Josuwa 11
11
Guwandrwa ga mayigo ya Wuronga
1Avbo Jabini, mufumeli wa Hazori, a nga pwago mahungu yaya, a di rumela myango ga Jobhabhi, mufumeli wa Madhoni, ni ga mufumeli wa Siniromi, ni ga mufumeli wa Akisafi, 2ni ga vafumeli va sigomoni sa Wuronga, ni va mikovani ga Marandzi ga Kinereti, ni va mapanini ya Dhori, khu Pfoladambo, 3ga Vakhanani va Khugadambo ni Pfoladambo, ga Vaamori, ga Vahiti, ga Vaperezi, ga Vajebhusi va musigomoni ni ga Vahevhi vbafuvbi ga Herimoni, tigoni ga Misipa. 4Khavbo avbo, avo va di duga gumogo ni masotshwa yawe yatshavbo, ni gidzemo nya gingi nya gutale ngudzu kha nga fungu wa phwani; ni dzikavalu gumogo ni dzikareta nya gutale ngudzu. 5Vafumeli vatshavbo vava va di tombana, vata zumba vbafuvbi ni mati ya Meromi, gasi gudwanisa va na Israyeli. 6Pfhumu Nungungulu a di embela Josuwa, khuye: “U nga khali hwanga mbeli gwawe; kholu mindru, khu gikhati nya gufanane ni egi, Eni nyi na bani nyi va ningede vatshavbo va songwa mandzani ga na Israyeli. U na pila misivba nya mawundru nya dzikavalu dzawe, u vbisa dzikareta dzawe khu nilo.” 7Khavbo avbo, Josuwa gumogo ni masotshwa yaye, va dita khu guvbiredza matini ya Meromi, vata va sasela. 8Pfhumu Nungungulu a di va ningela mandzani ga va na Israyeli, va va pala, va gu va lundra kala Sidhoni nya khongolo, va vboha Misirefoti-Mayimi, kala kovani wa Misipa khu Khugadambo; va di va sasela nyamba tshiya ni moyo nya guvbanye. 9Josuwa a di va gira kha nga idzo a embedwego khidzo khu Pfhumu Nungungulu; a pila misivba dzikavalu dzawe, ni gu vbisa dzikareta dzawe. 10Khu gikhati gya gimwegyo, Josuwa a di wuya ata phanga Hazori, a songa khu litshari mufumeli waye, kholu, khu gale Hazori, a diri tsindza nya mifumo yeyi yatshavbo. 11A sasela khu matshari vatshavbo va nga bani vari umomo, a va mbembisa muphelo nyamba tshiya ni moyo nya guvbanye; Hazori gu di vbiswa khu nilo. 12Josuwa a di phanga madhoropa yatshavbo, a songa vafumeli vawe khu matshari, a va mbembisa muphelo, kha nga guleletela ga Mosi, githumi gya Pfhumu Nungungulu. 13Aholu madhoropa ma nga bani ma vbahidwe musigomoni, va na Israyeli kha va ma vbisa, vbavbandze ga eli basi la Hazori li nga vbiswa khu Josuwa.#11:13 A diri gihena nya guvbahwe madhoropa musiwulani nya madhoropa ya gale ma nga pfhungumudwa. 14Va di kabana satshavbo va nga phangago madhoropani mule ni mitshambi; aholu vathu vatshavbo va di va sasela khu matshari, kala va va mbembisa, nyamba tshiya ni moyo nya guvbanye. 15Kha nga idzo Pfhumu Nungungulu a nga leletelago khidzo githumi gyaye Mosi, Mosi nuye a di leletela Josuwa; khu guralo, Josuwa nuye a di si gira; gimwalo ni gimwegyo a ngamba gi landrisa ga satshavbo esi Pfhumu Nungungulu a leletedwego Mosi. 16Khu guralo, Josuwa a di wandra litigo lile la musigomoni, Negebhi watshavbo, ni litigo latshavbo la Goseni, Arabha, ni gipandre gyatshavbo gya musigomoni ga Israyeli gumogo ni mapanini gwaye, 17gukhugela gigomoni gya Halaki, gi khadego khu phuvbo ga Seyiri, kala Bhahali-Ghadhi, gu manegelago kovani ga Libhanoni, vbafuvbi ni gigomo gya Herimoni. A di dhumela vafumeli vovo vatshavbo a va sasela. 18Gikhati nya gingi Josuwa a di dwanisa vafumeli vava vatshavbo. 19Gumwalo ni lidhoropa limwedo li nga hungago gurula ni va na Israyeli, vbavbandze ga Vahevhi, vavbanyi va Gibheyoni. Yatshavbo a di ma wandra khu gu dwana. 20#Wona gambe: Dhet 7:16. Kholu Pfhumu Nungungulu a di bangisa myonyo yawe a va gira va dwanisa Israyeli, gasi va kodze gu mbembisedwa muphelo nyamba pwedwa gisiro; gasi va fuviswa, kha nga idzo Pfhumu Nungungulu a nga leletisa khidzo Mosi. 21Khu gikhati gyogyo, Josuwa a di hongola aya mbembisa va Anaki va gigomoni gya Hebroni, gya Dhebhiri, gya Anabhi gumogo ni sigomo satshavbo sa Judha niso sa Israyeli, Josuwa a di si mbembisa gumogo ni madhoropa yawe. 22Mwalo ni moyo basi nya muanaki a tshadego nya guvbanye tigoni ga sanana sa Israyeli; vbavbandze basi tigoni ga Gaza, Gati ni Asidhodhi khumo va tshadego vadugwana nya gukari. 23Khu guralo, Josuwa a di khozisa tigoni gwatshavbo, kha nga idzo Pfhumu Nungungulu a nga leletelago khidzo Mosi; khu guralo, Josuwa a di li ningela li khala thomba ya na Israyeli, va kabaniswa mayelano khu lihundzu lawe. Khavbo avbo, tigoni gu di manega gurula.
Currently Selected:
Josuwa 11: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
