Levhi 21
21
Milayo yi lumbago vaphasi nya mhamba
(Ezekiyeli 44:20-27)
1 Pfhumu Nungungulu a di embela Mosi, khuye: “Ganela ga vaphasi nya mhamba, sanana sa Aroni, khuwe: Muphasi nya mhamba a nga dzi nyenyezisi, khu gu hidzimela vbafuvbi nya girumbi gya nongo waye, 2vbavbandze nya wulongo nya novba nya nga ava: Babe, mayi, gyanana nya gikhwathana mwendro nya gyagadzyana, ndriyaye nya mwama; 3gasi ndriyaye nya nyamayi, a gu bani a ngari likendzi, na guvbanya naye, nasi gu dzegwi; a ngu dzi kodza gu dzi nyenyezisa khu uye. 4Uye a gu muthangeli tigoni gwawe, a nga dzi nyenyezisi. 5#Wona gambe: Levh 19:27-28; Dhet 14:1. A nga vili ndzudzu hungoni; a nga vili tshiba bambe nya giledzu gambe a nga hatshedwi milini. 6Va na khale vathu va phasedwego Nungungulu wawe, va nga nyenyezisi lina la Nungungulu, kholu khavo va ningelago miphaso nya guvbiswe ni eyi nya sibaba ga Pfhumu Nungungulu. Khu guralo, gu vbwetega vari vathu va agidego. 7Va nga dzegi nyamayi nya liphuphulu, mwendro nyamayi a ladego ni mwama, mwendro nyamayi a hudwego khu mwama waye, kholu muphasi nya mhamba agide ga Nungungulu waye. 8Mu wone kha nga muthu a agidego kholu khuye a bikelago guhodza nya miphaso ga Nungungulu wago. Muthu a agidego mahoni gwanu, kholu Eni Pfhumu Nungungulu nyi mi agisago, nyi agide. 9Gyanana nya gyagadzyana gya muphasi nya mhamba gya gu dzi nyenyezisa khu wubhayi, gi ngu nyenyezisa babe waye, gi na vbiswa niloni.
Muphasi nya khongolo nya mhamba
(Levhi 8:7-12)
10Wule a gu muphasi nya khongolo nya mhamba vbakari ga vandriyaye, a guhuledwego mafura nya gutodzwe hungoni gwaye, oyu a wumbedwego gasi guambala dzingandzu dzi agisidwego, a nga digi ndzudzu wa hungoni gwaye nyamba wu samula, mwendro gupferula dzingandzu dzaye. 11A nga hidzimeli vbafuvbi nya girumbi gasi a si dzi nyenyezisi, ambari nari babe waye mwendro mayi waye; 12a nga dugi wulangani nya guage, gasi a si nyenyezisi Wulanga nya Guage wa Nungungulu waye, kholu mafura nya gutodze ya Nungungulu waye ma guhudwe vbatshani gwaye. Eni kheni Pfhumu Nungungulu. 13Uye a na dzega nyamayi nya likendzi. 14Kha na dzega nyamayi nya noni, mwendro nyamayi nya guhudwe khu mwama waye, mwendro nyamayi a sagedwego khu mwama, mwendro gibhayi. Fanede gu dzega basi nyamayi nya likendzi wa na gyawe. 15A gumba gira kharato, a na nyenyezisa melego waye vbakari ga valongo vaye. Eni kheni Pfhumu Nungungulu nyi mu hathidego.” 16Pfhumu Nungungulu a di embela gambe Mosi, khuye: 17“Ganela ga Aroni, u mu embela, khuwe: Ga situgulwana sago nya melana wu nga gutago khu mbeli, ni moyo nya ava va hasidego a nga hidzimeli a ta ningela guhodza nya miphaso ga Nungungulu waye. 18Khu guralo, ni moyo nya vale va limadego milini gwawe, a nga hidzimeli a ta ningela miphaso nya nga: Gikhumu, muthu nya guhase litundru, nya mabawa khovbeni ni nya gukhwenyele litundru; 19gikhurubwa mwendro muthu nya gupidwe ngondro ni mandza; 20muthu nya gikukununu; mwendro oyu a gu gimburututwana, mwendro oyu a gu ni siphithu, mwendro oyu a gu ni silondra, ni mavalavala khovbeni, mwendro oyu a thenidwego. 21Ni moyo vbakari nya situgulwana sa muphasi nya mhamba Aroni, a gu bani na haside, a nga hidzimeli a ta ningela phaso nya guvbiswe ga Pfhumu Nungungulu. Oyu a sa vbelelago gululama mili waye, a nga hidzimeli a ta ningela guhodza nya miphaso ga Nungungulu waye. 22A na hodza guhodza nya miphaso gwa Nungungulu waye, nya miningelo nya guage ngudzu ni eyi nya guage. 23Aholu a nga tsemakanyi mwendra nya makhuvi, gambe a nga hidzimeli vbagiluvelotunu, gasi a si nyenyezisi wulanga wangu nya guage khu guhasa gwaye, kholu Eni kheni Pfhumu Nungungulu nyi va agisago.” 24Mosi a di embeledzela sileletelo sesi Aroni ni sanana saye, ni satshavbo sanana sa Israyeli.
Currently Selected:
Levhi 21: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
