sipeto satshavbo. 25Ndriyago a gu mana sigaradzo a gu rengisa gipandre nya gipeto gyaye, nongo waye nya lisine, a ngu yela guya dzegisa gipandre gi nga rengiswago khu ndriyaye. 26Muthu a gu mwalo nongo nya gu mu dzegisele gipeto gyaye, a gu kala a mana tengo nya guenele gu gi dzegisa khuwo, 27a na saya myaga a rengisidego khiyo, a gu livba tengo wu tshadego ga wule a nga mu rengela, khu magirelo yoyo, gipeto gi na wuya gambe mandzani gwaye. 28Aholu a gu hamuga maningano nya gu ye dzegisa egi a nga rengisago, gi na simama giri mandzani ga murengi, kala ga Mwaga nya Gunengele, khu mwaga yoyo gi na tshulega gi wuya gambe mandzani ga mune waye. 29Muthu a gu rengisa nyumba yi guromo dhoropani gu bhiyidwego, a na ni fanelo nya gu yi dzegisa kala guvbelani nya mwaga a nga rengisago khuwo. Fanelo yaye nya gu yi dzegise, yi na ni mwaga moyo basi. 30Nyumba yi guromo dhoropani gu bhiyidwego, ya gumba dzegiswa ndrani nya mwaga rumba, yi na lumba murengi ni ngamo yaye kala gupindruga; khu Mwaga nya Gunengele kha yi na tshulega khu mandzani gwaye. 31Aholu dzinyumba dzi guromo vbavbandze nya madhoropa nya gubhiywe dzi na girwa idzosaye ni sipeto sa tigoni; dzi ngu dzi kodza gu dzegiswa mandzani ga murengi, gambe dzi na tshulega khu Mwaga nya Gunengele. 32Gasi dzinyumba dza Valevhi, ni dzinyumba dzi guromo madhoropani ma lumbago avo, Valevhi va na ni fanelo nya gu dzi dzegise ni gevbini gikhati. 33Mulevhi a gumba dzegisa nyumba yaye a rengisidego yi guromo dhoropani yi mu lumbago, nyumba yoyo, yi na tshulega khu mandzani ga murengi khu Mwaga nya Gunengele, kholu dzinyumba dzi guromo madhoropani ga Valevhi gyuma gyawe vbakari ga sanana sa na Israyeli; 34gasi gipeto gi guromo vbafuvbi ni madhoropa yawe, gi nga rengiswi; kholu gyuma gi va lumbago kala gupindruga.
Milayo nya guvhikele sisiwana
35Ndriyago a gu khala gisiwana, a vbeledwa khu tshivba, u na mu phasedzela kha nga muwuyi, mwendro muthu nya gute khala petoni gwago, mu dzumedzise guvbanya vbafuvbi gwago. 36U nga hakhi bhindzu avbo gwaye, mwendro gu vbweta gu wuyedwa khu gilo khavbo gwaye, aholu thava Nungungulu wago, u diga ndriyago a vbanya nago. 37U nga lombisi dzitsapawu khu gu vbweta bhindzu, gambe u nga mu ningi guhodza khu gu zama gu wuyedwa khu gilo. 38Eni kheni Pfhumu Nungungulu wanu nyi nga mi dusago khu tigoni ga Egipito, gasi guta mi ningani litigo la Khanani, nyi fela gu khala Nungungulu wanu.
Milayo nya guvhikele dzikhumbi
(Ekisodha 2:2-11; Dhewuteronome 15:12-18)
39Ndriyago u vbanyago naye a gu khala gisiwana, a gu dzi rengisa gwago, u nga mu thumisi kha nga khumbi; 40mu phare kha nga githumi mwendro muluveli. A na gu thumela kala mwaga nya gunengele. 41Khavbo avbo, a na tshulega a khuga a hongola uye ni sanana saye, a bwelela ga valongo vaye aya khala nyaluphye gipetoni gya vavelegi vaye. 42Kholu sithumi sangu nyi nga si dusago khu tigoni ga Egipito, kha va yeli gu rengiswa kha nga dzikhumbi. 43U nga va khozisi khu dzihanyi, aholu thava Nungungulu wago. 44Gasi khumbi nya mwama mwendro nya nyamayi u na yi rengago, gu vbwetega nya valombo, nya gute khu mayigoni ya vbavbandze; mu ngu dzi kodza gu renga dzikhumbi nya vama ni vanyamayi. 45Mu ngu dzi kodzani gambe gu renga dzikhumbi vbakari nya sanana nya vawuyi va vbanyago nanu, dzindranga dzawe dzi guromo vbafuvbi gwanu, ni sanana sawe si velegidwego tigoni gwanu, va khala thomba yanu. 46#Wona gambe: Eks 21:1-11; Dhet 15:12-18. Avovo mu ngu dzi kodzani gu tshiyela sanana sanu kha nga thomba yawe, gikhati gyatshavbo mu ngu dzi kodza gu va thumisani kha nga dzikhumbi. Aholu vandriyanu va na Israyeli, a nga manegi ni moyo nya gu va fumele khu dzihanyi. 47Muwuyi mwendro muluveli a vbahidego tigoni gwanu, a gu ghanya, a gu manega ndriyago nya gisiwana aya dzi rengisa ga muluveli, mwendro ga muwuyi u vbanyago naye, mwendro ga moyo nya nongo wa muluveli yoyu a khala khumbi, 48hwane nya gu bani a dzi rengiside, a na ni fanelo nya gu dzegiswe; moyo nya vandriyaye a ngu dzi kodza gu mu dzegisa. 49Babedugwane waye, ambari gyanana gya babedugwane waye, mwendro moyo nya nongo nya linyumba lawe, a ngu dzi kodza gu mu dzegisa; a gu bani ari ni maningano a ngu dzi kodza gu dzi dzegisa abune. 50Khu kharato a na pwanana ni oyu a nga rengwago khuye va wona gipimo nya matshigu gukhugela mwaga a nga dzi rengisago khuwo kala Mwaga nya Gunengele, tengo nya gurengwe gwaye, wu na pimwa khu gikhati nya mwaga gukhedza khu tengo nya guhakhwe kha nga githumi. 51Gwa gu bani gu nga tshade myaga nya yingi, a na dusa tengo wu ninganago myaga yoyo, nya dzitsapawu nya tengo a rengidwego khuwo, tengo nya gu dzi dzegise gwaye. 52Ma gu bani ma tshade madugwana gu vbohisa Mwaga nya Gunengele, a na pwanana naye a livba myaga yi tshadego, gasi gu livba gu dzi dzegisa gwaye. 53Ndrani nya myaga a na gu bani nari ndrangani gwaye, fanede gu mu wona kha nga githumi nya guhakhiswe; nasi gu mu gira kha nga khumbi. 54A gumba tshudziswa, khu magirelo yaya, a na tshulega khu Mwaga nya Gunengele, uye gumogo ni sanana saye. 55“Kholu va na Israyeli va gu lumba Eni basi, sithumi sangu nyi si dusidego khu tigoni ga Egipito. Eni kheni Pfhumu Nungungulu wanu.”
Currently Selected:
Levhi 25: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
