Valamuli 7
7
Gidhiyoni a ngu pala Vamedhiyani
1Khavbo avbo, Jerubhahali a ranwago Gidhiyoni, gumogo ni masotshwa yaye yatshavbo, va di khuga ni dzimindru dzikhongolo, vaya zumba vbafuvbi ni nambo wa Harodhi; lizumbo la Vamedhiyani li diromo khu phuvbo ga Wuronga gwawe, kovani, vbafuvbi ni gigomo gya More. 2Pfhumu Nungungulu a di embela Gidhiyoni, khuye: “Uwe u na ni vathu nya vangi ngudzu gasi gu eni nyi ningela Vamedhiyani mandzani gwago; gasi va na Israyeli va si dzi khusedzi gwangu, va ganela, khavo: Va di vbulugiswa khu tshivba yawe. 3Khu guralo, tivisa vathu, khuwe: Vatshavbo vale va na gu bani va ndrendremela khu hwanga va na duge khu gigomoni gya Gileyadhi va bwelela gaya.”#7:3 Khavbo avbo, magumavili na mavili magumi mazana (22. 000) vama va di duga, gu tshala basi likhumi magumi mazana (10. 000). Wona gambe: Dhet 20:8.
4 Pfhumu Nungungulu a di engedza a embela Gidhiyoni, khuye: “U ngari ni vathu nya vangi; relela navo vbafuvbi ni mati, avbovbo nyi naya va vbungula; avo u na gu tshalago navo, nyi na ganela, kheni: Oyu a na hongola nago, u yoyo a nga hongoli nago; khu guralo vatshavbo vale nyi na gu embela kheni oyu a nga hongoli nago, u yoyo kha na hongola.”
5Kharato Gidhiyoni a di dzega vathu a relela navo vbafuvbi ni mati. Khavbo avbo, Pfhumu Nungungulu a di mu embela, khuye: “Ni wevbini a na dandzelago mati kha nga idzo yi girago yimbwa, uyoyo u na mu vega phuvbo; u va hambanisa ni vatshavbo vale va na khidzimago va sela mati.” 6Tengo nya avo va nga dandzelago mati ni gu ma rega khu mandza va sela, wu diri mazana mararu (300) vama. Vatshavbo vale vambe va di khidzima va sela mati.
7 Pfhumu Nungungulu a di embela Gidhiyoni, khuye: “Khu ava nya mazana mararu vama va nga dandzelago mati nyi na mi vbulugisa nyi ningela Vamedhiyani mandzani gwago; aholu ava vambe vatshavbo va rume va hongola magaya gwawe.” 8Gidhiyoni a di dzega dzimbuva dza vale va bwelelago gumogo ni mipundru yawe, a va rumela gu va hongola mitshatshani gwawe, aholu ava vambe nya mazana mararu a va embela gukhuye va tshale; lizumbo la Vamedhiyani li diromo vbavbatshi nya kova.
9 Pfhumu Nungungulu a di embela Gidhiyoni ni wutshiguwule, khuye: “Khuga u relela lizumbotunu, kholu nyi na li ningela mandzani gwago. 10Wa gu bani u ngari ni hwanga nya gu va dhumele, relela lizumbotunu ni githumi gyago Pura; 11u naya vapwa iso va si ganelago. Khu hwane nya ugo, uwe u na tiya hwambo nya gu va dhumele.” Khavbo avbo, uye a di relela gumogo ni githumi gyaye Pura kala aya vboha vbafuvbi ga vakheviseli nya lizumbo. 12Vamedhiyani, Vaamaleki gumogo ni vatshavbo va Khugadambo, va di mbambamede kovani nga mbasa nya gutale; ni dzingameriya dzawe dzi diri dzingi nga fungu wa phwani, nyamba kodza gu sayedwa khu muthu.
13Avbo a nga vboha, Gidhiyoni a dipwa mwama moyo a nga bani na gu embeledzela moyo wa na gyawe ndroro na gukhuye: “Nyi di lora ndroro yeyi: Nyi di wona gibaba nya mala na gi gu wumbuluga gi bela lizumboni la Vamedhiyani, gi vboha kala mitshatshani gwathu gi yi veta khu tshivba yi tshungunuga yi thega vbavbatshi.”
14Ndriyaye a di mu phindrula, khuye: “Ndroro yoyo kha yi ganeli simbe vbavbandze nya nyimbi ya Gidhiyoni, mwamana wa Jowasi, lidzaha nya Muisrayeli. Nungungulu a mu ningide mandzani gwaye Vamedhiyani ni lizumbo leli latshavbo.”
15Avbo Gidhiyoni a nga pwago ndroro yeyi ni tshamuselo waye, a di lombelela ga Nungungulu; a bwelela lizumboni la na Israyeli a va embela, khuye: “Khugani, kholu Pfhumu Nungungulu ningede mandzani gwanu lizumbo la Vamedhiyani.” 16A di kabanisa vama vava nya mazana mararu (300) khu sikwata siraru; gimwegyo ni gimwegyo a di gi pharisa mandzani mipundru ni mikanvu nya maphanga, na yiri ni myenge ndrani gwaye. 17A va embela, khuye: “Nyi woneni, mu girani nga idzo eni nyi girago; avbo hi naya vbohago vbafuvbi ni lizumbo, iso nyi na girago, girani nenu kharato. 18Avbo eni ni vatshavbo nyi gu navo hi wombago mipundru yathu, enu nenu, wombani mipundru yanu khu ga yatshavbo maphuvbo mu na gu bani mu romo na mu randrede lizumbo na mu gu huwelela, khenu: Ethu hi va Pfhumu Nungungulu ni Gidhiyoni!”
19Gidhiyoni gumogo ni vama nya lizana a nga bani nari navo, a di bela nyangwani nya lizumbo, guphelani nya gupile nya vbakari nya wutshigu; na gu vegidwe dzighadhi; va di womba mipundru ni gu pandra mikanvu va nga bani va pharide mandzani. 20Vatshavbo vama nya sikwata sa siraru va di womba mipundru, ni gu pandra mikanvu, mandzani gwawe ga nyambade na va pharide myenge, khu nyamudye va phara mipundru, va huwelela, khavo: “Nyimbi ya Pfhumu Nungungulu ni ya Gidhiyoni.” 21Muthu ni muthu, a di khala wulanga waye va randrela wughovelo; khavbo avbo vatshavbo va nga bani va romo wughoveloni, va di phela gu tutuma va pfowola va thava na va guwomba dzihuwa.
22Avbo vatshavbo va na Israyeli nya mazana mararu va nga womba mipundru, Pfhumu Nungungulu a di hambanisa mapimo Vamedhiyani, va phela gu payana khu gyawe ndrani nya lizumbo lawe latshavbo; masotshwa ma di tutuma ma thavela Zerera, kala Bheti-Sita, va vboha kala mivbinganoni ya Abheli-Meyola, vbafuvbi ni Tabhati. 23Khavbo avbo, va na Israyeli, va na Nafitali, va na Aseri ni vatshavbo va na Manasi, va di rambwa gu lundra Vamedhiyani. 24Gidhiyoni a di rumela gambe myango musigomoni gwatshavbo sa Efrayimi, a ganela, khuye: “Relelani mu ta dwana ni Vamedhiyani, mu va himbedzela gu tshatuga mati ya Joridhani kala Bheti-Bhara.” Na va rambidwe vatshavbo va na Efrayimi, va di va dzegela milambo kala Bheti-Bhara ni Joridhani. 25Va di mola manganagana mavili nya Vamedhiyani, Orebhi ni Zehebhi; Orebhi va diya mu songela vbagiwindritunu ga Orebhi, ni Zehebhi vaya mu songa vbagighowolotunu nya gugamele dziuvha gya Zehebhi. Khu hwane nya gu bani va vbedzide gu lundra Vamedhiyani, va di resa mihungo ya Orebhi ni Zehebhi ga Gidhiyoni, a nga bani na gu khade khu tshatugo nya tsongo wa Joridhani.
Currently Selected:
Valamuli 7: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
