Josuwa 18
18
Gukabanisedwa nya litigo li tshadego
1Tshangano wa na Israyeli wu di tombana tigoni ga Silo; va diya emisa vbale Tshatsha nya Tshangano, kholu litigo li diri mandzani gwawe. 2Gu di bani gu nga tshade livbandre na mavili mahundzu ya Israyeli, ma nga bani ma si gu hakhi giavelo nya thomba yawe. 3Josuwa a di embela sanana sa Israyeli, khuye: “Gu na kala lini na mu nga gu khala mihuni guya dzega litigo eli Pfhumu Nungungulu wa vababe vanu a mi ningidego? 4Hathani vama vararu khu lihundzu ni lihundzu, gasi nyi va rumela va dzundrulugela litigo na va gu lovetela malanga va ma wonago na ma gu yela gu khala thomba avbo gwawe, khu hwane va na wuya va ta nyi ninga, gasi nyi kodza guti makabaniselo yakone. 5Mu na li kabanisa khu livbandre na sivili sipandre: Judha a na khala tigoni gwaye khu phuvbo ga Marandzi, gasi nyumba ya Josefe, yi na khala tigoni gwaye khu phuvbo ga Wuronga. 6Mu na pimela litigo, mu li kabanisa khu livbandre na sivili sipandre; mu na nyi reselani malangalila yakone, gasi nyi kodze gu sasuledza mbeli ga Pfhumu Nungungulu wathu. 7Gimwalo gipandre gi na gu lumbago va na Levhi, vbakari gwanu, kholu thomba yawe khu gu phasa mhamba ya Pfhumu Nungungulu. Gadhi, Rubheni ni gipandre nya lihundzu la Manasi, va hakhide gipandre gyawe Tshatugo ga Joridhani khu Khugadambo, va nga ningwago khu Mosi, githumi gya Pfhumu Nungungulu.” 8Vama vale va di khuga va phara ndzila. Josuwa a di ninga sileletelo sesi ga vama vale va nga hongolago guya lovetela litigo, khuye: “Indrani mu ya dzundrulugela litigo, mu lovetela, khu hwane mu na wuyani avbo gwangu, gasi nyi ta kodza gu sasuledza solo ga Pfhumu Nungungulu, na nyiri khavba Silo.” 9Avo va di khuga va hongola, va ya dzundrulugela litigo, va lovetela khumo nya libhuku, va li kabanisela khu livbandre na sivili sipandre, gukhedza khu madhoropa yaye; khu hwane va di wuya ga Josuwa tigoni ga Silo. 10Khavbo avbo, Josuwa a di lola dzisolo mbeli ga Pfhumu Nungungulu, a kavedzela litigo sanana sa Israyeli gukhedza khu dzinyumba dzawe, nari khu tigoni ga Silo.
Thomba ya na Bhejami
11Solo nya guphele yi di thegela lihundzu la na Bhejami, gukhedza khu dzinyumba dzawe. Litigo lawe li gira vbingano ni va na Judha ni va na Josefe. 12Khu Wuronga, vbingano wawe wu di khugela tsongoni wa Joridhani, wu gwela kala gigomoni gya Jeriko, khu phuvbo ga Wuronga, wu gwela khu gigomo guya Pfoladambo, wuya vbelela giwulani, gya Bheti-Avheni. 13Khu vbale, wu di vbindra wuya Marandzi khu gigomoni ga Luzi khu Marandzi, a gu Bheteli; wu bwelo khavbo wu relela Ataroti-Adhari, vbafuvbi ni gigomo khu Marandzi ga Bheti-Horoni wa vbavbatshi. 14Bwelo khavbo wu ladza guya Marandzi, khu Pfoladambo, wu khugela gigomoni gi guromo vbafuvbi ni Bheti-Horoni, khu Marandzi, wu ya hegisela Kiriyati-Bhahali, a gu Kiriyati-Jeyarimi, lidhoropa la na Judha. Egi a diri gipandre gya Pfoladambo. 15Khu phuvbo ga Marandzi, wu di khugela mahegiso nya lidhoropa la Kiriyati-Jeyarimi wu vbindra kala milamboni nya mati ya Nefitowa; 16Wu relela wuya gira vbingano khu mahegiso nya gigomo gi khedzanago ni kova wa mwamana wa Hinomi, khu Wuronga nya kova wa Varefayimi, wu relela khu kova wa Hinomi khu bambe ga Vajebhusi, guya Marandzi, kala wuya vboha Eni-Rogeli; 17wu ndreya wu khedza Wuronga, wu vboha kala Eni-Semesi, avbo wu nga vbindrago guya Geliloti, gu nga khedzanago ni gigomo gya Adhumimi, wu relela vbagiwindritunu gya Bhowani, mwamana wa Rubheni; 18wu vbindra, wu relela khu phuvbo ga Wuronga, gu khedzanidego ni lipani, wu relela khu lipani. 19Wu bwelo khavbo wu vbindra kala phuvbo ga Bheti-Hogila, guya Wuronga, wuya vbelela ga Yiphwa nya Munyu, avbo hegisago avbo tsongo wa Joridhani, khu Marandzi; owu khuwo vbingano khu phuvbo ga Marandzi. 20Khu phuvbo ga Khugadambo, vbingano wawe khu tsongo wa Joridhani; eyi khiyo yi nga bani yiri thomba ya na Bhejami, ni mivbingano yawe khu maphuvbo yatshavbo; gukhedza khu dzindranga dzawe.
Madhoropa ya na Bhejami
21Madhoropa ya sanana sa Bhejami, gukhedza khu dzindranga dzawe, ma diri aya: Jeriko, Bheti-Hogila, Emeki-Kesisi, 22Bheti-Harabha, Zemarayimi, Bheteli, 23Avhimi, Para, Ofira, 24Kefari-Amonayi, Ofini ni Gabha; yatshavbo gumogo ni mitalala yaye ma diri likhumi na mavili. 25Gibheyoni, Rama, Bheyeroti, 26Misipa, Sefira, Mosa, 27Rekemi, Iripeyeli, Tarala, 28Sela, Elefi Jebhusi (a gu Jerusalema), Gibheya ni Kiriyati; yatshavbo likhumi na mana madhoropa gumogo ni mitalala yaye; aya, ma diri thomba ya sanana sa Bhejami, gukhedza khu dzindranga dzawe.
Currently Selected:
Josuwa 18: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
